 |
ໃນໂອກາດເຂົ້າຮ່ວມຄັ້ງນີ້, ທ່ານນາງ ປານີ ຢາທໍ່ຕູ້ ໄດ້ໃຫ້ກຽດໂອ້ລົມ ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຜົນງານທີ່ສານປະຊາຊົນແຕ່ລະຂັ້ນຍາດມາໄດ້ໃນໄລຍະຜ່ານມາ. ພ້ອມທັງເນັ້ນໜັກ 7 ບັນຫາສໍາຄັນເພື່ອໃຫ້ວຽກງານຜູ້ພິພາກສາມີການຫັນປ່ຽນຢ່າງຕັ້ງໜ້າດັ່ງນີ້: ໜຶ່ງ: ສືບຕໍ່ເອົາໃຈໃສ່ນໍາພາ-ຊີ້ນໍາ ສຶກສາອົບຮົມການເມືອງ-ແນວຄິດໃຫ້ສະມາຊິກພັກ-ພະນັກງານຕາມຫຼັກການນໍາພາຂອງພັກ, ຖືເອົາວຽກງານການເມືອງ-ແນວຄິດເປັນວຽກງານແຖວໜ້າຂອງທຸກວຽກງານເພື່ອກໍ່ສ້າງສະມາຊິກພັກ-ພະນັກງານທຸກສະຫາຍໃຫ້ມີຄວາມເຂົ້າໃຈແຈ້ງຕໍ່ແນວທາງນະໂຍບາຍຂອງພັກ-ລັດ, ກໍາແໜ້ນທາດແທ້ຊົນຊັ້ນ ແລະ ຄຸນສົມບັດສິນທໍາປະຕິວັດ, ມີຈິດໃຈຮັກເຊື້ອແພງຊາດ, ຮັກລະບອບໃໝ່ລະບອບປະຊາທິປະໄຕ ປະຊາຊົນ, ມີຄວາມຈົງຮັກພັກດີຕໍ່ພັກ, ເຊື່ອໝັ້ນຕໍ່ແນວທາງ ແລະ ການນໍາພາຂອງພັກ ກໍຄືຕໍ່ການສ້າງສາພັດທະນາພັດທະນາປະເທດຊາດ ແລະ ສ້າງອໍານາດແຫ່ງລັດໃຫ້ມີຄວາມເຂັ້ມແຂງເທື່ອລະກ້າວ ເຮັດໃຫ້ສະມະຊິກພັກ, ພະນັກງານສານປະຊາຊົນມີຄຸນທາດການເມືອງ, ມີຄຸນສົມບັດ ສິນທໍາປະຕິວັດ, ຈັນຍາບັນ-ຈັນຍາທໍາ, ມີຄວາມຕື່ນຕົວປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະ ນາປະເທດຊາດ, ມີນໍ້າໃຈຮັບຜິດຊອບສູງຕໍ່ໜ້າທີ່ການເມືອງທີ່ຖືກມອບໝາຍ; ສອງ: ເອົາໃຈໃສ່ລົງຊຸກຍູ້, ຕິດຕາມ ສານປະຊາຊົນທ້ອງຖິ່ນໃນການດໍາເນີນຄະດີໃຫ້ຖືກຕ້ອງຕາມກົດໝາຍ, ເພີ່ມທະວີໃຫ້ໂຈດ, ຈໍາເລີຍ, ບຸກຄົນທີ່ສາມ ແລະ ທະນາຍຄວາມເຂົ້າຮ່ວມໃນການດໍາເນີນຄະດີ ເພື່ອໃຫ້ເຂົາເຈົ້າໄດ້ໂຕ້ແຍ່ງ-ໂຕ້ຖຽງ, ຊີ້ແຈງ, ອະທິບາຍຂໍ້ມູນຫຼັກຖານທີ່ແຕ່ລະຝ່າຍຍົກຂຶ້ນຢ່າງລະອຽດ, ຄົບຖ້ວນທຸກປະເດັນ ແລະ ໃຫ້ສິ້ນສຸດຕາມຂະບວນການຂອງກົດໝາຍເພື່ອເຊີດຊູບົດບາດຂອງອົງການຕຸລາການໃຫ້ເຂັ້ມແຂງ, ໜັກແໜ້ນໃຫ້ກາຍເປັນເຄື່ອງມືຜະເດັດການທີ່ສັກສິດ ແລະ ເຂັ້ມງວດຂອງພັກ, ເປັນທີ່ເພິ່ງສຸດທ້າຍທາງດ້ານກົດໝາຍຂອງປະຊາຊົນຕາມລັດຖະທໍາມະນູນ ແລະ ກົດໝາຍໄດ້ກໍານົດ ມີແຕ່ສານປະຊາຊົນເທົ່ານັ້ນມີສິດອໍານາດໃນການຕັດສິນ, ພິພາກສາຄະດີ. ບົນພື້ນຖານດັ່ງກ່າວ ສານປະຊາ ຊົນແຕ່ລະຂັ້ນຕ້ອງສ້າງຄວາມເປັນເອກະພາບທາງດ້ານທັດສະນະ ແລະ ການປະຕິບັດຢູ່ໃນສານປະຊາຊົນແຕ່ລະຂັ້ນໃຫ້ມີຄວາມປອດໃສ ເຂັ້ມແຂງ, ສາມາດນໍາພາປະຕິບັດໜ້າທີ່ການເມືອງໃນການພິຈາລະນາຕັດສິນ ແລະ ພິພາກສາຄະດີໃຫ້ມີຄວາມຖືກຕ້ອງ, ເປັນທຳເພື່ອນໍາເອົາຄວາມຍຸຕິທໍາມາໃຫ້ສັງຄົມຢ່າງແທ້ຈິງໃຫ້ສົມກັບຄຳເວົ້າຂອງປະທານ ໄກສອນ ພົມວິຫານ ທີ່ວ່າ: “ປະເທດໃດທີ່ສານບໍ່ປະຕິບັດລັດຖະທໍາມະນູນ ຈະມີວິກິດການທາງດ້ານຕຸລາການອັນຈະເຮັດໃຫ້ສານຕັດສິນຄະດີໃຫ້ຄວາມຍຸຕິທໍາແກ່ສັງຄົມບໍ່ໄດ້”; ສາມ: ບັນຫາສໍາຄັນໜຶ່ງໃນການປະຕິບັດໜ້າທີ່ພາລະບົດບາດອັນຕົ້ນຕໍຂອງສານປະຊາຊົນ ໃນນາມອົງການຕຸລາການ ກໍຄືການຕັດສິນ, ການພິພາກສາຄະດີ. ສະນັ້ນ, ຕ້ອງເອົາໃຈໃສ່ແທ້ໆໃນການພິຈາລະນາແກ້ໄຂຄະດີຢູ່ສານປະຊາຊົນໃຫ້ມີຄວາມວ່ອງໄວ ແລະ ມີຄຸນນະພາບສູງ, ຕ້ອງເພີ່ມທະວີການຈັດຕັ້ງຜັນຂະຫຍາຍມະຕິເລກທີ 141/ສພຊ, ລົງວັນທີ 11 ທັນວາ 2024 ຂອງສະພາແຫ່ງຊາດທີ່ໄດ້ຮັບຮອງເອົາຕົວຊີ້ວັດໃນການແກ້ໄຂຄະດີ, ຄະດີອາຍາໃຫ້ໄດ້ 90% ຂຶ້ນໄປ, ຄະດີແພ່ງ, ຄະດີການຄ້າໃຫ້ໄດ້
75% ຂຶ້ນໄປ ແລະ ຄະດີຄອບຄົວ, ຄະດີແຮງງານ, ຄະດີເດັກ ແລະ ຄະດີປົກຄອງໃຫ້ໄດ້ 85% ຂຶ້ນໄປ; ສີ່: ເອົາໃຈໃສ່ບໍາລຸງ-ສ້າງຜູ້ພິພາກສາ, ພະນັກງານຂອງສານ ຖ້າຜູ້ພິພາກສາດີ-ເກັ່ງຈະເຮັດໃຫ້ການຕັດສິນຄະດີມີຄວາມຖືກຕ້ອງ, ເປັນທໍາ. ສະນັ້ນ, ຂອດພະນັກງານ, ຜູ້ພິພາກສາຍາມໃດກໍຕ້ອງເອົາໃຈໃສ່ສຶກສາອົບຮົມການເມືອງແນວຄິດເປັນກົກ, ໃຫ້ມີຄວາມໜັກແໜ້ນ, ມີມານະຈິດຟົດຟື້ນປະຕິວັດ ໂດຍໃຫ້ຖືເອົາການລົງຮາກຖານໃກ້ຊິດກັບປະຊາຊົນ ຖືເອົາປະຊາຊົນເປັນກົກ; ຫ້າ: ຍົກສູງຄວາມຮັບຜິດຊອບຂອງຜູ້ພິພາກສາໃນການດໍາເນີນ, ຕັດສິນ ແລະ ພິພາກສາຄະດີ ເນື່ອງຈາກວ່າຜູ້ພິພາກສາເປັນຜູ້ບັງຄັບບັນຊາ, ຄວບຄຸມການດໍາເນີນ, ຊີ້ຂາດກ່ຽວກັບຄະດີ ຍ້ອນແນວນັ້ນໃນການຕັດສິນ, ພິພາກສາຄະດີຕ້ອງຍົກສູງການນຳພາຂອງພັກ, ນຳພາການຕັດສິນ, ພິພາກສາຄະດີເພື່ອປົກປ້ອງສິດຜົນປະໂຫຍດຂອງລັດ, ຂອງປະຊາຊົນ. ການຄັດເລືອກຜູ້ພິພາກສາຕ້ອງຮັບປະກັນເງື່ອນໄຂມາດຕະຖານດ້ານຄຸນທາດການເມືອງ ແລະ ຄວາມຮູ້ຄວາມສາມາດຢູ່ໃນລະດັບອັນແນ່ນອນ; ສ້າງກົນໄກກໍານົດຄວາມຮັບຜິດຊອບຂອງຜູ້ພິພາກສາຢ່າງຈະແຈ້ງ; ຫົກ: ເພີ່ມທະວີການຕິດຕາມກວດກາ ການປະຕິບັດໜ້າທີ່ຕັດສິນຄະດີຂອງຜູ້ພິພາກ ສາ ແລະ ພະນັກງານກົດໝາຍໃຫ້ເປັນປົກກະຕິ ໂດຍສຸມໃສ່ກວດກາ ເປັນຕົ້ນ 1) ການປະພຶດຂອງຜູ້ພິພາກສາຕາມທີ່ໄດ້ກຳນົດໄວ້ໃນກົດໝາຍ; 2) ການປະຕິບັດໜ້າທີ່ຂອງຜູ້ພິພາກສາໃນການພິຈາລະນາຕັດສິນ-ພິພາກສາຄະດີ ສອດຄ່ອງຕາມກົດໝາຍ ແລະ ຖືກຕ້ອງຕາມຄວາມເປັນຈິງ; 3) ການຮັບເອົາຄໍາຮ້ອງຟ້ອງຂໍຄວາມເປັນທໍາຈາກສານປະຊາຊົນ ແລະ ຄຳສະເໜີຂອງຄູ່ຄວາມ; 4) ການປະຕິບັດການຍ້ອງຍໍຜູ້ມີຜົນສຳເລັດ ແລະ ປະຕິບັດວິໄນຕໍ່ຜູ້ລະເມີດກົດໝາຍ; ເຈັດ: ເອົາໃຈໃສ່ປະສານສົມທົບກັບອົງການປົກປ້ອງກົດໝາຍ ແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນທີ່ຍັງຄ້າງຢູ່ສະພາ, ຢູ່ຫ້ອງການປະຕິບັດຄໍາຕັດສິນ ຫຼື ພາກສ່ວນອື່ນ ເພື່ອໃຫ້ຄໍາຕັດສິນໄດ້ຮັບການຈັດຕັ້ງປະຕິບັດ ເພາະລັດຖະທໍາມະນູນ, ລັດເຮົາບໍ່ອະນຸຍາດໃຫ້ຄໍາຕັດສິນທີ່ໃຊ້ໄດ້ຢ່າງເດັດຂາດແລ້ວນັ້ນບໍ່ໄດ້ຮັບການຈັດ ຕັ້ງປະຕິບັດ. ສະນັ້ນ, ຕ້ອງກວດກາ, ໄຈ້ແຍກເບິ່ງເປັນແຕ່ລະປະເພດຄະດີ, ອັນໃດຄ້າງຄາແທ້, ຫຍຸ້ງຍາກຫຍັງ, ສາເຫດແນວໃດເພື່ອຊອກຫາທາງແກ້ໄຂ, ອັນໃດແມ່ນຄວາມຮັບຜິດຊອບຂອງສານ, ຂອງໄອຍະການປະຊາຊົນ, ຂອງເຈົ້າໜ້າທີ່ຕຳຫຼວດ, ຂອງພະນັກງານປະຕິບັດຄຳຕັດສິນ ແລະ ອັນໃດແມ່ນຄວາມຮັບຜິດຊອບຂອງປະຊາຊົນ ກໍຄືຄູ່ຄວາມ. (ຂ່າວ-ພາບ: ວັນເພັງ)
ຄໍາເຫັນ