ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ຄິນານ ມາກອສ ຈູເນຍ ປະທານາທິບໍດີຟີລິບປິນ ໄດ້ອະນຸມັດໃຫ້ເພີ່ມເວລາການຫຼຸດພາສີການນຳເຂົ້າເຂົ້າ ແລະ ສິນຄ້າອາຫານປະເພດອື່ນໆຈົນເຖິງທ້າຍປີ 2024 ເພື່ອຮັກສາສະຖຽນລະພາບຂອງລາຄາອາຫານເຫຼົ່ານີ້.
ທັງນີ້, ຟີລິບປິນໄດ້ອະນຸມັດໃຫ້ຫຼຸດພາສີນຳເຂົ້າເຂົ້າ ແລະ ສິນຄ້າອາຫານປະເພດອື່ນໆຄັ້ງທຳອິດໃນປີ 2021 ກ່ອນຈະເພີ່ມເວລາມາຈົນເຖິງປີນີ້ ເນື່ອງຈາກເງິນເຟີ້ສູງ ແລະ ຕໍ່ມາ ທ່ານ ມາກອສ ລະບຸວ່າ: ຟີລິບປິນຈຳເປັນຕ້ອງເພີ່ມເວລາມາດຕະການດັ່ງກ່າວອອກໄປອີກຄັ້ງຈົນເຖິງທ້າຍປີ 2024. ທ່ານກ່າວວ່າ: ພາວະເສດຖະກິດໃນປັດຈຸບັນເປັນເຫດຜົນທີ່ເຮັດໃຫ້ຟີລິບປິນດຳເນີນການຫຼຸດພາສີການນຳເຂົ້າເຂົ້າ, ເຂົ້າສາລີ ແລະ ຊີ້ນໝູ ເພື່ອຮັກສາລາຄາສິນຄ້າໃຫ້ຢູ່ໃນລະດັບທີ່ສາມາດຈັບຕ້ອງໄດ້ ແລະ ຮັບປະກັນຄວາມໝັ້ນຄົງທາງດ້ານອາຫານ. ໃນເດືອນພະຈິກ ເງິນເຟີ້ຟີລິບປິນຢູ່ທີ່ 4,1% ຊຶ່ງຫຼຸດລົງຕິດຕໍ່ກັນເປັນເດືອນທີ 2 ແຕ່ສະເລ່ຍຢູ່ທີ່ 6,2% ໃນໄລຍະ 11 ເດືອນທຳອິດຂອງປີ 2023 ຊຶ່ງສູງກວ່າເປົ້າໝາຍ 2%-4% ສຳລັບປີນີ້ຂອງທະນາຄານກາງຟີລິບປິນຢ່າງຫຼວງຫຼາຍ. ທ່ານລະບຸວ່າ: ການເພີ່ມເວລາຫຼຸດພາສີນຳເຂົ້າອາຫານ ມີຈຸດປະສົງເພື່ອຮັບປະກັນວ່າເຂົ້າ, ເຂົ້າສາລີ ແລະ ຜະລິດຕະພັນຈາກຊີ້ນສັດຈະຍັງຄົງມີລາຄາທີ່ຖືກລົງ ໃນຂະນະທີ່ສ່ຽງຈະໄດ້ຮັບຜົນກະທົບຈາກໄພແຫ້ງແລ້ງທີ່ເປັນຜົນພວງຂອງປະກົດການແອວນີໂຢໃນໄລຍະຕົ້ນປີໜ້າ ແລະ ຄວາມສ່ຽງແບບຕໍ່ເນື່ອງຈາກການແຜ່ລະບາດຂອງພະຍາດອະຫິວາອາຟຣິກາ.
ອັດຕາພາສີນຳເຂົ້າເຂົ້າ ຈະຢູ່ທີ່ 35% ຂະນະທີ່ພາສີການນຳເຂົ້າເຂົ້າສາລີ ຈະຢູ່ທີ່ 5%-15% ສ່ວນພາສີນຳເຂົ້າຜະລິດຕະພັນຊີ້ນໝູ ຈະຢູ່ທີ່ 15%-25%.
ຄໍາເຫັນ