ຮ່ວມໃຈພັດທະນາກະສິກໍາຜະລິດເຂົ້າຄຸນນະພາບສູ່ສັງຄົມ

ໂອກາດດັ່ງກ່າວ, ທ່ານ ຂັນຄໍາ ເຂັມພາວັນ ປະທານສະຫະກອນ ຮ່ວມໃຈພັດທະນາ ກະສິກໍາ ໄດ້ໃຫ້ສໍາພາດວ່າ: ສະຫະກອນ ຮ່ວມໃຈພັດທະນາ ໄດ້ສ້າງຕັ້ງຂຶ້ນໃນ 26 ກໍລະກົດ 2012 ມີສະມາຊິກເຂົ້າຮ່ວມເບື້ອງຕົ້ນທັງໝົດ 22 ຄອບຄົວ ແຕ່ມາປັດຈຸບັນ 161 ຄອບຄົວ ເລີ່ມຕົ້ນ ກຸ່ມພວກເຮົາໄດ້ຮັບທຶນສະໜັບສະໜູນດ້ານປັດໃຈການຜະລິດ ແລະ ອຸປະກອນກົນຈັກກະສິກຳ ຈຳນວນ 10 ກວ່າ ລາຍການ ເຊັ່ນ: ເຄື່ອງຂັດເມັດ, ເຄື່ອງອົບແຫ້ງ, ຈັກປັ່ນເຂົ້າ, ລົດດຳນາຍ່າງຕາມ ແລະ ອື່ນໆ, ພ້ອມທັງໄດ້ຮັບການຝຶກອົບຮົມ ດ້ານເຕັກນິກການປູກເຂົ້າສິນຄ້າ, ການຜະລິດເຂົ້າແນວພັນ, ເຕັກນິກການບໍລິຫານກຸ່ມ, ຈາກໂຄງການຜະລິດກະສິກຳເປັນສິນຄ້າຂອງລັດຖະບານ, ໂດຍແມ່ນຂະແໜງການກະສິກຳ ແລະ ປ່າໄມ້ ໄດ້ຊຸກຍູ້ - ສົ່ງເສີມນໍາພາຈັດຕັ້ງປະຕິບັດເຮັດໃຫ້ກຸ່ມການຜະລິດເຂົ້າຂອງພວກເຮົາໄດ້ມີການຫັນປ່ຽນ, ຈາກທີ່ເຄີຍຜະລິດແບບທຳມະຊາດ, ນຳໃຊ້ແນວພັນເຂົ້າພື້ນບ້ານທີ່ຊາວນາເກັບຮັກສາເອງເອົາມາປູກ ຊຶ່ງມີຜົນຜະລິດຄຸນນະພາບເຂົ້າບໍ່ດີ, ເປັນເຂົ້າແຂງ ແຕ່ຜ່ານການຝຶກອົບຮົມດ້ານເຕັກນິກຕ່າງໆ, ຊາວນາກຸ່ມບ້ານຕຶງ ສາມາດຜະລິດເຂົ້າແນວພັນ ທີ່ມີຄຸນນະພາບດີຕອບສະໜອງໃຫ້ແກ່ສັງຄົມຢ່າງຕໍ່ເນື່ອງ, ເຮັດໃຫ້ກຸ່ມພວກເຮົາໄດ້ເຕີບໃຫຍ່ຂະຫາຍຕົວຢ່າງຕັ້ງໜ້າ, ເນື້ອທີ່ການຜະລິດເພີ່ມ, ນາປີ,ນາແຊງຈາກ 42.19 ເຮັກຕາ, ໃນປີ 2012 ມາເປັນ 56.2 ເຮັກຕາ ໃນປີ 2021, ສະມັດຖະພາບ 3-4 ໂຕນຕໍ່ເຮັກຕາ, ຂາຍເປັນແນວພັນ 10 -15 ໂຕນຕໍ່ປີ, ເຫຼືອນັ້ນແມ່ນຂາຍເປັນເຂົ້າສິນຄ້າທີ່ຄຸນນະພາບດີ,ການຜະລິດແນວພັນເຂົ້າຂອງກຸ່ມ ປະກອບມີ 5 ແນວພັນຄື: ແນວພັນເຂົ້າຫອມທ່າດອກຄຳ 1, ເຂົ້າຫອມທ່າດອກຄຳ 8, ເຂົ້າຫອມທ່າດອກຄຳ 15, ເຂົ້າທ່າດອກຄຳ 8 ແລະ ເຂົ້າຫອມເຊບັ້ງໄຟ 4 ຊຶ່ງເປັນທີ່ນິ ຍົມຂອງຊາວນາ ແລະ ຕະຫຼາດຕ້ອງການ, ຜ່ານການຜະລິດແນວພັນເຂົ້າ ແລະ ການຈຳໜ່າຍແນວພັນເຂົ້າ, ກຸ່ມບ້ານຕຶງໄດ້ມີເງິນທ້ອນສະສົມ 800 ກວ່າລ້ານກີບ, ສະມາຊິກພາຍໃນກຸ່ມມີລາຍຮັບເພີ່ມຂຶ້ນເລື້ອຍໆ.

ທ່ານ ຂັນຄໍາ ກ່າວຕື່ມວ່າ: ການເຂົ້າຮ່ວມງານໃນຄັ້ງນີ້ ຮູ້ສຶກດີໃຈຫຼາຍ ເພາະໄດ້ເອົາສິນຄ້າມາວາງສະແດງຂາຍໃຫ້ສັງຄົມໄດ້ຮັບຮູ້ຫຼາຍຂຶ້ນ ເມືອງເຊບັ້ງໄຟ ແຂວງຄໍາມ່ວນ ມີສູນລວມແນວພັນເຂົ້າ ສໍາລັບຊາວກະສິກອນລາວ ໂດຍການຜະລິດແນວພັນ, ມີການຄັດເລືອກເຂົ້າຢ່າງລະອຽດ ກ່ອນຂາຍ, ສ່ວນລາຄາຂາຍແມ່ນ 15 ພັນກີບຕໍ່ກິໂລ ໂດຍສະເລ່ຍແລ້ວ ສະມາຊິກພາຍໃນກຸ່ມ ສາມາດສ້າງລາຍຮັບ 20 ລ້ານກີບຕໍ່ປີ. ຖ້າທ່ານໃດຢາກໄດ້ແນວພັນເຂົ້າຄຸນນະພາບດີ ກໍສາມາດເຂົ້າມາຊື້ໄດ້ຢູ່ສູນ ຕັ້ງຢູ່ບ້ານຕຶງ ເມືອງເຊບັ້ງໄຟ ແຂວງຄໍາມ່ວນ ຫຼື ຕິດຕໍ່ໄດ້ທີ່ເບີ 02095280645.