 |
ໃນກອງປະຊຸມ, ໄດ້ມີການລາຍງານກ່ຽວກັບຜົນສໍາເລັດຂອງການຈັດຕັ້ງປະຕິບັດແຜນພັດທະນາຂະແໜງການສຶກສາ ແລະ ກິລາ ປະຈໍາສົກຮຽນ 2024-2025 ແລະ ທິດທາງແຜນການ ສົກຮຽນ 2025-2026, ຊຶ່ງໃນສົກຮຽນ 2024-2025 ຂະແໜງການສຶກສາ ແລະ ກິລາທົ່ວແຂວງວຽງຈັນ ມີຜູ້ບໍລິຫານ ແລະ ຄູສອນທັງພາກລັດ-ເອກະຊົນ ທັງໝົດ 5,631 ຄົນ ຍິງ 3,237 ຄົນ. ໃນນັ້ນ, ມີຄູສອນ ແລະ ຜູ້ອໍານວຍການໂຮງຮຽນ 5,185 ຄົນ ຍິງ 3,028 ຄົນ; ຜູ້ບໍລິຫານ ແລະ ພະນັກງານ ຫ້ອງການສຶກສາທິການ ແລະ ກິລາເມືອງ ແລະ ແຂວງ 446 ຄົນ ຍິງ 209 ຄົນ, ມີໂຮງຮຽນທັງໝົດ 715 ແຫ່ງ, ມີນັກຮຽນທັງໝົດ 104,228 ຄົນ ຍິງ 51,181 ຄົນ (ມີນັກຮຽນສົງ 253 ອົງ ແລະ ສາມັນກິນນອນຊົນເຜົ່າ 601 ຄົນ ຍິງ 228 ຄົນ).
ຜົນການຈັດຕັ້ງປະຕິບັດ 15 ຄາດໝາຍຫຼັກ ຊຶ່ງຜ່ານການຈັດຕັ້ງປະຕິບັດບັນດາວຽກຈຸມສຸມ, ນະໂຍບາຍ ແລະ ຍຸດທະສາດຕ່າງໆທີ່ກຳນົດໄວ້ໃນແຜນການ ສົກຮຽນ 2024-2025 ແລະ ທຽບໃສ່ມະຕິສະພາປະຊາຊົນແຂວງວຽງຈັນ ປະຈຳປີ 2024 ແລະ ທິດທາງແຜນການ ປະຈຳປີ 2025 ສະບັບເລກທີ 10/ສພຂ.ວຈ, ວັນທີ 24 ມັງກອນ 2025 ສາມາດບັນລຸໄດ້ 9 ຄາດໝ.
ສ່ວນຄາດໝາຍທີ່ບໍ່ບັນລຸ ມີ 6 ຄາດໝາຍ ຄື: 1) ອັດຕາປະລະການຮຽນຂອງນັກຮຽນ ປ1 (ແຜນການບໍ່ໃຫ້ເກີນ 5,5%) ປະຕິບັດ 6,5%, 2) ອັດຕາປະລະການຮຽນຂອງນັກຮຽນຊັ້ນປະຖົມ (ແຜນການບໍ່ໃຫ້ເກີນ 2,5%) ປະຕິບັດໄດ້ 3,6%, 3) ອັດຕາເລື່ອນຂັ້ນ-ຈົບຊັ້ນປະຖົມສຶກສາ (ແຜນການ 99,6%) ປະຕິບັດໄດ້ 95,2%, 4) ອັດຕາເຂົ້າຮຽນໃໝ່ລວມ ຂັ້ນ ມ.4 (ແຜນການ 70%) ປະຕິບັດໄດ້ 66,5%, 5) ອັດຕາປະລະການຮຽນຂອງນັກຮຽນ ຊັ້ນມັດທະຍົມຕອນຕົ້ນ (ແຜນການ 9%) ປະຕິບັດໄດ້ 10,7% ແລະ 6) ອັດຕາຄ້າງຫ້ອງຊັ້ນປະຖົມ (ແຜນການບໍ່ໃຫ້ເກີນ 0,3%) ປະຕິບັດໄດ້ 1,3%.
 |
ນອກຈາກນີ້, ກອງປະຊຸມຍັງໄດ້ສະເໜີການຈັດຕັ້ງປະຕິບັດຂອງຂະແໜງການສາມັນໃນການແກ້ໄຂບັນຫາອັດຕາປະລະ, ສະເໜີການຈັດຕັ້ງປະຕິບັດການແກ້ໄຂຄຸນນະພາບການສຶກສາໃນສາຍສາມັນ, ສະເໜີວິທີເພີ່ມອັດຕາການເຂົ້າຮຽນຂອງເດັກນ້ອຍກ່ອນໄວຮຽນໃຫ້ຫຼາຍຂຶ້ນ ເພີ່ມຄຸນນະພາບການຮຽນການສອນໃຫ້ສູງຂຶ້ນ, ສະເໜີການນຳໃຊ້ໄອຊີທີເຂົ້າໃນການຄຸ້ມຄອງການບໍລິຫານໂຮງຮຽນ ແລະ ສຶກສາເມືອງ, ສະເໜີວຽກງານກິລາກາຍຍະກຳ, ລາຍງານສະພາບການສັບຊ້ອນ ແລະ ຈັດສັນຄູ, ສະເໜີຄວາມເປັນເອກະພາບການນຳໃຊ້ຄູເຫຼືອໄປເມືອງ ແລະ ໂຮງຮຽນທີ່ຂາດຄູ, ສະເໜີວິທີການນຳສົ່ງພະນັກງານຂອງພະແນກສຶກສາທິການ ແລະ ກິລາແຂວງ ລົງພື້ນຖານຕາມສາຍຕັ້ງປະຈຳຢູ່ເມືອງ ແລະ ພະນັກງານຢູ່ຫ້ອງການສຶກສາທິການ ແລະ ກິລາ ລົງປະຈຳຢູ່ກຸ່ມໂຮງຮຽນ. ພ້ອມກັນນີ້, ບັນດາຜູ້ແທນກອງປະຊຸມຍັງໄດ້ປະກອບຄຳເຫັນໃສ່ບັນດາເອກະສານຕ່າງໆ ເພື່ອໃຫ້ສົມບູນຍິ່ງຂຶ້ນ.
(ຂ່າວ: ສີສົມໄຊ)
ຄໍາເຫັນ