ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ອົງການອຸຕຸນິຍົມວິທະຍາໂລກ (WMO) ໄດ້ເປີດເຜີຍບົດລາຍງານການຄາດຄະເນວ່າ: ມີໂອກາດປະມານ 1 ໃນ 3 ທີ່ສະພາບອາກາດຂອງປີ 2024 ຈະຮ້ອນກວ່າປີ 2023 ແລະ ມີໂອກາດສູງເຖິງ 99% ທີ່ສະພາບອາກາດຂອງປີ 2024 ຈະຢູ່ໃນກຸ່ມສະພາບອາກາດຮ້ອນທີ່ສຸດ.
ຂະນະດຽວກັນ, WMO ວັດແທກອຸນຫະພູມສະເລ່ຍລາຍເດືອນ ລະຫວ່າງເດືອນມິຖຸນາ-ທັນວາ 2023 ຜ່ານມາ ສູງເປັນສະຖິຕິທຸກເດືອນ ໂດຍສະເພາະຢ່າງຍິ່ງອຸນຫະພູມຂອງເດືອນກໍລະກົດ ແລະ ເດືອນສິງຫາ 2023 ຊຶ່ງສູງເປັນປະຫວັດສາດສຳລັບເດືອນດັ່ງກ່າວ ແລະ ໃນປີນີ້ຍັງຄົງມີຄວາມເປັນໄປໄດ້ວ່າອຸນຫະພູມໃນແຕ່ລະເດືອນຈະຍັງຄົງສູງຂຶ້ນ ເນື່ອງຈາກປະກົດການແອວນີໂຢ. ທັງນີ້, ອຸນຫະພູມສະເລ່ຍຂອງໂລກໃນປີ 2023 ສູງກວ່າໃນໄລຍະເວລາກ່ອນຍຸກການປະຕິວັດອຸດສາຫະກຳ ປະມານ 1,45 ອົງສາ ໂດຍອີງຕາມຂໍ້ມູນຂອງ WMO. ທາງດ້ານບົດລາຍງານອົງການບໍລິຫານການບິນ ແລະ ອາວະກາດແຫ່ງຊາດ (NASA) ລະບຸວ່າ: ອຸນຫະພູມສະເລ່ຍຂອງໂລກໃນປີ 2023 ສູງກວ່າຄ່າສະເລ່ຍຂອງສະຕະວັດທີ 20 ປະມານ 1,18 ອົງສາ ແລະ ສູງກວ່າປີ 2016 ຊຶ່ງເປັນປີທີ່ຮ້ອນທີ່ສຸດເປັນປະຫວັດສາດ 0,15 ອົງສາ ໂດຍພາກພື້ນອາກຕິກ, ອາເມຣິກາເໜືອ, ອາຊີກາງ ແລະ ແອດແລນຕິກເໜືອ ເປັນພາກພື້ນທີ່ມີສະພາບອາກາດຮ້ອນຂຶ້ນຢ່າງຕໍ່ເນື່ອງ.
ນອກຈາກນີ້, NASA ຄາດວ່າ: ມີໂອກາດ 50% ທີ່ສະພາບອາກາດໂລກໃນປີນີ້ອຸ່ນຂຶ້ນ ແລະ ມີໂອກາດ 50% ທີ່ສະພາບອາກາດໂລກໃນປີນີ້ຈະເຢັນກວ່າປີຜ່ານມາ.
ຄໍາເຫັນ