ຟີລິບປິນ ຕັ້ງເປົ້າໝາຍຜະລິດແຮງງານທັກສະລະດັບສູງດ້ານ Semiconductors

ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ເຟີດິນານ ມາກອສ ຈູເນຍ ປະທານາທິບໍດີຟີລິບປິນໄດ້ເປີດເຜີຍບົດລາຍງານໂດຍລະບຸວ່າ: ຟີລິບປິນມີຄວາມພ້ອມໃນການຜະລິດຜູ້ທີ່ມີຄວາມສາມາດທີ່ແຂ່ງແກ່ງ ຊຶ່ງປະກອບດ້ວຍຜູ້ຊ່ຽວຊານດ້ານເຄື່ອງຊັກນຳໄຟຟ້າ(Semiconductors) ຈຳນວນ 128.000 ຄົນ ໃນຈຳນວນນີ້ລວມເຖິງວິສາວະກອນ ແລະ ຊ່າງເຕັກນິກພາຍໃນປີ 2028.
    ທ່ານ ມາກອສ ຈູເນຍ ກ່າວວ່າ: ຟີລິບປິນພ້ອມຕອບສະໜອງຄວາມຕ້ອງການທີ່ເພີ່ມຂຶ້ນຂອງອຸດສາຫະກຳເຕັກໂນໂລຊີຂັ້ນສູງໃນລະຫວ່າງການເຂົ້າຢ້ຽມຢາມຄະນະຜູ້ແທນລະດັບສູງຈາກລັດຖະບານອາເມຣິກາ ແລະ ຄະນະຜູ້ແທນດ້ານການຄ້າ ແລະ ການລົງທຶນ ຊຶ່ງນຳໂດຍທ່ານນາງ ຈີນາ ໄຣມອນໂດ ລັດຖະມົນຕີການຄ້າອາເມຣິກາທີ່ທຳນຽບມາລາກັນຍັງ ໃນນະຄອນຫຼວງມະນິລາ. ປັດຈຸບັນ, ພາກ Semiconductors ແລະ ເອເລັກໂຕຣນິກສົ່ງອອກສິນຄ້າເປັນອັນດັບຕົ້ນໆຂອງຟີລິບປິນ ຊຶ່ງຄິດເປັນປະມານ 60% ຂອງການສົ່ງອອກສິນຄ້າທັງໝົດ. ທັງນີ້, ຟີລິບປິນໄດ້ຮັບການຍອມຮັບວ່າ ມີບົດບາດສຳຄັນໃນຕ່ອງໂຊ້ Semiconductors ລະດັບໂລກ ໂດຍສະເພາະໃນດ້ານການປະກອບ ແລະ ບັນຈຸອຸປະກອນ.
    ທ່ານ ມາກອສ ຈູເນຍ ກ່າວວ່າ: ຟີລິບປິນມຸ່ງເນັ້ນການມີບົດບາດສຳຄັນເພີ່ມຂຶ້ນ ໃນດ້ານການວິໄຈ ແລະ ພັດທະນາ, ການປະກອບຂັ້ນສູງ, ບັນຈຸອຸປະກອນ ແລະ ຂໍ້ກຳນົດການທົດລອງຂອງອຸດສາຫະກຳ Semiconductors ຊຶ່ງໂຕເລກຂ້າງເທິງນີ້ໄດ້ພິສູດເຖິງຄຸນນະພາບຂອງແຮງງານຟີລິບປິນທີ່ເປັນໜຸ່ມ, ມີທັກສະສູງ, ຮຽນຮູ້ໄວ, ມີຄວາມຄິດສ້າງສັນ ແລະ ມີປະສິດທິຜົນ, ສາມາດປັບຕົວເຂົ້າກັບວັດທະນະທຳທີ່ຫຼາກຫຼາຍໄດ້.