ຮັບປະກັນວຽກງານສື່ສານໃນພາກສະໜາມໃຫ້ປິດລັບ, ປອດໄພ, ວ່ອງໄວ, ຊັດເຈນ

ວຽກງານສື່ສານພາກສະໜາມ ມີຄວາມສໍາຄັນຕໍ່ການຊ້ອມຮົບໃນການສະເຫຼີມສະຫຼອງ 75 ປີວັນສ້າງຕັ້ງກອງທັບປະຊາຊົນລາວເພື່ອເຮັດໃຫ້ບັ້ນດັ່ງກ່າວມີຜົນສໍາເລັດຕາມແຜນການ, ກົມສື່ສານ ກົມໃຫຍ່ເສນາທິການກອງທັບປະຊາຊົນລາວ ໄດ້ຈັດຕັ້ງພາກສ່ວນຮັບປະກັນວຽກງານຕິດຕໍ່ສື່ສານເຂົ້າປະຈໍາຢູ່ພາກສະໜາມ ເພື່ອໃຫ້ມີຄວາມຮັບປະກັນໄດ້ຕາມວຽກງານໜ້າທີ່ວິຊາສະເພາະ, ໂດຍໄດ້ສັງລວມເອົາ 5 ກົມກອງສື່ສານເປັນເຂດໃຈກາງ ແລະ ພາຫະນະນໍາໃຊ້ລົດວິຊາສະເພາະໃຫ້ຄົບຖ້ວນພຽງພໍ ແລະ ຈັດຝຶກອົບຮົບໃຫ້ແກ່ພະນັກງານ-ນັກຮົບວິຊາສະເພາະເພື່ອໃຫ້ມີຄວາມສໍານິຊໍານານໃນການນໍາໃຊ້ອຸປະກອນສື່ສານ.
      ສະຫາຍ ພັນໂທ ດອນສະຫວັນ ບົນຄໍາພັນ ຫົວໜ້າພະແນກເສນາ ກົມສື່ສານ ໃຫ້ຮູ້ວ່າ: ພາຍຫຼັງທີ່ໄດ້ເຂົ້າຢຶດສະໜາມໄດ້ຈັດຕັ້ງສູນສື່ສານຢູ່ພາກສະໜາມເຮັດໜ້າທີ່ຮັບປະກັນການຕິດຕໍ່ສື່ສານໃຫ້ຜູ້ບັນຊາ ບັນຊາກົມກອງເຫຼົ່າຮົບທີ່ເຮັດໜ້າທີ່ຍິງສະແດງຄັ້ງນີ້ສາມາດເຄື່ອນກຳລັງໄດ້ທັນເວລາ ແລະ ບັນຊາຢ່າງຄ່ອງແຄ້ວ. ນອກຈາກວຽກງານຕິດຕໍ່ສື່ສານແລ້ວ ຍັງໄດ້ຮັບການມອບໝາຍຈາກຄະນະຊີ້ນໍາພາກສະໜາມໃຫ້ຮັບປະກັນໃນການຖ່າຍ ແລະ ບັນທຶກຮູບພາບຈາກຈໍ LED.
   ສະຫາຍ ພັນໂທ ດອນສະຫວັນ ບົນຄໍາພັນ ໃຫ້ຮູ້ຕື່ມວ່າ: ຜ່ານການຝຶກຊ້ອມ ໄດ້ດຳເນີນໄປຕາມແຜນການທີ່ວາງໄວ້ດ້ວຍຜົນສຳເລັດຕາມການຊີ້ນຳຂອງຂັ້ນເທິງ, ສາມາດບັນຊາກໍາລັງເຖິງຈຸດທີ່ໝາຍ ແລະ ສາມາດທໍາລາຍສິ່ງຕ່າງໆຂອງສັດຕູ, ພາຍຫຼັງສໍາເລັດການຝຶກຊ້ອມຮ່ວມໃນຄັ້ງນີ້ ຍັງຈະໄດ້ຈັດຕັ້ງສະຫຼຸບຖອດຖອນບົດຮຽນ ເປັນຕົ້ນແມ່ນວຽກງານຮັບປະກັນຕິດຕໍ່ສື່ສານ ເພື່ອຈະນໍາໄປຖອດຖອນບົດຮຽນໃນຄັ້ງຕໍ່ໄປ ເພື່ອເຮັດໃຫ້ເຫຼົ່າຮົບສື່ສານມີຄວາມເຂັ້ມແຂງ, ມີຄວາມຮັບປະກັນດັ່ງຄໍາຂວັນທີ່ວ່າ: ປິດລັບ, ປອດໄພ, ວ່ອງໄວ, ຊັດເຈນ.
    ຂ່າວ-ພາບ: ລຸນທອງ ສອນມະນີ