ຂ່າວຕ່າງປະເທດລາຍງານ ໃນວັນທີ 8 ພະຈິກ ຜ່ານມາ, ອົງການອຸຕຸນິຍົມວິທະຍາໂລກ (WMO) ໄດ້ເປີດເຜີຍບົດລາຍງານໂດຍລະບຸວ່າ: ປະກົດການແອວນີໂຢ ຈະເພີ່ມຄວາມຮຸນແຮງຢ່າງຕໍ່ເນື່ອງ ແລະ ຈະຍັງຄົງຢູ່ໄປຈົນເຖິງເດືອນເມສາ 2024 ເປັນຢ່າງໜ້ອຍ.
ປາກົດການແອວນີໂຢ ຊຶ່ງກໍ່ຕົວຂຶ້ນຢ່າງວ່ອງໄວໃນລະຫວ່າງເດືອນກໍລະກົດ-ສິງຫາ ຜ່ານມາ ມີທ່າອ່ຽງເພີ່ມຄວາມຮຸນແຮງຂຶ້ນອີກນັບຕັ້ງແຕ່ນີ້ໄປຈົນເຖິງເດືອນມັງກອນ 2024. ຂະນະດຽວກັນ, WMO ໄດ້ຄາດຄະເນວ່າ: ໂອກາດ 90% ທີ່ປະກົດການແອວນີໂຢຈະຍັງຄົງຢູ່ໃນໄລຍະລະດູໜາວສຳລັບຊີກໂລກ ເໜືອ ແລະ ລະດູຮ້ອນສຳລັບຊີກໂລກໃຕ້ ຊຶ່ງກຳລັງຈະເກີດຂຶ້ນໃນອີກບໍ່ດົນນີ້ ແລະ ຜົນກະທົບຈາກຄວາມຮຸນແຮງຂອງແອວນີໂຢອາດຈະແກ່ຍາວເວລາໄປຈົນເຖິງເດືອນເມສາ 2024 ເປັນຢ່າງໜ້ອຍ. ທັງນີ້, ແອວນີໂຢເປັນປະກົດການທຳມະຊາດ ຊຶ່ງເກີດຂຶ້ນທຸກ 2 ປີ ຫຼື 7 ປີ ໂດຍຜົນກະທົບຊັດເຈນຄືການທີ່ໂລກຈະມີອຸນຫະພູມສູງຂຶ້ນພາຍໃນໄລຍະເວລາ 1 ປີ ຫຼັງຈາກການກໍ່ຕົວຂອງແອວນີໂຢ ເທົ່າກັບວ່າໃນທາງທິດສະດີ ຄວາມຊັດເຈນຂອງຜົນກະທົບຈາກແອວນີໂຢຈະສາມາດສຳຜັດໄດ້ເມື່ອເຂົ້າສູ່ປີ 2024.
ເຖິງຢ່າງໃດກໍຕາມ, WMO ເຕືອນວ່າ: ສະຖານະການແອວນີໂຢຮອບນີ້ມີຄວາມຮຸນແຮງຫຼາຍຂຶ້ນ ເນື່ອງຈາກພາວະການປ່ຽນແປງຂອງສະພາບອາກາດໂລກທີ່ເປັນຜົນຈາກສີມືຂອງມະນຸດ. ອີກຢ່າງໜຶ່ງ, ປາກົດການແອວນີໂຢຮອບຫຼ້າສຸດເກີດຂຶ້ນລະຫວ່າງປີ 2018-2019 ຫຼັງຈາກນັ້ນນຳມາດ້ວຍລານີຢາ ຊຶ່ງຫາກໍສິ້ນສຸດໃນໄລຍະຕົ້ນປີນີ້.
ຄໍາເຫັນ