ຮຽບຮຽງໂດຍ: ວັນໄຊ ຕະວິນຍານ
ເພື່ອຮັບປະກັນຈຸດໝາຍ ໃນການຮັກສາຄວາມສະຫງົບ,ຄວາມເປັນລະບຽບຮຽບຮ້ອຍ ຄວາມປອດໄພທາງສັງຄົມ, ຮັກສາຄວາມສະຫງົບທາງດ້ານການເມືອງ, ເສດຖະກິດ, ຮັບປະກັນຄວາມເປັນລະບຽບຮຽບຮ້ອຍ, ສະກັດກັ້ນການກະທໍາທຸກຮູບແບບຕໍ່ຄວາມໝັ້ນຄົງຂອງຊາດ.
ກອງປະຊຸມໃຫຍາຄັ້ງທີ XIII ພັກຄອມມູນິດຫວຽດນາມ ໄດ້ກໍານົດວ່າ: ເດັດດ່ຽວຮັກສາຄວາມສະຫງົບແຫ່ງຊາດ-ຄວາມເປັນລະບຽບຮຽບຮ້ອຍຂອງທົ່ວສັງຄົມ, ເປັນເຈົ້າການກະກຽມຮອບດ້ານໃນທຸກສະຖານະການ, ກຽມພ້ອມທຸກວິທີການ (ລັກສະນະສູ້ຣົບເປັນປະຈໍາ-ຕໍ່ເນື່ອງ). ຄວາມປອດໄພ ແມ່ນໜຶ່ງໃນບັນດາປັດໄຈແຖວໜ້າໃນຊີວິດການເປັນຢູ່ຂອງປະຊາຊົນ, ປົກປ້ອງຄວາມສະຫງົບແຫ່ງຊາດ ແມ່ນປົກປ້ອງຜົນປະໂຫຍດຊີວິດການເປັນຢູ່ຂອງປະຊາຊົນ...
ພັກຄອມມູນິດຫວຽດນາມ ໄດ້ກໍານົດ 6 ມາດຕະການໃຫຍ່ຕົ້ນຕໍຄື: 1, ຍົກສູງຄຸນນະພາບວຽກງານກໍ່ສ້າງພັກ, ປົກປ້ອງຮັກສາຄວາມສະຫງົບພາຍໃນພັກ ແລະ ສ້າງລັດຄຸ້ມຄອງດ້ວຍກົດໝາຍສັງຄົມນິຍົມ. 2, ພັດທະນາເສດຖະກິດຕິດພັນກັບການປ້ອງກັນຊາດ-ປ້ອງກັນຄວາມສະຫງົບຢ່າງແໜ້ນແຟ້ນ. 3,ພັດທະນາພື້ນຖານວັດທະນະທໍາທີ່ກ້າວໜ້າ ຫຼາຍສີສັນຂອງຊາດ ຍົກສູງວຽກງານໂຄສະນາສຶກສາອົບຮົມ,ຄຸນນະພາບໃນການເຄື່ອນໄຫວວຽກງານສື່ສານມວນຊົນ. 4, ປັບປຸງເສີມຂະຫຍາຍກ້ອນກໍາລັງແຮງ ມະຫາສາມັກຄີຂອງທົ່ວປວງຊົນ. 5, ປັບປຸງກໍາລັງພື້ນຖານປ້ອງກັນຊາດທົ່ວປວງຊົນ, ກໍ່ສ້າງກໍາລັງປະກອບອາວຸດປະຊາຊົນໃຫ້ເຂັ້ມແຂງ ພ້ອມສູ້ຮົບ. 6, ຈັດຕັ້ງຜັນຂະຫຍາຍແນວທາງການຕ່າງປະເທດ ເອກະລາດ, ເປັນເຈົ້າຕົນເອງ, ເຊື່ອມໂຍງສາກົນ, ສ້າງສະພາບແວດລ້ອມສາກົນ ທີ່ສະດວກໃຫ້ແກ່ການຜະລິດໃນການສ້າງສາ ແລະ ປົກປັກຮັກສາປະເທດຊາດ.
ສໍາລັບບົດຮຽນໃນການຮັກສາຄວາມສະຫງົບ,ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ. ກ່ອນອື່ນໝົດແມ່ນເຊື່ອມຊຶມທັດສະນະຂອງພັກ “ໃນການປົກປ້ອງດ້ວຍຕົນເອງ” ໝາຍວ່າ ວຽກງານປ້ອງກັນ ຕ້ອງເລີ່ມຈາກຕົນເອງ, ບຸກຄົນ ຕ້ອງເປັນເຈົ້າການເຂົ້າຮ່ວມປັບປຸງບັນດາມະຕິ, ຂໍ້ກໍານົດກ່ຽວກັບການປ້ອງກັນການເມືອງພາຍໃນ, ເພີ່ມທະວີກໍ່ສ້າງ-ປັບປຸງປົວແປງພັກຢ່າງເຂັ້ມງວດ ລວມທັງກົດລະບຽບ, ກົດໝາຍຄຸ້ມຄອງພະນັກງານ-ສະມາຊິກພັກ ເປັນປະຈໍາ. ຕ້ານແນວຄິດເຊື່ອມຖອຍ, ຄຸນສົມບັດສິນທໍາປະຕິວັດ, ແບບແຜນການດໍາລົງຊີວິດ ທີ່ກໍ່ໃຫ້ເກີດແນວຄິດຜັນແປດ້ວຍຕົນເອງ, ຫັນປ່ຽນດ້ວຍຕົນເອງ ທີ່ຈະເປັນສາເຫດເກີດຄວາມບໍ່ສະຫງົບພາຍໃນ. ການເກີດປະກົດການຫຍໍ້ທໍ້, ສໍ້ລາດບັງຫຼວງ. ໄປພ້ອມກັນນັ້ນ, ຕ້ອງສຸມໃສ່ຮັບປະກັນຄວາມສະຫງົບດ້ານວັດທະນະທໍາ, ປະສານສົມທົບຢ່າງແໜ້ນແຟ້ນລະຫວ່າງ ການອະນຸລັກ ກັບການເສີມຂະຫຍາຍສີສັນວັດທະນະທໍາຊົນຊາດ ກັບການຮັບເອົາສິ່ງຍອດຍິ່ງວັດທະນະທໍາຂອງມວນມະນຸດ. ຄົ້ນຄວ້າ ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທໍາ ແລະ ມາດຕະຖານຄົນ. ຄົ້ນຄວ້າມູນເຊື້ອປະຫວັດສາດ-ວັດທະນະທໍາການປະຕິວັດ ແລະ ສ້າງຂໍ້ກໍານົດການປະພືດທີ່ສີວິໄລ. ສິ່ງທີ່ຂາດບໍ່ໄດ້ຕົ້ນຕໍແມ່ນ: ບໍ່ອັດຕະວິໃສ, ບໍ່ປ່ອຍປະລະເລີງໃນການຮັກສາຄວາມສະຫງົບ-ຄວາມເປັນລະບຽບຮຽບຮ້ອຍ ໂດຍເລີ່ມຈາກຮາກຖານເປັນສໍາຄັນຕົ້ນຕໍ. ຍົກສູງຄວາມຮັບຜິດຊອບຂອງຜູ້ເປັນເລຂາຄະນະພັກ, ອໍານາດການປົກຄອງຂັ້ນຕ່າງໆ ຫັນເປັນລະບອບ, ລະບຽບການ, ນໍາພາຈັດຕັ້ງປະຕິບັດຢ່າງມີປະສິດທິຜົນ. ສ້າງວຽກເຮັດງານທໍາໃຫ້ປະຊາຊົນ, ແກ້ໄຂຂໍ້ຂັດແຍ່ງຢ່າງທັນການ ໂດຍບໍ່ລັງເລ ບໍ່ເລືອກປະຕິບັດ. ເອົາໃຈໃສ່ເບິ່ງແຍງ, ສ້າງກໍາລັງປະກອບອາວຸດ, ກໍາລັງ ປກສ, ກໍາລັງຮັກສາຄວາມສະຫງົບຮາກຖານໃຫ້ເຂັ້ມແຂງ ພຽງພໍ ທັງຕອບສະໜອງດ້ານອຸປະກອນອັນຈໍາເປັນໃຫ້ທັນຍຸກທັນສະໄໝ, ທັງປະຕິບັດນະໂຍບາຍ ຕໍ່ກໍາລັງຢ່າງສົມເຫດສົມຜົນ. ເອົາໃຈໃສ່ວຽກງານຂົນຂວາຍປະຊາຊົນ,ຕ້ອງໃກ້ສິດ ຕິດແທ້ກັບປະຊາຊົນຢ່າງແທ້ຈິງ. ຍົກສູງລະດັບຄວາມຮູ້ ຄວາມສາມາດ ສ້າງທ່າສະໜາມລົບໃນໃຈປະຊາຊົນ ກໍຄືຍົກລະດັບຊີວິດການເປັນຢູ່ຂອງປະຊາຊົນເຂດຫ່າງໄກສອກຫຼີກ, ເຂດຈຸດສຸມ, ສ້າງບ້ານຕົວແບບປ້ອງກັນການເມືອງເຂັ້ມແຂງ ໃນການປ້ອງກັນຄວາມສະຫງົບ, ສ້າງມາດຕະການ, ຄວາມເປັນເຈົ້າການປ້ອງກັນຢ່າງແໜ້ນໜ້ຽວ.
ຄໍາເຫັນ