 |
ປັດຈຸບັນ, ຫັດຖະກໍາເຄື່ອງປັ້ນ-ດິນເຜົາ ແມ່ນໄດ້ຮັບຄວາມນິຍົມ ໂດຍສະເພາະແມ່ນຜະລິດຕະພັນເຄື່ອງປັ້ນດິນເຜົາເຄືອບຄວາມຮ້ອນສູງ ທີ່ເຮັດດ້ວຍມື ແລະ ນໍາໃຊ້ສີເຄືອບຈາກທໍາມະຊາດ ເປັນຕົ້ນເຄື່ອງໃຊ້ໃນຊີວິດປະຈໍາວັນ, ຮ້ານປັນຍານິເວດ ຕັ້ງຢູ່ບ້ານຊໍາເກດ ເມືອງສີໂຄດຕະບອງ ນະຄອນຫຼວງວຽງຈັນ ກໍເປັນອີກຮ້ານໜຶ່ງທີ່ມີຄວາມເປັນເອກະລັກສະເພາະ ຊຶ່ງເປັນບ່ອນຜະລິດ ແລະ ຈໍາໜ່າຍ ສໍາລັບວັດສະດຸທີ່ນໍາມາປັ້ນແຕ່ລະອັນ ແມ່ນໄດ້ຜ່ານຂະບວນການປະສົມດິນ ຕາມຂັ້ນຕອນ ຜ່ານການທົດລອງຫຼາຍໆຄັ້ງ ເພື່ອເຮັດໃຫ້ໄດ້ຜະລິດຕະພັນທີ່ເຮັດອອກມາສູ່ສັງຄົມ ຫຼື ຜູ້ຊົມໃຊ້ ໃຫ້ມີຄຸນນະພາບ ແລະ ສວຍງາມ.
 |
ທ່ານ ນາງ ສົມຈິດ ພັນຄໍາ ເຈົ້າຂອງຮ້ານ ປັນຍານິເວດ ໄດ້ໃຫ້ສໍາພາດໃນໂອກາດເຂົ້າຮ່ວມງານສໍາມະນາ ແລະ ວາງສະແດງສິນຄ້າພູມປັນຍາລາວ ຈາກທົ່ວປະເທດ ຊຶ່ງຈັດຂຶ້ນໃນລະຫວ່າງວັນທີ 9-13 ກັນຍາ 2026 ທີ່ສູນການຄ້າລາວ-ໄອເຕັກ (ຕຶກເກົ່າ) ຊຶ່ງທ່ານໄດ້ໃຫ້ຮູ້ວ່າ: ຜະລິດຕະພັນທີ່ນໍາມາວາງສະແດງໃນຄັ້ງນີ້ ມີປະເພດ ຈອກ, ຈານ, ໂຖດອກໄມ້ ແລະ ອື່ນໆ ຊຶ່ງຜະລິດຕະພັນແຕ່ລະອັນແມ່ນໄດ້ນໍາໃຊ້ດິນທີ່ມີໃນສວນຂອງຕົນ ໂດຍຜ່ານການກວດກາຄຸນນະພາບດິນຈາກຊ່ຽວຊານ ຊຶ່ງຜ່ານການປະສົມດິນທີ່ສົມດູນ ພາຍຫຼັງປັ້ນແລ້ວແມ່ນມາຜ່ານຂະບວນການເຜົາ ຊຶ່ງໃຊ້ເວລາເກືອບ 3 ຊົ່ວໂມງ ແລະ ການເຜົາກໍຈະຄ່ອຍໆເພີ່ມຄວາມຮ້ອນຂຶ້ນ ເພື່ອຮັກສາຮູບແບບບໍ່ໃຫ້ເກີດຮອຍແຕກ.
 |
ງານວາງສະແດງຄັ້ງນີ້ ໄດ້ເປີດໂອກາດໃຫ້ທາງຮ້ານສະແດງວິທີການປັ້ນໃຫ້ຜູ້ມາຮ່ວມງານໄດ້ຊົມຂັ້ນຕອນຂອງການປັ້ນ ເພື່ອເປັນການສົ່ງເສີມພູມປັນຍາດ້ານວັດທະນະທໍາຂອງລາວ ໃຫ້ຊາວຕ່າງຊາດໄດ້ເຫັນ ແລະ ຜະລິດຕະພັນແຕ່ລະອັນທີ່ເຮັດອອກມາ ແມ່ນຈະມີແບບບໍ່ຊໍ້າກັນ ຊຶ່ງເປັນຈຸດເດັ່ນເຮັດໃຫ້ຜູ້ທີ່ໄດ້ເຫັນເກີດຄວາມສົນໃຈ ເພາະການເຮັດແມ່ນໃຊ້ຄວາມປາໜີດລະອຽດອອ່ນ ຜ່ານການທົດລອງຫຼາຍຄັ້ງກ່ອນຈະອອກມາເປັນຜະລິດຕະພັນໜຶ່ງ ຊຶ່ງເປັນສິລະປະທີ່ງົດງາມເມື່ອໄດ້ເຫັນສີຈາກທໍາມະຊາດ. ພ້ອມນີ້ ທາງຮ້ານຂອງພວກເຮົາຍັງມີບ່ອນວາງຈໍາໜ່າຍສິນຄ້າຊື່ຮ້ານໄຕບ້ານຕື່ມອີກ ຊຶ່ງຕັ້ງຢູ່ບ້ານວັດຈັນ ເມືອງຈັນທະບູລີ ນະຄອນຫຼວງວຽງຈັນ. ພ້ອມນີ້ ທ່ານຍັງໄດ້ໃຫ້ຮູ້ຕື່ມອີກວ່າ: ຖ້າທ່ານໃດສົນໃຈຮຽນຮູ້ ຫຼື ຢາກໃຫ້ລູກ-ຫຼານໄດ້ສໍາຜັດຂັ້ນຕອນໃນການປັ້ນ; ໂຮງຮຽນຈະຈັດໃຫ້ມີກິດຈະກໍາ ທາງຮ້ານປັນຍາສິເວດ ຍັງຮັບສອນ ແລະ ເຂົ້າຮ່ວມກິດຈະກໍານໍາທາງຮ້ານໄດ້ ໂດຍຜ່ານການລົງທະບຽນກັບທາງຮ້ານໄດ້ທີ່ Panyanivej@gmail.com. ນອກຈາກນີ້ທາງເຈົ້າຂອງຮ້ານຍັງໄດ້ເຊີນຊວນໃຫ້ຄົນຮຸ່ນໃໝ່ຫັນມາບໍລິໂພກ ແລະ ຮຽນຮູ້ນຳໃຊ້ຜະລິດຕະພັນຂອງພູມປັນຍາລາວເຮົາ ເພື່ອໃຫ້ຫັດຖະກຳຂອງລາວກ້າວສູ່ສາກົນ.
ຄໍາເຫັນ