ຮຽບຮຽງ:ໂດຍ ວັນໄຊ ຕະວິນຍານ
ມະຕິກອງປະຊຸມໃຫ່ຍຄັ້ງທີ XIII ຂອງພັກກອມມູນິດຫວຽດນາມໄດ້ກໍານົດແຜນນະໂຍບາຍ,ທິດທາງໜ້າທີ່ຕົ້ນຕໍແຕ່ ປີ 2021-2025,ກໍານົດຍຸດທະສາດຮອດປີ 2030,ວິໃສທັດ ຮອດປີ 2045 ສ່ອງແສງໃຫ້ເຫັນຂະບວນການພັດທະນາປະເທດຊາດໃນໄລຍະສັ້ນ,ໄລຍະກາງ ແລະ ໄລຍະຍາວ ດ້ວຍການຫັນປ່ຽນທີ່ມີລັກສະນະບາດລ້ຽວປະຫວັດສາດທີ່ສໍາຄັນຄື:ລະນຶກວັນປະເທດຊາດເປັນເອກະພາບ,ການກ້າວຂຶ້ນສັງຄົມນິຍົມຄົບຮອບ 50 ປີ,ລະນຶກວັນສ້າງຕັ້ງພັກກອມມູນິດຄົບຮອບ 100 ປີ ແລະ ວັນສ້າງຕັ້ງປະເທດຫວຽດນາມປະຊາທິປະໄຕ ຄົບຮອບ 100 ປີ.
ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມໄດ້ເນັ້ນໜັກວ່າ:ສືບຕໍ່ປ່ຽນແປງໃໝ່ຢ່າງແຂງແຮງ,ປັບປຸງແຜນຍຸດທະສາດການພັດທະນາແບບຍືນຍົງທາງດ້ານການເມືອງ,ເສດຖະກິດ-ວັດທະນະທໍາ-ສັງຄົມ,ສະພາບແວດລ້ອມ...ໃຫ້ສົມບູນແບບ ເໝາະສົມກັບພື້ນຖານເສດຖະກິດຕະຫຼາດ ຄົບຖ້ວນ ທັນສະໄໝ ແລະ ເຊື່ອມໂຍງ.
ການສືບຕໍ່ຢຶດໝັ້ນປ່ຽນແປງໃໝ່ດ້ານຈິນຕະນາການ ໃນການພັດທະນາເສດຖະກິດ-ວັດທະນະທໍາ-ສັງຄົມຕາມທິດສັງຄົມນິຍົມຂອງຫວຽດນາມ ແມ່ນສຸມໃສ່ບຸກທະລຸປັບປຸງກົດໝາຍ,ນິຕິກໍາຕ່າງໆທີ່ກ່ຽວຂ້ອງ ເປັນຕົ້ນແມ່ນກົດໝາຍວ່າດ້ວຍການຄຸ້ມຄອງທີ່ດິນ,ສິດນໍາໃຊ້ທີ່ດິນ,ຂໍ້ກໍານົດກ່ຽວກັບການກໍານົດມູນຄ່າ,ການປະມູນທີ່ດິນ,ຕະຫຼາດອະສັງຫາລິມະຊັບໃຫ້ສົມບູນແບບ; ປັບປຸງກົນໄກການຮ່ວມມືພາກລັດ-ເອກະຊົນຈັດຕັ້ງປະຕິບັດຢ່າງມີປະສິດທິຜົນ; ເພີ່ມທະວີການແບ່ງຂັ້ນ,ແບ່ງສິດຄຸ້ມຄອງໃຫ້ທ້ອງຖິ່ນປະຕິບັດບັນດາໂຄງການລົງທຶນເລັ່ງແກ້ໄຂບັນຫາຂໍ້ຄົງຄ້າງທີ່ເປັນສິ່ງອຸດຕັນ ເພື່ອໃຫ້ທ້ອງຖິ່ນມີຄວາມສາມາດໃນການຈັດຕັ້ງປະຕິບັດຢ່າງມີປະສິດທິຜົນ.
ສິ່ງສໍາຄັນອີກບັນຫາໜຶ່ງ ຫວຽດນາມໄດ້ຫັນພື້ນຖານເສດຖະກິດ-ວັດທະນະທໍາສັງ-ສັງຄົມ ໄປສູ່ລະບົບດີຈີຕອນໂດຍກົງຢ່າງໄວວາໂດຍອີງໃສ່ພື້ນຖານເຕັກໂນໂລຊີ ແລະ ປ່ຽນແປງໃໝ່ຢ່າງມີຫົວຄິດປະດິດສ້າງ ແມ່ນປັດໄຈບໍ່ມີເພດານ.ນອກຈາກນັ້ນ,ຫວຽດນາມຍັງເອົາໃຈໃສ່ດ້ານນະໂຍບາຍ,ໃນການສ້າງກົນໄກ ເສີມຂະຫຍາຍດ້ານກໍາລັງແຮງບຸກຄະລາກອນ ພັດທະນາດ້ານຄວາມສາມາດຂອງບຸກຄະລາກອນ ຊຶ່ງມັນແມ່ນແຫຼ່ງກໍາເນີດພາຍໃນ ທັງແມ່ນກໍາລັງແຮງທີ່ສໍາຄັນທີ່ສຸດຕໍ່ການພັດທະນາ.
ກ່ຽວກັບບົດບາດຂອງວັດທະນະທໍາ-ສັງຄົມ ສໍາລັບການພັດທະນາ ຫວຽດນາມກໍານົດວ່າ:ວັດທະນະທໍາ ເຍືອງທາງໃຫ້ປະຊາຊົນເດີນຕາມ,ແມ່ນພື້ນຖານດ້ານຈິດໃຈຂອງສັງຄົມ,ແມ່ນເປົ້າໝາຍ ແຫຼ່ງກໍາເນີດພາຍໃນ ແລະ ກໍາລັງແຮງອັນໃຫຍ່ຫຼວງສໍາລັບການພັດທະນາສັງຄົມແບບຍືນຍົງ.ກໍ່ສ້າງພື້ນຖານວັດທະນະທໍາຫວຽດນາມກ້າວໜ້າ,ອຸດົມສົມບູນດ້ວຍສີສັນຂອງຊາດ,ໄປພ້ອມກັບການເສີມຂະຫຍາຍຄຸນຄ່າວັດທະນະທໍາ,ກໍາລັງແຮງຂອງປະຊາຊົນຫວຽດນາມ ເຮັດໃຫ້ຄວາມມຸ່ງມາດປາຖະໜາພັດທະນາປະເທດຊາດສີວິໄລ ຄວາມຜາສຸກປະກົດຜົນເປັນຈິງ.
ຮັບຮູ້ຢ່າງເລິກເຊິ່ງຄົບຖ້ວນການພົວພັນສັດຈະວິພາກ ລະຫວ່າງ ວັດທະນະທໍາ-ສັງຄົມ ແລະ ການພັດທະນາ ທີ່ມີຄວາມໝາຍສໍາຄັນເປັນພິເສດ ເພື່ອໃຫ້ສາມາດປຸກລະດົມກໍາລັງແຮງ ປ່ຽນແປງບັນດາຊັບພະຍາກອນວັດທະນະທໍາ,ບັນດາຄຸນຄ່າແຫ່ງຊາດ,ຄຸນຄ່າວັດທະນະທໍາ ຊຶ່ງບໍ່ພຽງແຕ່ມີຄວາມເທົ່າທຽມກັນ ແຕ່ຕ້ອງຊຶມເຂົ້າເລິກແຮງຂຶ້ນກວ່າເກົ່າ ກາຍເປັນຈິດວິນຍານ ຂອງບັນດາການເຄື່ອນໄຫວດ້ານການເມືອງ,ເສດຖະກິດ,ສັງຄົມໃນຂະບວນການພັດທະນາປະເທດ.
ການພັດທະນາຂະແໜງວັດທະນະທໍາ ໃນພື້ນຖານເສດຖະກິດຕະຫຼາດ ຂອງຫວຽດນາມ ໄດ້ນໍາເອົາຄວາມຮັບຮູ້ໃໝ່ ກ່ຽວກັບບົດບາດ,ຄຸນຄ່າກໍາເນີດໂດຍພາຍໃນ ຂອງວັດທະນະທໍາ ຊຶ່ງແມ່ນຂົງເຂດທີ່ນໍາເອົາຜົນປະໂຫຍດໂດຍກົງດ້ານເສດຖະກິດ,ຍ້ອນຄວາມຫຼາກຫຼາຍດ້ານວັດທະນະທໍາ ຕິດພັນກັບການຜະລິດແລະ ການທ່ອງທ່ຽວ ສາມາດສ້າງມູນຄ່າເພີ່ມ; ຊຸກຍູ້ການເຕີບໂຕຂອງເສດຖະກິດທີ່ຍືນຍົງ.
ການພັດທະນາຂະແໜງວັດທະນະທໍາ ແມ່ນວິທີການ ເພື່ອຫັນປ່ຽນແຫຼ່ງຊັບພະຍາກອນ,ທຶນວັດທະນະທໍາ ເປັນບັນດາຜະລິດຕະພັນ ແລະ ການບໍລິການວັດທະນະທໍາໃນຕະຫຼາດ,ສ້າງບັນດາແຫຼ່ງເສດຖະກິດ ເພື່ອລົງທຶນຄືນເຮັດໃຫ້ວັດທະນະທໍາກາຍເປັນເສົ້າຄໍ້າທີ່ຂັບເຄື່ອນໃນການພັດທະນາພື້ນຖານເສດຖະກິດຢ່າງແທ້ຈິງ.
ສັງລວມແລ້ວ ການພັດທະນາວັດທະນະທໍາ ເວລາໃດກໍມີສ່ວນພົວພັນ ກະທົບຊຶ່ງກັນ ແລະ ກັນ ໃນບັນດາການພັດທະນາລວມ ແລະ ຮອບດ້ານ; ການອະນຸລັກຮັກສາມໍລະດົກ ທາງປະຫວັດສາດ,ທໍາມະຊາດຄຸນຄ່າທາງດ້ານວັດທະນະທໍາ ແມ່ນລາຍຮັບສໍາຄັນ ຍືນຍົງຂອງປະເທດຊາດ.
ຄໍາເຫັນ