ຂ່າວຕ່າງປະເທດລາຍງານ ໃນວັນທີ 6 ທັນວາ ຜ່ານມາ, ລັດຖະສະພາເອີຣົບ (EP) ແລະ ປະເທດສະມາຊິກສະຫະພາບເອີຣົບ (EU) ໄດ້ເປີດເຜີຍບົດລາຍງານໂດຍປະກາດກົດລະບຽບໃໝ່ເພື່ອສະກັດກັ້ນ Fast Fashion ຫຼື ເສື້ອຜ້າຕາມກະແສນິຍົມ ທີ່ເນັ້ນໃສ່ພຽງບໍ່ເທົ່າໃດຄັ້ງ ແລະ ຫຼຸດຜ່ອນຂີ້ເຫຍື້ອ ຊຶ່ງລວມເຖິງການທຳລາຍເສື້ອຜ້າທີ່ຂາຍບໍ່ອອກ.
ບົດລາຍງານລະບຸວ່າ: ກົດໝາຍໃໝ່ດັ່ງກ່າວ ໄດ້ຮັບການສະເໜີເປັນຄັ້ງທຳອິດ ໂດຍຄະນະກຳມາທິການເອີຣົບ (EC) ເມື່ອປີຜ່ານມາ ກຳນົດກົດເກນທີ່ເຂັ້ມງວດຫຼາຍຂຶ້ນ ເພື່ອເຮັດໃຫ້ແນ່ໃຈວ່າຜະລິດຕະພັນຕ່າງໆຈະມີອາຍຸການໃຊ້ງານທີ່ຍາວນານກວ່າເກົ່າ ລວມທັງງ່າຍຕໍ່ການຊ່ອມແຊມ ແລະ ການ Recycle. ທັງນີ້, ກົດໝາຍດັ່ງກ່າວຈະຫ້າມການທຳລາຍສິ່ງຕ່ຳແຜ່ນ ແລະ ເກີບທີ່ຂາຍບໍ່ອອກ ແລະ ມີຜົນບັງຄັບໃຊ້ 2 ປີ ໂດຍບໍລິສັດຂະໜາດກາງຈະໄດ້ຮັບການຍົກເວັ້ນ 6 ປີ ສ່ວນບໍລິສັດຂະໜາດນ້ອຍຈະໄດ້ຮັບການຍົກເວັ້ນທັງໝົດຈາກຄຳສັ່ງດັ່ງກ່າວ. ເຖິງຢ່າງໃດກໍຕາມ, EC ມີອຳນາດທີ່ຈະເພີ່ມຂອບຂອງຄຳສັ່ງໃຫ້ຄວບຄຸມຜະລິດຕະພັນອື່ນໆທີ່ຕົກຄ້າງຢູ່ໃນສາງສິນຄ້າ ນອກເໜືອຈາກເສື້ອຜ້າ ແລະ ເກີບກໍເຊັ່ນດຽວກັນ. ທ່ານນາງ ອະເລສ ຊານດຣາ ໂມເຣດຕີ ສະມາຊິກຂອງ EP ແລະ ຜູ້ນຳການອອກກົດໝາຍດັ່ງກ່າວຜ່ານລັດຖະສະຖາເອີຣົບ ກ່າວວ່າ: ຜະລິດຕະພັນໃໝ່ຈະໄດ້ຮັບການອອກແບບໃນລັກສະນະທີ່ເປັນປະໂຫຍດຕໍ່ທຸກຄົນ ເຄົາລົບໂລກຂອງເຮົາ ແລະ ປົກປ້ອງສິ່ງແວດລ້ອມ. ອີກຢ່າງໜຶ່ງ, ກົດໝາຍໃໝ່ຈະລະບຸເຖິງຂໍ້ກຳນົດສະເພາະສຳລັບສິນຄ້າອຸປະໂພກບໍໍລິໂພກທີ່ສຳຄັນ ເພື່ອເພີ່ມຄວາມທົນທານຂອງຜະລິດຕະພັນ ໂດຍຈະໃຫ້ຄວາມສຳຄັນກັບຜະລິດຕະພັນທີ່ມີຜົນກະທົບສູງບໍ່ວ່າຈະເປັນເສື້ອຜ້າ, ເຟີນີເຈີ, ບ່ອນນອນ ລວມເຖິງສິນຄ້າເອເລັກໂຕຣນິກຄ່າງໆ.
ພາຍໃຕ້ກົດລະບຽບໃໝ່ນີ້, ບໍລິສັດຂະໜາດໃຫຍ່ຈະຕ້ອງລາຍງານເປັນປະຈຳທຸກປີ ວ່າພວກເຂົາຖິ້ມຜະລິດຕະພັນຂອງບໍລິສັດໄປຫຼາຍໜ້ອຍປານໃດພ້ອມທັງເຫດຜົນ ຊຶ່ງ EU ຫວັງວ່າ ສິ່ງນີ້ຈະສົ່ງເສີມໃຫ້ບໍໍລິສັດເຫຼົ່ານັ້ນຍົກເລີກການດຳເນີນການຂ້າງເທິງ.
ຄໍາເຫັນ