ຂ່າວລະບຸວ່າ: ກະຊວງປ້ອງກັນຄວາມສະຫງົບ ແລະ ການສື່ສານຂອງຍີ່ປຸ່ນ ໄດ້ເຜີຍແຜ່ບົດລາຍງານສະຫຼຸບຂໍ້ມູນ ແລະ ການສື່ສານ ໃນປີ 2025, ໂດຍກ່າວວ່າ: ຍີ່ປຸ່ນຍັງຊັກຊ້າໃນການນຳໃຊ້ Generative AI.
ບົດລາຍງານສະຫຼຸບຂໍ້ມູນ ແລະ ການສື່ສານນີ້ ໄດ້ຖືກຈັດພິມເຜີຍແຜ່ເປັນປະຈໍາທຸກໆປີໂດຍກະຊວງປ້ອງກັນຄວາມສະຫງົບ ແລະ ການສື່ສານ ນັບຕັ້ງແຕ່ປີ 1973 ເພື່ອລາຍງານກ່ຽວກັບສະຖານະການດ້ານຂໍ້ມູນຂ່າວສານ ແລະ ການສື່ສານໃນຍີ່ປຸ່ນ.
Generative AI ຫຼື Gen AI ຊຶ່ງແມ່ນປັນຍາປະດິດທີ່ສ້າງເນື້ອຫາໃໝ່ໄດ້ຫຼາກຫຼາຍເຊັ່ນ: ຂໍ້ຄວາມ, ຮູບພາບ, ວິດີໂອ ແລະ ສຽງ. ໂດຍອາໄສການຮຽນຮູ້ຈາກຂໍ້ມູນທີ່ໄດ້ຮຽນຮູ້ ແລະ ສ້າງສັນຜົນໄດ້ຮັບໃໝ່ຂຶ້ນມາ.ຕົວຢ່າງງ່າຍໆທີ່ທຸກຄົນສາມາດເຂົ້າໃຈໄດ້ແມ່ນການສ້າງຮູບພາບແບບ Ghibli ທີ່ເຄີຍເປັນກະແສກ່ອນໜ້ານີ້.
ບົດສະຫຼຸບລ້າສຸດຂອງກະຊວງດັ່ງກ່າວລະບຸວ່າ: ມີປະຊາກອນຍີ່ປຸ່ນພຽງ 26.7% ເທົ່ານັ້ນ ທີ່ເຄີຍໃຊ້ Gen AI ຊຶ່ງເພີ່ມຂຶ້ນປະມານ 3 ເທົ່າ ຈາກ 9.1% ໃນປີງົບປະມານກ່ອນໜ້າ.
ເຖິງຢ່າງໃດກໍຕາມ, ເມື່ອທຽບໃສ່ປະຊາຄົມໂລກແລ້ວ, ກະຊວງດັ່ງກ່າວລະບຸວ່າ: ລະດັບການນຳໃຊ້ Gen AI ຂອງຍີ່ປຸ່ນແມ່ນຂ້ອນຂ້າງຕ່ຳ ເມື່ອທຽບໃສ່ຈີນ 81.2%, ສະຫະລັດ ອາເມຣິກາ 68.8% ແລະ ເຢຍລະມັນ 59.2%. ບາງຄົນອາດຈະຄິດວ່າປະຊາກອນຜູ້ອາຍຸສູງຂອງຍີ່ປຸ່ນເປັນສາເຫດ, ແຕ່ເຖິງແມ່ນວ່າຈະພິຈາລະນາສະເພາະກຸ່ມຜູ້ທີ່ມີອາຍຸ 20-29 ປີ, ອັດຕາດັ່ງກ່າວຍັງມີພຽງແຕ່ 44.7% ເທົ່ານັ້ນ. ສ່ວນຜູ້ທີ່ມີອາຍຸ 30-39 ປີແມ່ນ 23.8%, ຜູ້ທີ່ມີອາຍຸ 40-49 ປີ ແມ່ນ 29.6% ແລະ ຜູ້ທີ່ມີອາຍຸ 50 ປີຂຶ້ນໄປແມ່ນໜ້ອຍກວ່າ 20%.
ໃນຂະນະດຽວກັນ, ອັດຕາສ່ວນຂອງບໍລິສັດທີ່ໃຊ້ Gen AI ໃນການເຮັດວຽກແມ່ນໜ້ອຍກວ່າເຄິ່ງໜຶ່ງ, ຢູ່ທີ່ 49.7%.
ກະຊວງປ້ອງກັນຄວາມສະຫງົບ ແລະ ສື່ສານຍີ່ປຸ່ນ ໃຫ້ຮູ້ວ່າ: “ຍີ່ປຸ່ນ ກຳລັງຕາມຫຼັງບັນດາປະເທດທີ່ມີຄວາມກ້າວໜ້າດ້ານ AI ທັງໃນດ້ານເຕັກໂນໂລຊີ, ອຸດສາຫະກຳ ແລະ ການນຳໃຊ້. ສະນັ້ນ, ການຊຸກຍູ້ການນຳໃຊ້ AI ໃນຊີວິດປະຈຳວັນແມ່ນຈຳເປັນ.”
ຄໍາເຫັນ