ຫົວໜ້າພະແນກສາທາເຊກອງ ລົງຕິດຕາມຊຸກຍູ້ວຽກງານຢູ່ໂຮງໝໍແຂວງ

ທ່ານ ລັດສະໝີ ສຸພັນທອງ ອໍານວຍການໂຮງໝໍແຂວງ ໄດ້ລາຍງານການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026 ໃຫ້ຮູ້ວ່າ: ການຮັບໃຊ້ສັງຄົມຂອງໂຮງໝໍແຂວງ ເຫັນວ່າ ບັນດາພະນັກງານແພດໝໍມີຄວາມຫ້າວຫັນບຸກບືນສຸມທຸກສະຕິປັນຍາ ຄວາມຮູ້-ຄວາມສາມາດຂອງຕົນ ໃນການປິ່ນປົວ ແລະ ເບິ່ງແຍງຄົນເຈັບທີ່ເຂົ້າມາຮັບການບໍລິການ ແລະ ມີຄົນເຈັບຈາກແຂວງໄກ້ຄຽງ ເຂົ້າມາໃຊ້ບໍລິການປິ່ນປົວນັບມື້ນັບເພີ່ມຂຶ້ນ; ຊຶ່ງພາຍໃນໂຮງໝໍມີ 19 ໜ່ວຍງານທາງດ້ານວິຊາການ, ຄວາມອາດສາມາດທາງດ້ານວິຊາການແມ່ນໄດ້ກວດ ແລະ ປິ່ນປົວລະບົບເຂດນອກ, ກວດ ແລະ ຮັບເຂົ້ານອນປິ່ນປົວ, ຜ່າຕັດໃຫຍ່, ຜ່າຕັດກອງ, ຜ່າຕັດນ້ອຍ, ຊ່ວຍເກີດລູກທໍາມະດາ, ກວດວິເຄາະ, ຊ່ອງກະເພາະ, ອັນຕຣາຊາວ-ລັງສີ, ສອນພາກປະຕິບັດຕົວຈິງ ແລະ ທິດສະດີໃຫ້ກັບນັກສຶກສາທີ່ມາຝຶກງານ. ພ້ອມນີ້, ໄດ້ມີການບໍລິການພະຍາບານແບບ 24 ຊົ່ວໂມງ, ມີການໂຮມຕົວເປັນລະບົບກອງທຶນປະກັນສຸຂະພາບແຫ່ງຊາດ; ປັດຈຸ ບັນກວມເອົາ 100% ໃນທົ່ວແຂວງ, ໄດ້ອອກໃບຢັ້ງຢືນສຸຂະພາບ 199 ເທື່ອຄົນ, ກວດເຂດນອກທັງໝົດ 5,374 ເທື່ອຄົນ, ບໍລິການປົວແຂ້ວ 94 ເທື່ອຄົນ, ເອໂກ 1,268 ເທື່ອຄົນ, ລັງສີ 485 ເທື່ອຄົນ, ການສີດສານກັນແສງ ກ່ອນກວດລັງສີ (UIV) 3 ເທື່ອຄົນ, ແທກຫົວໃຈ 153 ເທື່ອຄົນ; ຄົນເຈັບນອນໂຮງໝໍ 1,812 ເທື່ອຄົນ, ປິ່ນປົວດີ 1,624 ເທື່ອຄົນ, ຂໍກັບບ້ານ 111 ເທື່ອຄົນ, ສົ່ງຕໍ່ໄປປິ່ນປົວຕ່າງແຂວງ 68 ເທື່ອຄົນ, ຄົນເຈັບເສຍຊີວິດ 9 ຄົນ; ຫຼັງຈາກລາຍງານ, ແຕ່ລະໜ່ວຍງານ ກໍໄດ້ມີການແລກປ່ຽນຄຳຄິດເຫັນ ແລະ ມີຂໍ້ສະເໜີເພື່ອປັບປຸງຄຸນນະພາບການບໍລິການດ້ານສຸຂະພາບໃນໂຮງໝໍແຂວງ ໂດຍສະເພາະ ຂອດການປັບປຸງ ຕາມນະໂຍບາຍ 5 ດີ 1 ພໍໃຈໃຫ້ດີຂຶ້ນເທື່ອລະກ້າວ ເພື່ອສ້າງຄວາມປະທັບໃຈ ແລະ ຄວາມເພິ່ງພໍໃຈຂອງຜູ້ມາໃຊ້ບໍລິການໃນໂຮງໝໍ.

ໂອກາດນີ້, ທ່ານ ນາງ ລໍາພັນ ໄຊຄໍາມີ ໄດ້ເນັ້ນໜັກໃຫ້ພະນັກງານແພດ-ໝໍ ຈົ່ງສືບຕໍ່ປະຕິບັດນະ ໂຍບາຍ 5 ດີ 1 ພໍໃຈ ຄື: ຮັບຕ້ອນດີ, ສະດວກດີ, ສະອາດດີ, ບົ່ງມະຕິຖືກຕ້ອງຊັດເຈນດີ, ປິ່ນປົວດີໄວ ແລະ ຜູ້ມາຮັບບໍລິການເພິ່ງພໍໃຈ ທັງນີ້, ແຕ່ລະທີມງານ, ຄະນະກຳມະການ ຂໍໃຫ້ສືບຕໍ່ເຄື່ອນໄຫວຢ່າງຕໍ່ເນື່ອງໃນໜ້າທີ່ຂອງຕົນ ເປັນຕົ້ນ ນຳໃຊ້ຢາປິ່ນປົວໃຫ້ສົມເຫດສົມຜົນ, ຄວບຄຸມການຕິດເຊື້ອໃນໂຮງໝໍ ເພື່ອຄວາມປອດໄພຂອງຄົນເຈັບ ພ້ອມທັງຮັກສາສິ່ງແວດລ້ອມພາຍໃນ ແລະ ນອກອາຄານ; ປຸກລະດົມແນວຄວາມຄິດປັບປຸງຫ້ອງນອນພິເສດສຳລັບຄົນເຈັບເພື່ອໃຫ້ມີຄວາມສະດວກ, ສະບາຍ, ສະອາດຂຶ້ນກວ່າເກົ່າ; ມອບໃຫ້ຄະ ນະພັກ-ຄະນະອຳນວຍການໂຮງໝໍ ນໍາພາ-ຊີ້ນໍາພະນັກງານແພດ-ໝໍ ປະຕິບັດໜ້າທີ່ດ້ວຍຄວາມຮັບຜິດຊອບສູງ; ສຳລັບບັນຫາຢາປິ່ນປົວບໍ່ພຽງພໍ ແມ່ນໃຫ້ມີການປະສານສົມທົບກັບຂະແໜງອາຫານ ແລະ ຢາໃຫ້ວ່ອງໄວ ພ້ອມລາຍງານຫາພະແນກໂດຍດ່ວນ ເພື່ອມີທິດຊີ້ນໍາແກ້ໄຂໃຫ້ທັນການ; ທີ່ສໍາຄັນໃຫ້ຮັບຟັງຄຳຄິດເຫັນຈາກປະຊາຊົນ ພ້ອມນຳມາປັບປຸງແກ້ໄຂໃນຂໍ້ຂາດຕົກບົກຜ່ອງ ແລະ ໃຫ້ຊີ້ແຈງໃນຂໍ້ຂ້ອງໃຈຂອງຜູ້ມາຮັບບໍລິການ ເພື່ອສ້າງຄວາມເຂົ້າໃຈທີ່ຖືກຕ້ອງໃນລະບົບປະກັນສຸຂະພາບ ແລະ ນະໂຍບາຍດ້ານຕ່າງໆ.

ຂ່າວ: ພຸດທະສອນ