ກຳມະການກົມການເມືອງສູນກາງພັກ ຜູ້ປະຈຳການເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ, ທັງເປັນຜູ້ຊີ້ນຳແຂວງສະຫວັນນະເຂດ, ມີສະຫາຍ ບຸນໂຈມ ອຸບົນປະເສີດ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີສະຫາຍຮອງເລຂາພັກແຂວງ, ກໍາມະການພັກແຂວງເຂົ້າຮ່ວມ.
ໃນປະຊຸມ, ສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ໄດ້ຜ່ານບົດສະຫຼຸບການນຳພາ-ຊີ້ນຳວຽກງານຮອບດ້ານຂອງຄະນະບໍລິຫານງານພັກແຂວງປະຈຳປີ 2024 ແລະ ທິດທາງແຜນການສູ້ຊົນປີ 2025. ຈາກນັ້ນ, ສະຫາຍ ແສນສັກ ສຸລິສັກ ຄະນະປະຈໍາພັກແຂວງ ຮອງເຈົ້າແຂວງ ໄດ້ ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳປີ 2024 ແລະ ທິດທາງແຜນການສູ້ຊົນ 2025.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການປະກອບຄຳເຫັນກ່ຽວກັບສະພາບຄວາມສະຫງົບປອດໄພ ແລະ ສິ່ງຫຍໍ້ທໍ້ທີ່ເກີດຂຶ້ນໃນສັງຄົມໃນປີ 2024 ຜ່ານມາ ແລະ ທິດທາງວິທີປ້ອງກັນ, ແກ້ໄຂໃນປີ 2025, ປະກອບຄຳເຫັນກ່ຽວກັບເງິນບໍລິຫານ, ໜີ້ສິນ ແລະ ການຊຳລະຄ່ານໍ້າ-ຄ່າໄຟປະຈຳປີ 2024, ປະກອບຄຳເຫັນກ່ຽວກັບການຄຸ້ມຄອງ, ປົກປັກຮັກສາປ່າສະຫງວນໄປຄຽງຄູ່ກັບການແກ້ໄຂບັນຫາການລັກລອບຕັດໄມ້, ເຄື່ອນຍ້າຍໄມ້ຜິດກົດໝາຍ ແລະ ຄວາມຄືບໜ້າໃນການດັດສົມໂຮງງານຖ່ານດຳ-ຖ່ານຂາວ. ປະກອບຄໍາເຫັນກ່ຽວກັບຜົນສຳເລັດ ແລະ ຂໍ້ຫຍຸ້ງຍາກໃນການສ້າງເມືອງທ່າປາງທອງໃຫ້ກາຍເປັນເມືອງພົ້ນທຸກຕິດພັນກັບການຜັນຂະຫຍາຍຂໍ້ກຳນົດ 416/ຄລສພ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະພັກຮາກຖານກຸ່ມບ້ານ ແລະ ບ້ານໃຫຍ່, ປະກອບຄຳເຫັນກ່ຽວກັບວຽກງານສຶກສາປະຈຳປີ 2024, ການສົ່ງເສີມການຜະລິດເປັນສິນຄ້າ ເພື່ອທົດແທນການນຳເຂົ້າພາຍໃນເມືອງຊົນນະບູລີ, ປະກອບຄຳເຫັນກ່ຽວກັບວິທີການ ແລະ ມາດຕະການສະກັດກັ້ນບັນຫາການລັກລອບຂຸດຄົ້ນຄຳຕົກຂ້ອນພາຍໃນເມືອງເຊໂປນ, ວິລະບູລີ ແລະ ເມືອງພີນ, ພ້ອມນັ້ນບັນດາສະຫາຍຄະນະພັກແຂວງຍັງໄດ້ປະກອບຄຳເຫັນໃສ່ວຽກງານຕ່າງໆທີ່ນອນໃນຂອບເຂດການພັດທະນາເສດຖະກິດ-ສັງຄົມຂອງແຂວງ ຕື່ມອີກ.
ສໍາລັບຂົງເຂດເສດຖະກິດໂດຍໄດ້ສຸມໃສ່ການຈັດຕັ້ງປະຕິບັດບັນດາຕົວເລກຄາດໝາຍ ແລະ ມາດຕະການຕ່າງໆຕາມມະຕິກອງປະຊຸມສະພາກຳນົດໄວ້, ໂດຍສະເພາະການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍລວມແລ້ວເຫັນວ່າການພັດທະນາເສດຖະກິດມີທັງໝົດ 22 ຕົວຊີ້ວັດເຫັນວ່າມີຄວາມຄືບໜ້າດີຄາດວ່າຈະບັນລຸຕາມແຜນໄດ້, ການເຕີບໂຕທາງດ້ານເສດຖະກິດລວມຍອກຜະລິດຕະພັນພາຍໃນ (GDP) ຂະຫຍາຍຄົວຢູ່ໃນລະດັບ 7.9%, ລື່ນແຜນການທີ່ວາງໄວ້ 0.05% ດ້ວຍມູນຄ່າລາຄາໃນປີ 36,575.48 ຕື້ກີບ, ສະເລ່ຍຕໍ່ພົນລະເມືອງ 32.68 ລ້ານກີບເທົ່າກັບ 1,486 ໂດລາສະຫະລັດ, ສາມາດຈັດເກັບລາຍຮັບເຂົ້າງົບປະມານໄດ້ 4,282.40 ຕື້ກີບ, ລື່ນແຜນການທີ່ວາງໄວ້ 45,73% ຂອງແຜນການປີ, ເປັນເງິນ 1,343.72 ຕື້ກີບ.
ໃນນັ້ນ, ພູດຂອງສູນກາງປະຕິບັດໄດ້ 1,886.47 ຕື້ກີບ, ລື່ນແຜນການປີ 24.32% ເປັນເງິນ 369.04 ຕື້ກີບ, ພູດທ້ອງຖິ່ນປະຕິບັດໄດ້ 2,395.92 ຕື້ກີບ, ລື່ນແຜນການປີ 68.58% ເປັນເງິນ 974,67 ຕື້ກີບ; ດ້ານລາຍຈ່າຍສາມາດປະຕິບັດໄດ້ທັງໝົດ 1,223.13 ຕື້ກີບເທົ່າກັບ 100% ຮັບປະກັນການເບີກຈ່າຍເງິນເດືອນຕາມກຳນົດເວລາ, ໄດ້ດຸ່ນດ່ຽງງົບປະມານໃຫ້ສູນກາງທັງໝົດປີ 2024 ຈຳນວນ 420.72 ຕື້ກີບ, ວຽກງານການລົງທຶນທົ່ວສັງຄົມປະຕິບັດໄດ້ 7,334.70 ຕື້ກີບ ເທົ່າກັບ 98.66% ຂອງແຜນການປີ (7,434.40ຕື້ກີບ), ການລົງທຶນຂອງລັດທົ່ວແຂວງມີ 377 ໂຄງການ, ມູນຄ່າສະພາຮັບຮອງ 5,116.15 ຕື້ກີບ, ມູນຄ່າຕາມສັນຍາ 5,109.89 ຕື້ກີບ, ທົ່ວແຂວງຜະລິດເຂົ້າເປືອກໄດ້ທັງໝົດ 881,441 ໂຕນ, (ນາປີໄດ້ 747,325 ໂຕນ, ນາແຊງໄດ້ 134,116 ໂຕນ), ຜະລິດຊີ້ນ, ປາ, ໄຂ່ໄດ້ທັງໝົດ 99,901ໂຕນ; ການພັດທະນາຊົນນະບົດ ແລະ ລຶບລ້າງຄວາມທຸກຍາກ, ສາມາດສ້າງບ້ານພົ້ນທຸກໄດ້ 48 ບ້ານ, ເທົ່າກັບ 56.47%, (ແຜນການປີ 85 ບ້ານ), ສາມາດສ້າງຄອບຄົວພົ້ນທຸກໄດ້ 4,830 ຄອບຄົວ ເທົ່າກັບ 29.58% ຂອງແຜນການປີ, ທົ່ວແຂວງມີຄອບຄົວທີ່ພົ້ນທຸກແລ້ວ 156,370 ຄອບຄົວ, ແຜນສ້າງເມືອງພົ້ນທຸກໃຫ້ໄດ້ 4 ເມືອງ ແຕ່ປະຕິບັດໄດ້ 3 ເມືອງຄື: ເມືອງອາດສະພອນ, ທ່າປາງທອງ ແລະ ເມືອງຊົນນະບຸລີ.
(ແຫຼ່ງຂ່າວ: ສະຫວັນນະເຂດ)
ຄໍາເຫັນ