ໂດຍໄດ້ຮັບການສະໜັບສະໜູນຈາກອົງການກອຍກາ (KOICA) ໄດ້ຈັດຝຶກອົບຮົມການສ້າງຂີດຄວາມສາມາດໃຫ້ແກ່ກຸ່ມກອງທຶນພັດທະນາບ້ານ, ການຝຶກອົບຮົມຄັ້ງນີ້ມີຜູ້ເຂົ້າຮ່ວມທັງໝົດ 29 ຄົນ ໃນນີ້ມີຕົວແທນທີ່ມາຈາກກົມພັດທະນາຊົນນະບົດ 1 ຄົນ ແລະ ຕົວແທນຈາກບ້ານ 14 ບ້ານ ຂອງ 7 ເມືອງ 3 ແຂວງ ຄື: ແຂວງຊຽງຂວາງ, ແຂວງບໍລິຄໍາໄຊ ແລະ ແຂວງວຽງຈັນ.
ຫຼັກສູດຝຶກອົບຮົມຄັ້ງນີ້ແມ່ນມຸ່ງເນັ້ນໃນການເສີມສ້າງຂີດຄວາມສາມາດດ້ານເຕັກນິກການຈັດຕັ້ງປະຕິບັດ ແລະ ບໍລິຫານຈັດການກອງທຶນພັດທະນາບ້ານເພື່ອນໍາໄປສູ່ການເພີ່ມລາຍຮັບໃຫ້ແກ່ຊຸມຊົນ ນັກສໍາມະນາກອນໄດ້ຮຽນຮູ້ພາກທິດສະດີ ແລະ ພາກປະຕິບັດຕົວຈິງກ່ຽວກັບບົດບາດ ແລະ ພາລະໜ້າທີ່ຂອງຄະນະບໍລິຫານກອງທຶນ, ການບໍລິຫານການປ່ອຍກູ້, ການຄຸ້ມຄອງເງິນຄັງ, ກົດລະບຽບ-ລະບຽບການຂອງກອງທຶນພັດທະນາບ້ານ, ລະບົບບັນຊີ ລວມທັງການເຮັດລາຍງານຈາກອາຈານທີ່ມີຄວາມຊໍານານ, ການຝຶກອົບຮົມຄັ້ງນີ້ນອກຈາກການຮຽນຮູ້ບົດຮຽນແລ້ວ ຜູ້ເຂົ້າຮ່ວມສໍາມະນາຍັງໄດ້ແລກປ່ຽນວັດທະນະທໍາ, ແລກປ່ຽນປະສົບການຈາກທ້ອງຖິ່ນຕົນຮ່ວມກັນ ດ້ວຍບັນຍາກາດມ່ວນຊື່ນ ແລະ ເພື່ອເປັນການຢັ້ງຢືນຜົນສໍາເລັດຂອງການຝຶກອົບຮົມ.
ໃນວັນທີ 20 ກັນຍາທີ່ຜ່ານມາຈຶ່ງໄດ້ມີພິທີມອບໃບຢັ້ງຢືນການຜ່ານຝຶກອົບຮົມໃຫ້ແກ່ສໍາມະນາກອນ ເປັນກຽດມອບໃນຄັ້ງນີ້ ໂດຍ ທ່ານ ນາງ ແວວມະນີ ເທບພະວົງ ຮອງຫົວໜ້າກົມພັດທະນາຊົນນະບົດ ແລະ ທ່ານ ສີສະເກດ ຂັນທະລັດ ຮອງຫົວໜ້າສູນຝຶກອົບຮົມເຕັກນິກກະສິກໍາ ແລະ ພັດທະນາຊົນນະບົດລາວ-ເກົາຫຼີ. ໂດຍໃນຕອນທ້າຍຂອງພິທີ ຄະນະປະທານຍັງໄດ້ໃຫ້ກຽດໂອ້ລົມ ຕໍ່ສໍາມະນາກອນທີ່ຜ່ານການຝຶກອົບຮົມ ຊຶ່ງຄະນະປະທານໄດ້ສະແດງຄວາມຍ້ອງຍໍໍຊົມເຊີຍຕໍ່ສໍາມະນາກອນທີ່ເຂົ້າຮ່ວມຊຸດຝຶກອົບຮົມຄັ້ງນີ້ ແລະ ໄດ້ເນັ້ນໃຫ້ສໍາມະນາກອນຈົ່ງສືບຕໍ່ນໍາເອົາຄວາມຮູ້ຄວາມສາມາດໃນຄັ້ງນີ້ໄປຈັດຕັ້ງປະຕິບັດໃນທ້ອງຖິ່ນຕົນໃຫ້ເກີດດອກອອກຜົນແລະ ພ້ອມກັນພັດທະນາກອງທຶນບ້ານໃຫ້ມີຄວາມເຂັ້ມແຂງ ມີປະສິດທິພາບ ແລະ ສ້າງໃຫ້ເປັນແຫຼ່ງທຶນພັດທະນາຊຸມຊົນຢ່າງແທ້ຈິງ.
(ຂໍ້າມູນຈາກ: ຂ່າວສານກະສິກຳ)
ຄໍາເຫັນ