ທ່ານ ກິ່ງ ບຸນຕາທິດ ຜູ້ອຳນວຍການໂຮງຮຽນປະຖົມສົມບູນບ້ານແສນດິນ ເມືອງນາຊາຍທອງນະຄອນຫຼວງວຽງຈັນ ໄດ້ໃຫ້ຮູ້ວ່າ: ໃນການເປີດສົກຮຽນໃໝ່ 2022-2023 ນີ້ ທາງອຳນາດການປົກຄອງບ້ານໄດ້ສົມທົບກັນອະນາໄມເດີນໂຮງຮຽນກ່ອນຈະກະກຽມການເປີດສົກຮຽນ ແລະ ໄດ້ເປີດຮັບສະໝັກນັກຮຽນແຕ່ວັນທີ 29 ສິງຫາ ເຫັນວ່າຜູ້ປົກຄອງນັກຮຽນແມ່ນໄດ້ເອົາໃຈໃສ່ ນຳພາລູກຫຼານມາສະເໜີຕົວຕາມການແຈ້ງການຂອງອຳນາດການປົກຄອງບ້ານ ທີ່ໄດ້ປະກາດທາງໂທລະໂຄ່ງ ແລະ ມີນັກຮຽນມາສະເໜີຊື່ທັງໝົດ 108 ຄົນ ຍິງ 54 ຄົນ ແລະ ໃນວັນທີ 1 ກັນຍານີ້ ແມ່ນໄດ້ເປີດຮຽນເປັນປົກກະຕິ ສອນແຕ່ ປ.1 ຮອດ ປ.5.
ສ່ວນຄວາມຫຍຸ້ງຍາກຂອງໂຮງຮຽນແມ່ນມີຄູພຽງແຕ່ 5 ຄົນ ເພາະສົກປີ 2022-2023 ຄູໄດ້ເຂົ້າຮັບອຸດໜູນບຳນານ 2 ຄົນ ສະນັ້ນ ເຮົາຈຶ່ງບໍ່ສາມາດເປີດຫ້ອງກຽມປະຖົມໄດ້ ເນື່ອງຈາກວ່າຂາດຄູສອນ ຈະໄດ້ຮຽນແຕ່ ປ.1 ຮອດ ປ.5 ສ່ວນຫ້ອງກຽມປະຖົມແມ່ນຈະໄດ້ຢຸດຊົ່ວຄາວ, ອຸປະກອນການຮຽນນັບແຕ່ ປ.1 ຮອດ ປ.4 ແມ່ນພຽງພໍ ສ່ວນ ປ.5 ແມ່ນໄດ້ຮຽນຕຳລາເກົ່າຢູ່ ບໍ່ມີຕຳລາໃໝ່ ໃຫ້ນັກຮຽນ ແລະ ຢາກສະເໜີໃຫ້ທາງຂັ້ນເທິງສະໜອງຕຳລາຮຽນໃຫ້ ແລະ ຂໍຄູມາເພີ່ມ ເພື່ອຈະໄດ້ເປີດຫ້ອງຮຽນກຽມປະຖົມ.
ຂ່າວ-ພາບ: ບຸນຕອມ.
ຄໍາເຫັນ