 |
ໃນກອງປະຊຸມ,ໄດ້ນຳສະເໜີວິດີໂອສຳລັບການພັດທະນາຄູ ທີ່ສ້າງໂດຍ ສວສ ເພື່ອສະໜັບສະໜູນການສອນ, ບົດຮຽນຝຶກເວົ້າພາສາລາວທີ່ສະແດງໃຫ້ເຫັນເຖິງການສອນຕົວຈິງໃນຫ້ອງຮຽນ ເພື່ອແນະນຳໃຫ້ຄູ ແລະ ການປະຕິບັດຂອງຕົນເອງ. ວິທີການທີ່ເຂົາເຈົ້າຈະປັບປຸງ ການສອນຂອງຕົນເພື່ອຮັບປະກັນໃຫ້ນັກຮຽນເຂົ້າໃຈ ແລະ ພ້ອມກັນຮຽນຮູ້. ການສອນຫຼັກສູດສະບັບປັບປຸງໃໝ່ແມ່ນມີຄວາມທ້າທາຍສໍາລັບຄູ. ພວກເຮົາຈຳເປັນຕ້ອງໄດ້ສືບຕໍ່ໃຫ້ຄໍາແນະນໍາທີ່ຊັດເຈນ ແລະ ສອດຄ່ອງ, ໃຫ້ການສະໜັບສະໜູນຄູໂດຍການສະແດງຕົວຢ່າງການສອນຕົວຈິງໃນຫ້ອງຮຽນ, ຄືກັບທີ່ສະແດງໃຫ້ເຫັນໃນວິດີໂອນີ້.
ສຳລັບສື່ການຮຽນ, ການສອນ, ຝຶກເວົ້າພາສາລາວແມ່ນແນວຄິດລິເລີ່ມ ແລະ ມີຄວາມສ້າງສັນຂອງກະຊວງສຶກສາທິການ ແລະ ກິລາ (ສສກ) ໂດຍໄດ້ຮັບການສະໜັບສະໜູນຈາກປະເທດອົສຕຣາລີ ຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ). ຈຸດປະສົງຂອງສື່ການຮຽນ, ການສອນ, ຝຶກເວົ້າພາສາລາວແມ່ນເພື່ອຊ່ວຍໃຫ້ນັກຮຽນຂັ້ນ ປ.1 ຈາກຊຸມຊົນທີ່ບໍ່ເວົ້າພາສາລາວຢູ່ໃນຄອບຄົວ ໄດ້ພັດທະນາທັກສະການເວົ້າພາສາລາວ.ສື່ການຮຽນ, ການສອນແມ່ນໄດ້ເລີ່ມຕົ້ນນຳໃຊ້ໃນທົ່ວປະເທດນັບແຕ່ ເດືອນກັນຍາ 2024, ບົດຮຽນຝຶກເວົ້າພາສາລາວໃນປັດຈຸບັນໄດ້ຖືກສອນຢູ່ໃນຫ້ອງຮຽນໃນທົ່ວປະເທດ.ບົດຮຽນແມ່ນເນັ້ນໃສ່ສົ່ງເສີມທັກສະການເວົ້າ ແລະ ການຟັງ ຜ່ານກິດຈະກຳ ແລະ ເກມທີ່ຖືເອົານັກຮຽນເປັນໃຈກາງ, ບົດຮຽນຝຶກເວົ້າພາສາລາວ ໄດ້ປູພື້ນຖານໃຫ້ນັກຮຽນທີ່ບໍ່ເວົ້າພາສາລາວຢູ່ໃນຄອບຄົວ ສາມາດຮຽນຫຼັກສູດຊັ້ນປະຖົມແຫ່ງຊາດໄດ້ ແລະ ສາມາດປັບປຸງຜົນການຮຽນຂອງຕົນໃນວິຊາອື່ນໆ. ໃນປີທຳອິດຂອງການສຳເລັດການຈັດຕັ້ງປະຕິບັດບົດຮຽນຝຶກເວົ້າພາສາລາວໃນທົ່ວປະເທດ, ບັນດາພາກສ່ວນທີ່ກ່ຽວຂ້ອງໄດ້ກຳນົດຄວາມຈຳເປັນເພື່ອສະທ້ອນຄືນເຖິງບົດຮຽນ ແລະ ກຳນົດທິດທາງໃນຕໍ່ໜ້າ.
ທ່ານ ອຸທິດ ທິບມະນີ ໄດ້ກ່າວວ່າ: ຜູ້ມີສ່ວນກ່ຽວຂ້ອງໃນວຽກນີ້, ຈະໄດ້ແລກປ່ຽນຄຳຄິດຄຳເຫັນ ແລະ ກຳນົດທິດທາງໃນອະນາຄົດຂອງສື່ການຮຽນ, ການສອນ, ຝຶກເວົ້າພາສາລາວລວມທັງການຂະຫຍາຍໃນຂັ້ນຮຽນອື່ນຕື່ມ. ປັດຈຸບັນ, ພວກເຮົາກໍາລັງຈະໄດ້ເຫັນໝາກຜົນອັນແທ້ຈິງຂອງບົດຮຽນຝຶກເວົ້າພາສາລາວ. ເດັກນ້ອຍຈາກຊຸມຊົນ, ຊົນເຜົ່າໄດ້ເຂົ້າຮ່ວມການຮຽນໃນຫ້ອງຮຽນຢ່າງໝັ້ນໃຈ ແລະ ກຽມຄວາມພ້ອມໃຫ້ແກ່ການອ່ານ ແລະ ຂຽນພາສາລາວໄດ້ດີຂຶ້ນ.
(ຂາວ-ພາບ:ບຸນຕອມ)
ຄໍາເຫັນ