ແອັສປາຍ ກຽມສະໜັບສະໜູນທຶນ 900 ລ້ານເອີໂຣ ເພື່ອໂຄງການໄຮໂດຣເຈນສີຂຽວ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ເປໂຕຣ ຊານເຊດ ນາຍົກລັດຖະມົນຕີແອັສປາຍໄດ້ປະກາດບົດລາຍງານ ໂດຍລະບຸວ່າ: ແຜນການຈັດສັນເງິນມູນຄ່າເກືອບ 900 ລ້ານເອີໂຣ ເພື່ອເປັນທຶນສະໜັບສະໜູນໃຫ້ກັບ 10 ໂຄງການສຳລັບການຜະລິດ, ການຂົນສົ່ງ ແລະ ການພັດທະນາພະລັງງານໄຮໂດຣເຈນໝູນວຽນ ຊຶ່ງຈຸດປະສົງຂອງໂຄງການເຫຼົ່ານີ້ຄືການສ້າງລະບົບນິເວດອຸດສາຫະກຳທີ່ແນ່ນອນ ເພື່ອສົ່ງເສີມການສ້າງຕ່ອງໂຊ້ຄຸນຄ່າທີ່ກຳລັງຟື້ນຟູອຸດສາຫະກຳຂອງແອັສປາຍ.
    ທ່ານ ຊານເຊດ ໄດ້ເປີດເຜີຍແຜນການດັ່ງກ່າວໃນພິທີເປີດງານມະຫະກຳພະລັງງານ ແລະ ສິ່ງແວດລ້ອມນາໆຊາດຄັ້ງທີ 27 ໃນນະຄອນຫຼວງມາດຣິດ ຊຶ່ງດຶງດູດຜູ້ຈັດສະແດງເຖິງ 500 ຄົນຈາກທົ່ວໂລກ. ທ່ານເນັ້ນຢ້ຳເຖິງອຸດສາຫະກຳການຜະລິດເຄື່ອງເອເລັກໂຕຣໄລເຊີ (ເຄື່ອງແຍກນໍ້າໃຫ້ເປັນ Oxygen ແລະ Hydrogen)ທີ່ກຳລັງຂະຫຍາຍຕົວ, ການຜະລິດພະລັງງານໄຮໂດຣເຈນໝູນວຽນ ແລະ ການນຳໄປປະຍຸກໃຊ້ເພື່ອຫຼຸດການປ່ອຍກາກບອນໃນພາກການຜະລິດ ແລະ ການຂົນສົ່ງລວມເຖິງການສົ່ງອອກໄປຍັງກຸ່ມປະເທດເອີຣົບ ແລະ ອື່ນໆ. ພາກພະລັງງານໝູນວຽນໄດ້ຊ່ວຍສ້າງຕຳແໜ່ງງານຫຼາຍກວ່າ 50.000 ອັດຕາໃນແອັສປາຍໃນໄລຍະ 5 ປີຜ່ານມາ ໂດຍຂະນະນີ້ມີຜູ້ຄົນເຮັດວຽກໃນພາກດັ່ງກ່າວ 130.000 ຄົນ ແລະ ອາດຈະຫຼາຍກວ່າ 500.000 ຄົນພາຍໃນປີ 2030. ແອັສປາຍມີໂອກາດພິເສດໃນການໃຊ້ປະໂຫຍດຈາກພະລັງງານໝູນວຽນ ໂດຍໄຟຟ້າຂອງແອັສປາຍຫຼາຍກວ່າ 80% ຈະມາຈາກແຫຼ່ງເຫຼົ່ານີ້ພາຍໃນປີ 2030 ຊຶ່ງຊ່ວຍໃຫ້ຍົກເລີກການອາໄສເຊື້ອໄຟຟອດຊິວ ເສີມສ້າງຄວາມເປັນອິດສະຫຼະດ້ານພະລັງງານ ແລະ ປ້ອງກັນການເສຍຊີວິດທີ່ເກີດຈາກມົນລະພິດ.
    ທາງການແອັສປາຍລະບຸວ່າ: ໄຟຟ້າຂອງແອັສປາຍກວ່າເຄິ່ງໜຶ່ງມາຈາກແຫຼ່ງພະລັງງານໝູນວຽນໃນປີ 2023 ຊຶ່ງຊ່ວຍຫຼຸດການປ່ອຍແກັສກາກບອນໄດອອກຊິດຈາກການຜະລິດໄຟຟ້າຫຼາຍກວ່າ 50% ເມື່ອທຽບກັບປີ 2018.