 |
ໃນໂອກາດນີ້, ຜູ້ເຂົ້າຮ່ວມ ໄດ້ຮັບຟັງການເຜີຍແຜ່ກົດລະບຽບກອງປະຊຸມໃຫຍ່ຜູ້ແທນອົງຄະນະພັກ ຫສນຍ ຄັ້ງທີ VI ຈາກສະຫາຍ ຄົມສັນ ໄຊຍະສານ, ເລຂາໜ່ວຍພັກຮາກຖານກົມປະຊາສໍາພັນ, ຫົວໜ້າກອງເລຂາກອງປະຊຸມໃຫຍ່ຜູ້ແທນອົງຄະນະພັກ ຫສນຍ ຄັ້ງທີ VI ເພື່ອໃຫ້ບັນດາສະຫາຍຜູ້ແທນກອງປະຊຸມໃຫຍ່ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ກັບຫຼັກການ ແລະ ລະບຽບການຕ່າງໆ ຂອງກອງປະຊຸມ ເປັນຕົ້ນ ສິດ ແລະ ໜ້າທີ່ ຂອງຜູ້ແທນສົມບູນ, ການປະຕິບັດໂມງເວລາ, ການນຸ່ງຖື, ການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ພາຍໃນຫ້ອງປະຊຸມ, ການຄວບຄຸມການປ່ອນບັດ ແລະ ລົງຄະແນນສຽງ, ການປ້ອງກັນຄວາມສະຫງົບ, ການປະຕິບັດຂໍ້ຫ້າມຕ່າງໆ ທັງນີ້ ກໍ່ເພື່ອເປັນການຍົກສູງສະຕິ ແລະ ຄວາມຮັບຜິດຊອບ ຂອງບັນດາສະຫາຍຜູ້ແທນ ຕະຫຼອດໄລຍະການດຳເນີນກອງປະຊຸມໃຫຍ່ ດ້ວຍຄວາມເປັນເອກະພາບສູງ.
 |
ໃນໂອກາດດຽວກັນ, ສະຫາຍ ເລຂາຄະນະບໍລິຫານງານພັກ ຫສນຍ ຍັງໄດ້ມີຄຳເຫັນເນັ້ນໜັກຕື່ມວ່າ: ກອງປະຊຸມໃຫຍ່ຜູ້ແທນອົງຄະນະພັກ ຫສນຍ ຄັ້ງທີ VI ເປັນກອງປະຊຸມທີ່ມີຄວາມໝາຍຄວາມສຳຄັນຢ່າງຍິ່ງ, ເປັນບາດລ້ຽວປະຫວັດສາດອັນໜຶ່ງ ໃນການນຳພາ-ຊີ້ນຳ ຂອງອົງຄະນະພັກຫສນຍ ບົນພື້ນຖານຕາມທີ່ກຳນົດໄວ້ໃນກົດລະບຽບຂອງພັກປະຊາຊົນປະຕິວັດລາວສະໄໝທີ XI ເຊິ່ງກອງປະຊຸມໃຫຍ່ ຈະໄດ້ພິຈາລະນາ ແລະ ຮັບຮອງບັນຫາສຳຄັນ ເປັນຕົ້ນ ຮ່າງລາຍງານການເມືອງການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກ ຫສນຍ ຄັ້ງທີ V; ແຜນພັດທະນາວຽກງານວິຊາສະເພາະ ຫສນຍ ຄັ້ງທີ II (2026-2030); ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກ ຫສນຍ ສະໄໝທີ V; ການປ່ອນບັດເລືອກຕັ້ງຄະນະບໍລິຫານງານພັກຊຸດໃໝ່,ພ້ອມທັງດຳເນີນການເລືອກຕັ້ງຜູ້ແທນສົມບູນ ແລະ ສໍາຮອງທີ່ຈະເຂົ້າຮ່ວມກອງປະຊຸມໃຫຍ່ ຄັ້ງທີ XII ຂອງພັກ; ແລະ ພິຈາລະນາຮັບຮອງມະຕິກອງປະຊຸມໃຫຍ່ ຜູ້ແທນ ອົງຄະນະພັກ ຫສນຍ ຄັ້ງທີ VI.
 |
ສຳລັບການກະກຽມດ້ານຕ່າງໆ ເປັນຕົ້ນ ດ້ານເນື້ອໃນ, ດ້ານບຸກຄະລາກອນ, ພິທີການ-ສະຖານທີ່ ແລະ ດ້ານຂະບວນການຕ່າງໆ ທີ່ຕິດພັນ, ມາຮອດປັດຈຸບັນ ຖືວ່າມີຄວາມພ້ອມແລ້ວ ທີ່ຈະດຳເນີນກອງປະຊຸມໃຫຍ່ ຢ່າງເປັນທາງການ ໃນວັນທີ 30 ກັນຍາ 2025. ນອກຈາກນີ້, ສະຫາຍ ປະທານກອງປະຊຸມ ຍັງໄດ້ຮຽກຮ້ອງໃຫ້ຜູ້ແທນກອງປະຊຸມ ຈົ່ງພ້ອມກັນຍົກສູງຄວາມຮັບຜິດຊອບທາງດ້ານການເມືອງ ໂດຍເປັນເຈົ້າການເຂົ້າຮ່ວມການດຳເນີນກອງປະຊຸມໃຫຍ່ ຢ່າງສຸດກົກສຸດປາຍ, ປະຕິບັດລະບຽບການຕ່າງໆ ທີ່ກຳນົດໄວ້ ຢ່າງເຂັ້ມງວດ, ມີຄວາມກະຕືລືລົ້ນ ຕິດຕາມຮັບຟັງການປະກອບຄຳເຫັນຕໍ່ກອງປະຊຸມ, ເປັນເຈົ້າການການຮັກສາຄວາມສະຫງົບ ແລະ ເປັນລະບຽບຮຽບຮ້ອຍ ຢ່າງຮອບດ້ານ.
 |
ຂ່າວ ແລະ ພາບ: ກົມປະຊາສຳພັນ ຫສນຍ.
ຄໍາເຫັນ