ຂ່າວຕ່າງປະເທດລາຍງານ ເມື່ອຕົ້ນອາທິດຜ່ານມາ, ສຳນັກງານສິ່ງແວດລ້ອມແຫ່ງສະຫະພາບເອີຣົບ (EEA) ໄດ້ເປີດເຜີຍບົດລາຍງານໂດຍລະບຸວ່າ: ປັດຈຸບັນມົນລະພິດທາງອາກາດເປັນປັດໄຈສ່ຽງດ້ານອະນາໄມສິ່ງແວດລ້ອມທີ່ສຳຄັນທີ່ສຸດໃນເອີຣົບ ໂດຍຄວາມເຂັ້ມຂອງມົນລະພິດທາງອາກາດໃນປີ 2021 ຍັງຄົງສູງເກີນລະດັບທີ່ອົງການອະນາໄມໂລກ (WHO) ແນະນຳໃນການປະຕິບັດກ່ຽວກັບຄຸນນະພາບອາກາດ.
ບົດລາຍງານລະບຸວ່າ: ການຫຼຸດມົນລະພິດທາງອາກາດສູ່ລະດັບຕາມການປະຕິບັດຂ້າງເທິງຈະປ້ອງກັນການເສຍຊີວິດໃນປະເທດສະມາຊິກສະຫະພາບເອີຣົບ ຫຼັງຈາກສະຫະພາບເອີຣົບມີການເສຍຊີວິດເນື່ອງຈາກມົນລະພິດທາງອາກາດ 3 ປະເພດ ໄດ້ແກ່ຝຸ່ນລະອອງຂະໜາດນ້ອຍ, ໂອໂຊນ ແລະ ໄນໂຕຣເຈນໄດອອກຊາຍ ຫຼາຍກວ່າ 320.000 ຄົນໃນປີ 2021. ຈຳນວນການເສຍຊີວິດດັ່ງກ່າວແບ່ງເປັນການເສຍຊີວິດເນື່ອງຈາກມົນລະພິດຈາກຝຸ່ນລະອອງຂະໜາດນ້ອຍ ຫຼື ຝຸ່ນ PM2.5 ປະມານ 253.000 ຄົນ ມົນລະພິດຈາກໄນໂຕຣເຈນໄດອອກຊາຍ 52.000 ຄົນ, ມົນລະພິດຈາກການສຳຜັດໂອໂຊນໄລຍະສັ້ນ 22.000 ຄົນ. ເຖິງຢ່າງໃດກໍຕາມ, ຈຳນວນການເສຍຊີວິດເນື່ອງຈາກມົນລະພິດທາງອາກາດທົ່ວເອີຣົບໃນປີ 2021 ສູງເຖິງ 389.000 ຄົນ ຖ້າຫາກນັບລວມໂຕເລກຂອງກຸ່ມປະເທດເອີຣົບທີ່ຢູ່ນອກສະຫະພາບເອີຣົບດ້ວຍ.
EEA ກ່າວຕື່ມວ່າ: ການສຳຜັດມົນລະພິດທາງອາກາດເຮັດໃຫ້ເກີດ ຫຼື ເຮັດໃຫ້ບາງພະຍາດເພີ່ມທະວີຄວາມຮຸນແຮງຍິ່ງຂຶ້ນເຊັ່ນ: ພະຍາດມະເຮັງ, ພະຍາດຫົວໃຈ, ພະຍາດຫອບຫືດ ແລະ ພະຍາດເບົາຫວານ ຖ້າຫາກພິຈາລະນາຈາກການປະເມີນຜົນກະທົບຕໍ່ສຸຂະພາບສະບັບໃໝ່.
ຄໍາເຫັນ