ເປີດເຜີຍວ່າ: ເດືອນພະຈິກປີ 2024 ເປັນເດືອນພະຈິກທີ່ຮ້ອນຫຼາຍທີ່ສຸດເປັນອັນດັບສອງຂອງໂລກ ຊຶ່ງສອດຄ່ອງກັບການຄາດຄະເນວ່າປີ 2024 ຈະເປັນປີທີ່ຮ້ອນທີ່ສຸດເທົ່າທີ່ເຄີຍບັນທຶກໄວ້.
C3S ລະບຸວ່າ: ເດືອນພະຈິກ 2024 ມີອຸນຫະພູມສູງກວ່າລະດັບກ່ອນຍຸກອຸດສາຫະກຳ 1.62 ອົງສາເປັນຮອງພຽງແຕ່ເດືອນພະຈິກ 2023.
ຖະແຫຼງການຈາກ C3S ລະບຸວ່າ: ປັດຈຸບັນແນ່ນອນແລ້ວວ່າ ປີ 2024 ຈະເປັນປີທີ່ມີອຸນຫະພູມຮ້ອນທີ່ສຸດເທົ່າທີ່ເຄີຍບັນທຶກໄວ້ ແລະ ສູງກວ່າລະດັບກ່ອນຍຸກອຸດສາຫະກຳ 1.5 ອົງສາ, ໂດຍຜົນການສຶກສາດັ່ງກ່າວອີງໃສ່ຊຸດຂໍ້ມູນທີ່ໃຊ້ກວດວັດແທກຫຼາຍພັນລ້ານຄັ້ງຈາກດາວທຽມ,ເຮືອບິນແລະສະຖານີກວດສອບສະພາບອາກາດທົ່ວໂລກ.
ທ່ານ ສະແມນທາ ເບີເກສ ຮອງຜູ້ອຳນວຍການ ສຳນັກງານC3S ກ່າວວ່າ: ຂໍ້ມູນປີ 2024 ບໍ່ໄດ້ໝາຍຄວາມວ່າສັນຍາປາຣີ(Paris Agreement)ໄດ້ຖືກລະເມີດ, ແຕ່ມັນໝາຍຄວາມວ່າຈຳເປັນຕ້ອງມີການດໍາເນີນການດ້ານສະພາບອາກາດທີ່ຮີບດ່ວນກວ່າທີ່ເຄີຍມີມາ.
ສັນຍາປາຣີມີເປົ້າໝາຍຄວບຄຸມການເພີ່ມຂຶ້ນຂອງອຸນຫະພູມສະເລ່ຍຂອງໂລກໃຫ້ຕໍ່າກວ່າ 2 ອົງສາ ທຽບຈາກກ່ອນຍຸກອຸດສາຫະກຳແລະພະຍາຍາມຄວບຄຸມບໍ່ໃຫ້ກາຍ 1.5 ອົງສາໃນທ້າຍສະຕະວັດນີ້. ແຕ່ເປົ້າໝາຍເຫຼົ່ານີ້ແມ່ນອີງໃສ່ອຸນຫະພູມສະເລ່ຍທົ່ວໂລກໃນຮອບ 20 ປີ ຫຼື 30 ປີ ຫຼາຍກວ່າການຜັນແປຂອງປີ.
C3Sກ່າວວ່າ: ຂະໜາດນ້ຳກ້ອນໃນທະເລ Antarcticໄດ້ບັນລຸລະດັບຕ່ຳທີ່ສຸດໃນເດືອນພະຈິກ ຜ່ານມາໂດຍຕໍ່າກວ່າຄ່າສະເລ່ຍ 10% ຊຶ່ງຍັງຄົງຜິດປົກກະຕິຢ່າງຕໍ່ເນື່ອງຕະຫຼອດ 2023 ແລະ 2024.
C3Sກ່າວຕື່ມວ່າ: ເດືອນພະຈິກ ຜ່ານມາ ເປັນເດືອນທີ 16 ໃນໄລຍະ 17 ເດືອນທີ່ອຸນຫະພູມອາກາດສະເລ່ຍຂອງພື້ນຜີວໂລກສູງກວ່າລະດັບກ່ອນຍຸກອຸດສາຫະກຳ 1.5 ອົງສາເຊ.
ຄໍາເຫັນ