ດ່ານສາກົນ ຂົວມິດຕະພາບ 3 ຈັດກິດຈະກໍາປູກຕົ້ນຄູນ ເພື່ອຄວາມສວຍງາມ ແລະ ສີຂຽວຍືນຍົງ

ທ່ານ ພູຊະນະ ໄຊໂກສີ ໄດ້ກ່າວໃນພິທີຈັດກິດຈະກຳປູກຕົ້ນໄມ້ຄັ້ງນີ້ວ່າ: ດ່ານສາກົນຂົວມິດຕະພາບ 3 ຖືເປັນໜ້າຕາ ແລະ ເປັນປະຕູເສດຖະກິດ-ການທ່ອງທ່ຽວ ທີ່ສໍາຄັນຂອງແຂວງຄໍາມ່ວນ ກໍ່ຄືຂອງປະເທດຊາດ. ສະນັ້ນ, ການພັດທະນາດ່ານໃຫ້ມີຄວາມສະອາດ, ສວຍງາມ ແລະ ມີການບໍລິການທີ່ປະທັບໃຈ ມັນບໍ່ແມ່ນໜ້າທີ່ຂອງບຸກຄົນໃດໜຶ່ງ, ແຕ່ມັນແມ່ນຄວາມຮັບຜິດຊອບຮ່ວມກັນຂອງພວກເຮົາທຸກຄົນ ທີ່ອາໄສ ແລະ ເຄື່ອນໄຫວວຽກງານຢູ່ສະຖານທີ່ແຫ່ງນີ້. ກິດຈະກຳທີ່ພວກເຮົາຮ່ວມແຮງຮ່ວມໃຈກັນຈັດຂຶ້ນໃນມື້ນີ້ ແມ່ນມີຄວາມໝາຍຄວາມສໍາຄັນຢ່າງຍິ່ງ ເຊິ່ງກວມເອົາ 3 ວຽກງານຫຼັກຄື: 1). ການສ້າງພື້ນທີ່ສີຂຽວ ໂດຍການປູກຕົ້ນຄູນ ຈໍານວນ 40 ຕົ້ນ, ເພື່ອເພີ່ມຄວາມຮົ່ມເຢັນ ແລະ ສ້າງທັດສະນີຍະພາບທີ່ເປັນເອກະລັກ. ເມື່ອຕົ້ນຄຸນເຫຼົ່ານີ້ໃຫຍ່ເຕັມທີ່ ແລະ ອອກດອກສີເຫຼືອງສະຫງ່າງາມ, ມັນຈະກາຍເປັນ ພາບຄວາມປະທັບໃຈທໍາອິດ ໃຫ້ແກ່ຜູ້ເດີນທາງຜ່ານເຂົ້າ-ອອກດ່ານຂອງພວກເຮົາ, 2). ການປັບປຸງພື້ນຖານໂຄງລ່າງ ແລະ ສຸຂະອະນາໄມ ການບູລະນະສ້ອມແປງ ແລະ ປ່ຽນຖ່າຍຫົວຊັກໂຄກ ຫ້ອງນໍ້າສາທາລະນະ ເບື້ອງຂາເຂົ້າ-ຂາອອກ ຈໍານວນ 25 ຊຸດ. ນີ້ແມ່ນການຍົກສູງຄຸນນະພາບການບໍລິການຂັ້ນພື້ນຖານ ທີ່ພວກເຮົາຕ້ອງເອົາໃຈໃສ່ ເພື່ອຮັບປະກັນຄວາມສະອາດ ຖືກສຸຂະອະນາໄມ ແລະ ສ້າງຄວາມພາກພູມພໍໃຈ ໃຫ້ແກ່ສັງຄົມ ແລະ 3). ການສ້າງຄວາມເຂັ້ມແຂງດ້ານວິຊາສະເພາະ, ການກະກຽມເປີດກອງປະຊຸມເຜີຍແຜ່ດຳລັດເລກທີ 643/ລບ , ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະຄຸ້ມຄອງດ່ານ ເພື່ອໃຫ້ພະນັກງານທຸກສະຫາຍໄດ້ກຳແໜ້ນນິຕິກຳ, ຫັນເຂົ້າສູ່ລະບຽບຫຼັກການ ແລະ ປະສານງານກັນໄດ້ຢ່າງກົມກຽວ, ໂປ່ງໃສ ແລະ ມີປະສິດທິພາບສູງຂຶ້ນ.