 |
ຕາມການໃຫ້ສຳພາດຂອງທ່ານ ຄຳ ຂັນທະວີວອນ ຫົວໜ້າພະແນກສຶກສາທິການ ແລະ ກິລາ ແຂວງວຽງຈັນ ເມື່ອວັນທີ 3 ກັນຍານີ້ ໃຫ້ຮູ້ວ່າ: ພະແນກສຶກສາທິການ ແລະ ກິລາ ແຂວງວຽງຈັນ ຮ່ວມກັບ ວິສາຫະກິດ ສ່ວນບຸກຄົນ ອີເອັຟຈີ ລາວ ກຽມຈັດການແຂ່ງຂັນແລ່ນ (Run Discovery) ຊີງຂັນທ່ານເຈົ້າແຂວງວຽງຈັນ ເພື່ອເປັນການຕ້ອນຮັບກອງປະຊຸມໃຫຍ່ອົງຄະນະພັກແຂວງ ຄັ້ງທີ VII, ວັນສຳຄັນຕ່າງໆຂອງຊາດ-ຂອງພັກ, ທັງເປັນການສົ່ງເສີມການອອກກໍາລັງກາຍເພື່ອສຸຂະພາບທີ່ດີຂອງມວນຊົນໃນສັງຄົມ, ເປັນເວທີໃຫ້ບັນດານັກກິລາຂອງແຂວງໄດ້ມີເວທີໃນການຝຶກຊ້ອມ ເພື່ອເຂົ້າຮ່ວມການແຂ່ງຂັນໃນລະດັບປະເທດ, ພາກພື້ນ ແລະ ໃນລະດັບໂລກ, ພ້ອມທັງຖືເປັນໂອກາດອັນດີທີ່ພີ່ນ້ອງແຂວງວຽງຈັນ ຈະໄດ້ຕ້ອນຮັບນັກກິລາແລ່ນຂອງບັນດາແຂວງ, ນະຄອນຫຼວງວຽງຈັນ ແລະ ປະເທດໃກ້ຄຽງ. ນອກຈາກນັ້ນ, ຍັງເປັນການສົ່ງເສີມການທ່ອງທ່ຽວໃຫ້ກັບແຂວງວຽງຈັນ ໃຫ້ມີຄວາມຄຶກຄື້ນ ເນື່ອງຈາກແຂວງວຽງຈັນ ມີຈຸດເດັ່ນທາງດ້ານທໍາມະຊາດທີ່ອຸດົມສົມບູນ ແລະ ສວຍງາມພ້ອມທັງມີຄວາມສະດວກໃນການເດີນທາງຈາກທຸກສາລະທິດ.
ການແຂ່ງຂັນຄັ້ງນີ້, ຈະຈັດຂຶ້ນໃນວັນທີ 7 ກັນຍາ 2025 ທີ່ເມືອງວຽງຄຳ ເເຂວງວຽງຈັນດ້ວຍໄລຍະທາງ 5 ກິໂລແມັດ ແລະ 10 ກິໂລແມັດ. ສະເພາະໄລຍະທາງ 10 ກິໂລແມັດ (ຍິງ-ຊາຍ) ແມ່ນແບ່ງອອກເປັນ 2 ປະເພດ ຄື: ປະເພດທົ່ວໄປ (ຍິງ-ຊາຍ) ແລະ ປະເພດກຸ່ມອາຍຸ (ຍິງ-ຊາຍ). ໃນນັ້ນ, ມີຫຸ່ນກຸ່ມອາຍຸ 12-19 ປີ, 20-29 ປີ, 30-39 ປີ, 40-49 ປີ, 50-59 ປີ ແລະ 60 ປີຂຶ້ນໄປ.ສໍາລັບຈຸດປ່ອຍໂຕນັກກິລາ ແລະ ເສັ້ນໄຊ ແມ່ນທີ່ວິທະຍາໄລເຕັກນິກວິຊາຊີບ ແຂວງວຽງຈັນ ຊຶ່ງໃນໄລຍະທາງ 10 ກິໂລແມັດ ເລີ່ມປ່ອຍນັກກິລາໃນເວລາ ເວລາ: 5:45 ໂມງ ແລະ ໄລຍະທາງ 5 ກິໂລແມັດ ແມ່ນເລີ່ມປ່ອຍນັກກິລາໃນເວລາ 6:00 ໂມງໂດຍໄດ້ແລ່ນຜ່ານເສັ້ນທາງທໍາມະຊາດອັນສວຍສົດງົດງາມ ຂ້າມຂົວນ້ຳງື່ມ ແລະ ເສັ້ນທາງໃໝ່ຂອງເມືອງວຽງຄຳ.
ສະເພາະການແຂ່ງຂັນໃນຄັ້ງນີ້, ນັກກິລາທີ່ຊະນະເລີດ ໃນໄລຍະທາງ 10 ກິໂລແມັດ (ຍິງ ແລະ ຊາຍ) ຈະໄດ້ຮັບຂັນ, ຫຼຽນ ແລະ ເງິນສົດລາຍການລະ 3 ລ້ານກີບ, ອັນດັບທີ 2 ໄດ້ຮັບຂັນ, ຫຼຽນ ແລະ ເງິນສົດ 2.5 ລ້ານກີບ, ອັນດັບທີ 3 ໄດ້ຮັບຂັນ, ຫຼຽນ ແລະ ເງິນສົດ 2 ລ້ານກີບ; ຫຸ່ນກຸ່ມອາຍຸ 12-19 ປີ, 20-29 ປີ, 30-39 ປີ, 40-49 ປີ, 50-59 ປີ ແລະ 60 ປີຂຶ້ນໄປ ຊະນະເລີດ ໄດ້ຮັບຂັນ, ຫຼຽນ ແລະ ເງິນສົດ 8 ແສນກີບ, ອັນດັບທີ 2 ໄດ້ຮັບຂັນ, ຫຼຽນ ແລະ ເງິນສົດ 6 ແສນກີບ ແລະ ອັນດັບທີ 3 ໄດ້ຮັບຂັນ, ຫຼຽນ ແລະ ເງິນສົດ 4 ແສນກີບ.
ຖ້າຫາກທ່ານໃດສົນໃຈຢາກເຂົ້າຮ່ວມແຂ່ງຂັນ ແມ່ນສາມາດລົງທະບຽນໄດ້ໂດຍການສະແກນຄິວອາໂຄດ ເລີ່ມແຕ່ມື້ນີ້ຈົນເຖິງວັນທີ 5 ກັນຍາ 2025. ນອກຈາກນັ້ນ, ຍັງສາມາດລົງທະບຽນໄດ້ໜ້າງານໃນວັນທີ 6 ກັນຍາ, ຊຶ່ງພາຍຫຼັງລົງທະບຽບແລ້ວ ແມ່ນຈະໄດ້ເສື້ອ ຮ່ວມງານແລ່ນຄັ້ງປະຫວັດສາດ ທີ່ແຂວງວຽງຈັນ ໂດຍສອບຖາມຂໍ້ມູນເພີ່ມຕື່ມໄດ້ທີ່ເບີ 020 93718497 ຫຼື 020 95818651.
(ຂ່າວ: ສີສົມໄຊ)
ຄໍາເຫັນ