 |
ທ່ານ ນາງ ລີໂຮ່ວສຸກ ຫົວທີມງານອາສາສະໝັກຂອງ KAC ໄດ້ໃຫ້ສຳພາດວ່າ: ຈຸດປະສົງ ທີ່ມາຊ່ວຍເຫຼືອໂຮງຮຽນເດັກກຳພ້າຫຼວງພະບາງ ຂອງຄະນະອາສາສະໝັກ ຈາກລັດວິສາຫະກິດສະໜາມບິນເກົາຫຼີ ຄັ້ງນີ້ ເພື່ອຊ່ວຍເສີມສ້າງຄວາມໄຝ່ຝັນ ແລະ ຄວາມມຸ່ງຫວັງ ໃຫ້ແກ່ບັນດາເດັກນັກຮຽນໃນໂຮງຮຽນເດັກກຳພ້າຫຼວງພະບາງ ໃຫ້ເບິ່ງເຫັນອະນາຄົດ, ທັງເປັນການຊ່ວຍຊຸກຍູ້ ການແລກປ່ຽນວັດທະນະທຳ ລະຫວ່າງ ສອງປະເທດລາວ ແລະ ສ. ເກົາຫຼີ. ທີມອາສາສະໝັກ ຈຳນວນ 32 ຄົນ ໄດ້ຊ່ວຍທາສີໂຮງຮຽນ ແລະ ຈັດກິດຈະກຳຮ່ວມກັບນັກຮຽນ ຢູ່ໃນໂຮງຮຽນເດັກກຳພ້າ, ທັງໄດ້ຊ່ວຍສ້າງຮາວຕາກເຄື່ອງໃຫ້ນັກຮຽນ ແລະ ຈັດກິດຈະກຳແລກປ່ຽນວັດທະນະທຳ ຮ່ວມກັບບັນດາເດັກນັກຮຽນ.
 |
ທ່ານ ນາງ ຢູຮ່ອນສຸກ ປະທານສະມາຄົມສິລະປະວັດທະນະທຳ ສ. ເກົາຫຼີ ໃຫ້ສຳພາດວ່າ: ສະມາຄົມສິລະປະວັດທະນະທຳການແບ່ງປັນ ໄດ້ຮັບມອບໝາຍເປັນອົງການປະສານງານ ໃຫ້ແກ່ລັດວິສາຫະກິດສະໜາມບິນ ເກົາຫຼີ ເພື່ອນຳເອົາຄະນະອາສາສະໝັກ ມາຊ່ວຍເຫຼືອໂຮງຮຽນເດັກກຳພ້າຫຼວງພະບາງ ໃນຄັ້ງນີ້, ຍ້ອນເຫັນໄດ້ຄວາມຈຳເປັນ ແລະ ຫຍຸ້ງຍາກຂອງນັກຮຽນ ໂຮງຮຽນເດັກກຳພ້າ ທີ່ຈະຕ້ອງໄດ້ນຳເອົາຄວາມອົບອຸ່ນ ມາຊ່ວຍເຫຼືອເຂົາເຈົ້າ, ຈຶ່ງໄດ້ປະສານສົມທົບກັບ ລັດວິສາຫະກິດສະໜາມບິນເກົາຫຼີ ເພື່ອນຳເອົາວັດຖຸອຸປະກອນ ມາຊ່ວຍເຫຼືອນັກຮຽນ, ຊ່ວຍທາສີໂຮງຮຽນ ແລະ ຫ້ອງຮຽນ, ພາເດັກນັກຮຽນ ໄປທັດສະນະສຶກສາ ຢູ່ສະໜາມບິນສາກົນຫຼວງພະບາງ ແລະ ສະໜອງອາຫານທ່ຽງ ໃຫ້ແກ່ເດັກນັກຮຽນທັງໝົດ ໃນໂຮງຮຽນ. ຫວັງວ່າ ການຊ່ວຍເຫຼືອໃນຄັ້ງນີ້, ຈະຊ່ວຍເສີມສ້າງແຮງບານດານໃຈ ໃຫ້ແກ່ນັກຮຽນທັງຫຼາຍ ເພື່ອໃຫ້ຮຽນໜັງສືເກັ່ງ ແລະ ກ້າວຂຶ້ນເປັນຜູ້ທີ່ມີຄວາມຮູ້ ໃນອະນາຄົດ, ການຊ່ວຍເຫຼືອຂອງພວກເຮົາ ກໍເພື່ອຢາກປູທາງໃຫ້ນັກຮຽນ ເບິ່ງເຫັນອະນາຄົດ ທີ່ກວ້າງໄກ ແລະເອົາໃຈໃສ່ຮຽນໜັງສື ໃຫ້ກ້າວຂຶ້ນເປັນບຸກຄົນທີ່ຍິ່ງໃຫຍ່ ໃນມື້ໜ້າ.
(ແຫຼ່ງຂ່າວ: ແຂວງຫຼວງພະບາງ)
ຄໍາເຫັນ