ໂຮງຮຽນທິດສະດີການເມືອງກອງທັບມີບົດບາດສຳຄັນໃນການສ້າງຊັບພະຍາກອນມະນຸດ

ແລະ ພົນທະຫານ, ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີທາດແທ້ຫຼັກໝັ້ນການເມືອງໜັກແໜ້ນ, ມີຄວາມຈົງຮັກພັກດີຕໍ່ຊາດ ຕໍ່ປະຊາຊົນດ້ວຍຄວາມບໍລິສຸດໃຈ, ມີແບບແຜນດໍາລົງຊີວິດທີ່ສົດໃສ ແລະ ມີມານະຈິດຝຶກຝົນຫຼໍ່ຫຼອມຕົນເອງ ສະແຫວງຫາຄວາມຮູ້, ຄວາມກ້າວໜ້າ, ຄົ້ນຄວ້າຮໍ່າຮຽນຍົກລະດັບໃນທຸກດ້ານ, ມີສະຕິຕໍ່ການຈັດຕັ້ງ, ມີລະບຽບວິໄນ, ເຄົາລົບລະບຽບກົດໝາຍຂອງພັກ, ຂອງລັດຢ່າງເຂັ້ມງວດໃນເງື່ອນໄຂພັກເຮົາມີແນວທາງປ່ຽນແປງໃໝ່ຢ່າງຮອບດ້ານ ແລະ ມີຫຼັກການຂອງພັກ.
ສະຫາຍ ພົນຈັດຕະວາ ຄຳຜາຍ ສະພັງເໜຶອ ເລຂາຄະນະພັກ ຫົວໜ້າການເມືອງໂຮງຮຽນທິດສະດີການເມືອງກອງທັບໃຫ້ຮູ້ວ່າ: ໃນຊຸມປີຕໍ່ໜ້າໂຮງຮຽນທິດສະດີການເມືອງກອງທັບໄດ້ສຸມໃສ່ສ້າງ ແລະ ປັບປຸງການຈັດຕັ້ງໃຫ້ມີຄວາມປອດໃສ ເຂັ້ມແຂງ ໜັກແໜ້ນ, ປັບປຸງ ແລະ ເພີ່ມທະວີການພົວພັນສ້າງຄວາມເປັນເອກະພາບພາຍໃນໃຫ້ສູງຂຶ້ນ ບົນຫຼັກການລວມສູນເປັນເອກະພາບ, ຕັ້ງໜ້າຕໍ່ສູ້ກັບປະກົດການຫຍໍ້ທໍ້, ສໍ້ລາດບັງຫຼວງ, ກຸ່ມກ້ອນພັກພວກ, ອາດຍາສິດອ້າຍດຽວເພື່ອສ້າງຄວາມເຊື່ອໝັ້ນຂອງມະຫາຊົນຕໍ່ກົງຈັກການຈັດຕັ້ງນໍາພາ-ບັນຊາ, ນີ້ແມ່ນໜຶ່ງໃນວິທີການແກ້ໄຂທີ່ເປັນພື້ນຖານ ເພື່ອເປັນການເພີ່ມທະວີໃນການສ້າງເຫງົ້າພະລັງແຮງດ້ານການເມືອງແນວຄິດໃຫ້ແກ່ກໍາລັງປະກອບອາວຸດ. ຍ້ອນກໍາລັງປະກອບອາວຸດ ແມ່ນກໍາລັງຫຼັກແຫຼ່ງ, ແມ່ນກຳປັ້ນເຫຼັກຂອງພັກ ເພື່ອຕີເອົາຊະນະສັດຕູຜູ້ຮຸກຮານໃນທຸກກໍລະນີ, ອີກດ້ານໜຶ່ງການປັບປຸງການຈັດຕັ້ງທາງດ້ານການເມືອງແນວຄິດໃຫ້ແກ່ກຳລັງປະກອບອາວຸດກອງທັບປະຊາຊົນລາວ ແມ່ນປັດໄຈເບື້ອງຕົ້ນໃນການສ້າງກອງທັບປະຊາຊົນລາວໃຫ້ເປັນກອງທັບທີ່ມີແບບແຜນທັນສະໄໝ, ເອົາໃຈໃສ່ປະຕິບັດ 4 ໜ້າທີ່ໃຫຍ່,26 ແຜນງານທີ່ຄະນະພັກກະຊວງປ້ອງກັນປະເທດວາງອອກ.ນີ້ແມ່ນໜຶ່ງໃນບັນດາວິທີການແກ້ໄຂທີ່ສໍາຄັນເພື່ອສ້າງເຫງົ້າພະລັງແຮງທາງດ້ານການເມືອງແນວຄິດໃຫ້ແກ່ກຳລັງປະກອບອາວຸດກອງທັບປະຊາຊົນລາວ. ຍ້ອນວ່າ: 4 ໜ້າທີ່ໃຫຍ່, 26 ແຜນງານໄດ້ຕິດພັນກັບການກໍ່ສ້າງກໍາລັງປະກອບອາວຸດເຮົາໃຫ້ເຕີບໃຫຍ່ເຂັ້ມແຂງ ພິເສດແມ່ນວຽກງານກໍ່ສ້າງກໍາລັງ, ສ້າງບຸກຄະລາກອນໃຫ້ເປັນຄົນດີ, ຄົນເກັ່ງ, ຄົນທັນສະໄໝ, ເປັນນັກຮົບທີ່ສະຫຼຽວສະຫຼາດມີໄຫວພິບອັນແຫຼມຄົມໃນການແກ້ໄຂບັນຫາທີ່ເກີດຂຶ້ນ. ພ້ອມກັນນັ້ນ, ຍັງຕິດພັນກັບການປັບປຸງກໍ່ສ້າງໂຄງການຫຼັກສູດວິທີການຮຽນ-ການສອນໃຫ້ສອດຄ່ອງກັບໜ້າທີ່, ສອດຄ່ອງກັບສະພາບການໃໝ່ທີ່ເກີດຂຶ້ນ ໂດຍສະເພາະການຕອບຕ້ານຍຸດທະສາດການຫັນປ່ຽນໂດຍສັນຕິຂອງຈັກກະພັດ ແລະ ກຳລັງປໍລະປັກທັງຊອກວິທີຕອບຕ້ານສົງຄາມຂໍ້ມູນຂ່າວສານທີ່ຈັກກະພັດ ແລະ ອິດທິກຳລັງນໍາໃຊ້ຢູ່ໃນປັດຈຸບັນໃຫ້ທັນການ ແລະ ມີປະສິດທິຜົນສູງ. ສືບຕໍ່ຕັ້ງໜ້າເສີມຂະຫຍາຍປະຊາທິປະໄຕຢ່າງກວ້າງຂວາງລະຫວ່າງຂັ້ນລຸ່ມ-ຂັ້ນເທິງບົນຫຼັກການລວມສູນປະຊາທິປະໄຕ, ເນື້ອໃນດໍາເນີນຊີວິດຕ້ອງມີເນື້ອໃນເລິກເຊິ່ງແທດເໝາະກັບສະພາບຕົວຈິງ, ວຽກງານຕົວຈິງແທດເໝາະກັບເປົ້າໝາຍເຮັດໃຫ້ມີຄຸນນະພາບ, ຫຼີກເວັ້ນເວົ້າຫຼາຍປະຈົບປະແຈງມີແຕ່ຮູບການແຕ່ຂາດເນື້ອໃນ. ດ້ານໜຶ່ງອີກຕ້ອງສ້າງສະຕິ ແລະ ຄວາມຮັບຜິດຊອບໃນການປະຕິບັດລະບຽບກົດໝາຍ, ປະຕິບັດລັດຖະທຳມະນູນໃຫ້ຖືກຕ້ອງເຂັ້ມງວດ, ການເສີມຂະຫຍາຍປະຊາທິປະໄຕຂອງມະຫາຊົນ ຕ້ອງຄຽງຄູ່ກັບການປະຕິບັດຂໍ້ກຳນົດກົດລະບຽບ, ເພີ່ມທະວີຄວາມສັກສິດທາງດ້ານກົດໝາຍ, ຕ້ອງແກ້ໄຂຢ່າງຖືກຕ້ອງລະຫວ່າງປະຊາທິປະໄຕກັບຂໍ້ກຳນົດກົດລະບຽບໃນສັງຄົມ, ເປັນຫ່ວງເປັນໃຍໃນການສ້າງຄວາມສາມັກຄີພາຍໃນໃຫ້ແໜ້ນ, ຄວາມສາມັກຄີລະຫວ່າງຂັ້ນລຸ່ມ-ຂັ້ນເທິງ, ລະຫວ່າງອົງການ, ພະແນກການຕ່າງໆພາຍໃນກອງທັບປະຊາຊົນ, ສ້າງໃຫ້ໄດ້ທ່າສະໜາມດ້ານຈິດໃຈບົນພື້ນຖານ ຄວາມເປັນເອກະພາບດ້ານສິດຜົນປະໂຫຍດຢ່າງສົມເຫດສົມຜົນ ແລະ ເສີມຂະຫຍາຍກຳລັງແຮງຂອງອົງການຈັດຕັ້ງມະຫາຊົນເພື່ອປັບປຸງ ແລະ ສ້າງທ່າສະໜາມທາງດ້ານຈິດໃຈຖັນແຖວກຳລັງປະກອບອາວຸດໃຫ້ກວ້າງຂວາງ ແລະ ໜັກແໜ້ນໃນປັດຈຸບັນ. ນອກຈາກເສີມຂະຫຍາຍບົດຮຽນທີ່ເປັນມູນເຊື້ອ, ຍັງຕ້ອງຖືສໍາຄັນໃນການແກ້ໄຂຊີວິດການເປັນຢູ່ປະຕິບັດຄໍາຂັວນເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທົ່າທີ່ສາມາດປະຕິບັດໄດ້, ຍູ້ແຮງບັນດາກົມກອງທີ່ມີເງື່ອນໄຂສ້າງແຫຼ່ງລາຍຮັບ ທັງຂົງເຂດການຜະລິດ ແລະ ການບໍລິການຂອງກອງທັບ.ພ້ອມນັ້ນ, ຕ້ອງປ່ຽນແປງໃໝ່ບັນດາວິທີການ, ຮູບການສຶກສາອົບຮົມທິດສະດີການເມືອງໃຫ້ແທດເໝາະກັບແຕ່ລະເປົ້າໝາຍ, ເພີ່ມທະວີການຄົ້ນຄວ້າ, ວິເຄາະວິໄຈປະກົດການທີ່ເກີດຂຶ້ນ ແລະ ວິທີການແກ້ໄຂໃຫ້ທັນເວລາ.
ສະຫາຍ ພົນຈັດຕະວາ ຄຳຜາຍ ສະພັງເໜືອ ໃຫ້ຮູ້ຕື່ມວ່າ: ສໍາລັບບົດບາດຂອງໂຮງຮຽນທິດສະດີການເມືອງກອງທັບ ຕໍ່ກັບການສ້າງເຫງົ້າພະລັງແຮງດ້ານການເມືອງແນວຄິດໃຫ້ນາຍ ແລະ ພົນທະຫານ ແມ່ນມີຄວາມສໍາຄັນ, ມັນເປັນພື້ນຖານ ແລະ ເປັນປັດໄຈເບື້ອງຕົ້ນໃນການກໍ່ສ້າງກອງທັບປະຊາຊົນລາວໃຫ້ກາຍເປັນກອງທັບທີ່ມີແບບແຜນທັນສະໄໝ, ການສ້າງພະນັກງານ-ນັກຮົບໃຫ້ມີຈິດໃຈຮັກຊາດອັນສູງສົ່ງ, ມີຄວາມຕັ້ງຕໍ່ບໍລິສຸດຕໍ່ພັກ, ຕໍ່ປະເທດຊາດ, ຕໍ່ລະບອບໃໝ່, ຕໍ່ສັງຄົມນິຍົມ ແລະ ກ້າເສຍສະຫຼະຊີວິດໃນເມື່ອປະເທດຊາດມີຄວາມຮຽກຮ້ອງຕ້ອງການ. ມັນບໍ່ແມ່ນບັນຫາທີ່ງ່າຍດາຍ, ແມ່ນບັນຫາທີ່ຫຍຸ້ງຍາກລຳບາກ ແລະ ອົດທົນ ທັງແມ່ນບັນຫາທີ່ລະອຽດອ່ອນ ແລະ ຕິດພັນກັບຫຼາຍປັດໄຈ.ດັ່ງນັ້ນ, ຈຶ່ງຮຽກຮ້ອງໃຫ້ຄະນະພັກ-ຄະນະບັນຊາແຕ່ລະຂັ້ນຕ້ອງມີຄວາມອົດທົນ, ຄວາມລະອຽດອ່ອນ ແລະ ເຮັດຢ່າງຕໍ່ເນື່ອງ, ຄົ້ນຄວ້າບັນຫາຢ່າງພາວະວິໄສ, ຫຼີກເວັ້ນການເບິ່ງບັນຫາແບບຜີວເຜີນ, ຈຶ່ງຈະສ້າງໄດ້ເຫງົ້າພະລັງແຮງດ້ານການເມືອງແນວຄິດໃຫ້ແກ່ກຳລັງປະກອບອາວຸດເຮົາ.