ທັງນີ້, ດັດສະນີ PMI ທີ່ສູງກວ່າ 50 ຊີ້ບອກເຖິງການຂະຫຍາຍຕົວຂອງກິດຈະກຳທາງທຸລະກິດ, ໃນຂະນະທີ່ດັດສະນີຕໍ່າກວ່າ 50 ຊີ້ບອກເຖິງການຫົດຕົວ.
ຜົນໄດ້ຮັບໂດຍລວມຊີ້ໃຫ້ເຫັນວ່າ: ເສດຖະກິດອິນເດຍມີທ່າອ່ຽງທີ່ຈະຍັງເຂັ້ມແຂງໃນໄຕມາດນີ້, ຫຼັງຈາກຂະຫຍາຍຕົວ 7.8% ໃນເດືອນຕຸລາ-ເດືອນທັນວາ, ໂດຍໄດ້ຮັບແຮງຂັບເຄື່ອນຈາກການເຕີບໂຕ 13.3% ໃນຂະ ແໜງການຜະລິດ. ສໍາລັບປີງົບປະມານທີ່ຈະສິ້ນສຸດໃນເດືອນມີນານີ້, ຄາດວ່າເສດຖະກິດຂອງອິນເດຍຈະເຕີບໂຕ 7.6%.
ທ່ານ ປຣານຈຸລ ບານດາຣີ ຫົວໜ້ານັກເສດຖະສາດຂອງ ທະນາຄານ HSBC ປະຈຳອິນເດຍກ່າວວ່າ: ດັດຊະນີ PMI ຂະແໜງການຜະລິດຂັ້ນສຸດທ້າຍຂອງອິນເດຍສະທ້ອນໃຫ້ເຫັນເຖິງການເລັ່ງຂອງກິດຈະກຳການຜະລິດໃນເດືອນກຸມພາຜ່ານມາ, ໂດຍຜົນຜະລິດຂະຫຍາຍຕົວໃນອັດຕາທີ່ໄວຂຶ້ນເປັນເດືອນທີສອງຕິດຕໍ່ກັນ ຊຶ່ງໄດ້ຮັບການສະໜັບສະໜູນຈາກຄຳສັ່ງຊື້ພາຍໃນປະເທດທີ່ເຂັ້ມແຂງຂຶ້ນ. ຢ່າງໃດກໍຕາມ, ການເຕີບໂຕຂອງຄຳສັ່ງຊື້ເພື່ອສົ່ງອອກໃໝ່ມີທ່າອ່ຽງສືບຕໍ່ຊ້າລົງຕັ້ງແຕ່ກາງປີ 2025 ຊຶ່ງເປັນປັດໄຈທີ່ຈໍາກັດການສ້າງວຽກເຮັດງານທໍາໃນຂະແໜງການຜະລິດ.
ຈຳນວນຄຳສັ່ງຊື້ເພື່ອສົ່ງອອກໃໝ່ຂະຫຍາຍຕົວໃນອັດຕາທີ່ຊ້າທີ່ສຸດໃນຮອບ 17 ເດືອນ ຊຶ່ງຊີ້ໃຫ້ເຫັນວ່າຄວາມບໍ່ແນ່ນອນກ່ຽວກັບພາສີຂອງ ສະຫະລັດ ອາເມຣິກາ ຍັງຄົງຢູ່ ເຖິງວ່າຈະມີຂໍ້ຕົກລົງການຄ້າກັບອິນເດຍກໍຕາມ. ໂດຍການສຳຫຼວດດັ່ງກ່າວໄດ້ດຳເນີນລະຫວ່າງວັນທີ 9-23 ກຸມພາ ຜ່ານມາ, ຫຼັງຈາກ ສະຫະລັດ ອາເມຣິກາ ໄດ້ຫຼຸດພາສີສິນຄ້ານຳເຂົ້າຂອງອິນເດຍລົງເປັນ 18% ຈາກ 50%. ຢ່າງໃດກໍຕາມ, ໃນອາທິດທີ່ຜ່ານມາ ທ່ານ ໂດໂນ ທຣໍາ ປະທານາທິບໍດີ ສະຫະລັດ ອາເມຣິກາ ໄດ້ປະກາດພາສີທົ່ວໂລກຄັ້ງໃໝ່ຫຼັງຈາກສານສູງສຸດໄດ້ຕັດສິນໃຫ້ໂຈະບາງສ່ວນຂອງພາສີເຫຼົ່ານັ້ນ.
ໃນທາງກົງກັນຂ້າມ, ຈຳນວນຄຳສັ່ງຊື້ໃໝ່ ຊຶ່ງເປັນເຄື່ອງວັດແທກທີ່ສຳຄັນຂອງຄວາມຕ້ອງການໄດ້ເພີ່ມຂຶ້ນໃນອັດຕາທີ່ເຂັ້ມແຂງທີ່ສຸດນັບຕັ້ງແຕ່ເດືອນຕຸລາ, ໃນຂະນະທີ່ການຜະລິດເພີ່ມຂຶ້ນໃນອັດຕາທີ່ໄວທີ່ສຸດໃນຮອບ 4 ເດືອນ. ຂະແໜງທຸລະກິດລະບຸວ່າ: ການເພີ່ມຂຶ້ນແມ່ນໄດ້ຮັບຜົນປະໂຫຍດຈາກການຜະລິດທີ່ເພີ່ມຂຶ້ນ, ຄວາມຕ້ອງການທີ່ເຂັ້ມແຂງ ແລະ ການລົງທຶນດ້ານເຕັກໂນໂລຊີ.
ໃນດ້ານລາຄາ, ອັດຕາເງິນເຟີ້ດ້ານຕົ້ນທຶນປັດໄຈການຜະລິດຍັງຄົງຢູ່ໃນລະດັບປານກາງ ແລະ ບໍ່ປ່ຽນແປງຈາກເດືອນມັງກອນ, ແຕ່ຜູ້ຜະລິດໄດ້ຂຶ້ນລາຄາຂາຍໃນອັດຕາທີ່ໄວທີ່ສຸດໃນຮອບ 4 ເດືອນ ເນື່ອງຈາກຄວາມຕ້ອງການທີ່ເຂັ້ມແຂງຊ່ວຍເປີດໂອກາດໃຫ້ສາມາດສົ່ງຕໍ່ຕົ້ນທຶນທີ່ເພີ່ມຂຶ້ນໃຫ້ກັບຜູ້ຊື້.
ດ້ານການຈ້າງງານເພີ່ມຂຶ້ນສູ່ລະດັບສູງສຸດໃນຮອບ 4 ເດືອນ, ແຕ່ຍັງຄົງເປັນການຂະຫຍາຍຕົວພຽງເລັກນ້ອຍ, ໂດຍມີບໍລິສັດພຽງແຕ່ 4% ທີ່ລາຍງານການຈ້າງງານໃໝ່ ແລະ ສ່ວນໃຫຍ່ບໍ່ມີການປ່ຽນແປງດ້ານຈຳນວນພະນັກງານ. ສ່ວນຄວາມໝັ້ນໃຈຂອງຜູ້ປະກອບການຕໍ່ການດຳເນີນທຸລະກິດໃນປີທີ່ຈະມາເຖິງໄດ້ປັບດີຂຶ້ນສູ່ລະດັບສູງສຸດໃນຮອບ 4ເດືອນ ຊຶ່ງຊີ້ບອກເຖິງທ່າອ່ຽງການເຕີບໂຕທາງເສດຖະກິດທີ່ເຂັ້ມແຂງ ເຖິງວ່າຈະມີຄວາມຕ້ອງການພາຍນອກທີ່ຊ້າລົງ ກໍຕາມ.
ຄໍາເຫັນ