ຮ້ານຄ້າຍ່ອຍໃນນະຄອນຫຼວງນິວເດລີ ລາຍງານວ່າ: ການຂຶ້ນລາຄາຄັ້ງຫຼ້າສຸດໄດ້ເຮັດໃຫ້ນ້ຳມັນແອັດຊັງເພີ່ມຂຶ້ນຈາກ 97.77 ຣູປີເປັນ 98.64 ຣູປີຕໍ່ລິດ, ໃນຂະນະທີ່ນ້ຳມັນກາຊວນເພີ່ມຂຶ້ນຈາກ 90.67 ຣູປີເປັນ 91.58 ຣູປີຕໍ່ລິດ. ການເຄື່ອນໄຫວນີ້ເກີດຂຶ້ນພຽງແຕ່ສອງສາມມື້ຫຼັງຈາກມີການຂຶ້ນລາຄານໍ້າມັນ 3 ຣູປີຕໍ່ລິດໃນວັນ 15 ພຶດສະພາ ຜ່ານມາ ຊຶ່ງເປັນການຂຶ້ນລາຄາຄັ້ງທຳອິດຂອງອິນເດຍໃນຮອບສີ່ປີ.
ປັດໄຈຫຼັກເຮັດໃຫ້ອິນເດຍຕ້ອງປັບລາຄາຂາຍຍ່ອຍພາຍໃນປະເທດແມ່ນມາຈາກລາຄານ້ຳມັນດິບທົ່ວໂລກທີ່ເພີ່ມຂຶ້ນສູງ ຊຶ່ງເກີນ 120 ໂດລາຕໍ່ບາເຣວ ກ່ອນທີ່ຈະຫຼຸດລົງເລັກນ້ອຍ. ໂດຍວິກິດການລາຄາຄັ້ງນີ້ເກີດຈາກການຢຸດສະງັກຂອງການຂົນສົ່ງໃນຊ່ອງແຄບຮໍມຸສ ຫຼັງຈາກການໂຈມຕີຂອງສະຫະລັດ ອາເມຣິກາ ແລະ ອິສຣາເອນຕໍ່ອີຣານ.
ອິນເດຍ, ໃນຖານະຜູ້ນຳເຂົ້າ ແລະ ຜູ້ບໍລິໂພກນ້ຳມັນລາຍໃຫຍ່ອັນດັບ 3 ຂອງໂລກ, ຖືເປັນປະເທດເສດຖະກິດທີ່ສຳຄັນສຸດທ້າຍທີ່ຕັດສິນໃຈຂຶ້ນລາຄານ້ຳມັນຂາຍຍ່ອຍ.
ຕະຫຼາດນ້ຳມັນຂອງອິນເດຍສ່ວນໃຫຍ່ແມ່ນຂັບເຄື່ອນໂດຍວິສາຫະກິດຂະໜາດໃຫຍ່ຄື: Indian Oil Corp, Hindustan Petroleum Corp ແລະ Bharat Petroleum Corp ຊຶ່ງຮ່ວມກັນຖືຄອງສ່ວນແບ່ງຕະຫຼາດຫຼາຍກວ່າ 90% ຈາກສະຖານີບໍລິການນ້ຳມັນຫຼາຍກວ່າ 103,000 ແຫ່ງທົ່ວປະເທດ. ໂດຍບໍລິສັດຂະໜາດໃຫຍ່ເຫຼົ່ານີ້ມັກຈະກຳນົດລາຄານ້ຳມັນໃນລັກສະນະທີ່ສອດຄ່ອງກັນ.
ຄໍາເຫັນ