ທ່ານ ນິລມາລາ ສິທາຣາມັນ ລັດຖະມົນຕີກະຊວງການເງິນອິນເດຍ ໄດ້ກ່າວໃນລະຫວ່າງການຖະແຫຼງງົບປະມານປະຈຳປີ ໃນວັນທີ 1 ກຸມພາຜ່ານມາ ວ່າ: ບໍລິສັດຕ່າງປະເທດທີ່ດໍາເນີນງານສູນຂໍ້ມູນໃນອິນເດຍຈະໄດ້ຮັບການຍົກເວັ້ນພາສີກ່ຽວກັບການສົ່ງອອກການບໍລິການຈາກອິນເດຍໄປຍັງປະເທດອື່ນໆຈົນຮອດປີ 2047. ຢ່າງໃດກໍຕາມ, ການຍົກເວັ້ນນີ້ຈະກວມເອົາພຽງແຕ່ການບໍລິການທີ່ສົ່ງອອກຈາກອິນເດຍເທົ່ານັ້ນ; ສ່ວນການບໍລິການໃຫ້ກັບຜູ້ໃຊ້ງານພາຍໃນອິນເດຍຜ່ານໜ່ວຍງານໃນທ້ອງຖິ່ນຈະຍັງຕ້ອງເສຍພາສີຕາມປົກກະຕິ.
ກ່ອນໜ້ານີ້, ອິນເດຍ ໄດ້ຈັດຕັ້ງປະຕິບັດມາດຕະການກະຕຸ້ນຫຼາຍດ້ານເຊັ່ນ: ການກຳນົດໃຫ້ສູນຂໍ້ມູນເປັນພື້ນຖານໂຄງລ່າງ ແລະ ການຜ່ອນຄາຍກົດລະບຽບການນຳໃຊ້ທີ່ດິນໃນຫຼາຍລັດ ຊຶ່ງຄວາມພະຍາຍາມລ້າສຸດນີ້ເນັ້ນໃຫ້ເຫັນເຖິງຄວາມມຸ່ງໝັ້ນທີ່ເຂັ້ມແຂງຂອງລັດຖະບານອິນເດຍໃນການຫັນປ່ຽນປະເທດທີ່ມີປະຊາກອນຫຼາຍທີ່ສຸດໃນໂລກໃຫ້ກາຍເປັນສູນກາງລະດັບໂລກດ້ານການເກັບຮັກສາຂໍ້ມູນ ແລະ ພື້ນຖານໂຄງລ່າງຄລາວ, ທ່າມກາງການຂະຫຍາຍຕົວຂອງເສດຖະກິດດີຈີຕອນ ແລະ ຂີດຄວາມສາມາດດ້ານພະລັງງານຂອງປະເທດ.
ປັດຈຸບັນ, ຄວາມຕ້ອງການສູນຂໍ້ມູນກຳລັງເພີ່ມຂຶ້ນທົ່ວໂລກ ຍ້ອນບໍລິສັດຕ່າງໆເລັ່ງການພັດທະນາລະບົບການປະມວນຜົນແບບຄລາວ ແລະ ປັນຍາປະດິດ (AI) ຊຶ່ງເຮັດໃຫ້ລັດຖະບານໃນຫຼາຍປະເທດທົ່ວໂລກແຂ່ງຂັນກັນເພື່ອຍາດແຍ່ງການລົງທຶນ.
ທັງນີ້, ບໍລິສັດໃຫຍ່ໆເຊັ່ນ: Amazon.com Inc. ແລະ Microsoft Corp. ໄດ້ເພີ່ມການລົງທຶນຢ່າງຕໍ່ເນື່ອງໃນອິນເດຍດ້ວຍງົບປະມານທັງໝົດ 52 ຕື້ໂດລາ ຊຶ່ງສະທ້ອນໃຫ້ເຫັນເຖິງສະຖານະພາບຂອງອິນເດຍໃນຖານະເປັນຕະຫຼາດສຳຄັນ ທີ່ກຳລັງເຕີບໂຕສຳລັບ AI, ການບໍລິການຄລາວ ແລະ ການຂາຍຍ່ອຍອອນລາຍ.
ນອກຈາກນັ້ນ, ລັດຖະບານອິນເດຍຍັງວາງແຜນທີ່ຈະຈັດຕັ້ງປະຕິບັດ "Safe Harbor" ໃນອັດຕາກຳໄລ 15% ມາໃຊ້ສຳລັບນິຕິບຸກຄົນໃນອິນເດຍທີ່ໃຫ້ບໍລິການສູນຂໍ້ມູນແກ່ບໍລິສັດໃນເຄືອຂ່າຍທີ່ຢູ່ຕ່າງປະເທດ. ຂໍ້ກຳນົດນີ້ຈະຊ່ວຍຫຼຸດຄວາມຫຍຸ້ງຍາກຂອງກົດລະບຽບລາຄາໂອນ (Transfer-pricing) ສຳລັບໜ່ວຍງານພາຍໃນປະເທດທີ່ສະໜັບສະໜູນການບໍລິການຄລາວແກ່ຕະຫຼາດນອກປະເທດອິນເດຍ.
ຄໍາເຫັນ