ເຈົ້າໜ້າທີ່ອິນເດຍລະບຸວ່າ: ຜູ້ເສຍຊີວິດທັງໝົດຈາກອາການເປັນລົມແດດ ເກີດຂຶ້ນໃນລັດເຕລັງການາ ທາງພາກໃຕ້ຂອງອິນເດຍ. ທ່ານ ປົງກູເລຕິ ສຣີນິວາສ ເຣດດີ ລັດຖະມົນຕີກະຊວງລາຍຮັບຂອງລັດເຕລັງການາ ໄດ້ຮຽກຮ້ອງໃຫ້ອົງການຕ່າງໆໃນທົ່ວລັດເຝົ້າລະວັງ ເພື່ອປົກປ້ອງສຸຂະພາບຂອງປະຊາຊົນຈາກອັນຕະລາຍຂອງຄື້ນຄວາມຮ້ອນ.
ຖະແຫຼງການຈາກຫ້ອງການຂອງທ່ານ ເຣດດີ ຊີ້ໃຫ້ເຫັນວ່າ: ຄວາມຮຸນແຮງຂອງສະພາບອາກາດຮ້ອນໄດ້ເພີ່ມຂຶ້ນເຖິງລະດັບທີ່ບໍ່ເຄີຍມີມາກ່ອນ ແລະ ສັ່ງໃຫ້ເຈົ້າໜ້າອອກຄຳເຕືອນລ່ວງໜ້າຕໍ່ປະຊາຊົນກ່ຽວກັບວິທີການປົກປ້ອງຕົນເອງໃນໄລຍະຄື້ນຄວາມຮ້ອນ.
ຜູ້ຊ່ຽວຊານດ້ານສຸຂະພາບເຕືອນວ່າ: ອຸນຫະພູມທີ່ສູງຫຼາຍສາມາດເຮັດໃຫ້ຮ່າງກາຍຂາດນ້ຳ, ເລືອດເຂັ້ມຂຸ້ນ ແລະ ໃນກໍລະນີທີ່ຮ້າຍແຮງ, ອະໄວຍະວະພາຍໃນລົ້ມເຫຼວໄດ້.
ເຈົ້າໜ້າທີ່ລັດເຕລັງການາຍັງໄດ້ແນະນຳຜູ້ອາຍຸສູງ, ເດັກນ້ອຍ ແລະ ແມ່ຍິງຖືພາໃຫ້ຫຼີກລ່ຽງການອອກຈາກເຮືອນ ໃນເວລາກາງເວັນ ເວັ້ນເສຍແຕ່ວ່າມີຄວາມຈຳເປັນ.
ກ່ອນໜ້ານີ້, ກົມອຸຕຸນິຍົມວິທະຍາຂອງອິນເດຍຄາດຄະເນວ່າຫຼາຍພື້ນທີ່ຂອງປະເທດຈະປະສົບກັບອຸນຫະພູມສູງກວ່າລະດັບສະເລ່ຍ ແລະ ຄື້ນຄວາມຮ້ອນຮຸນແຮງຕໍ່ເນື່ອງ..
ໃນນະຄອນຫຼວງນິວເດລີ ແລະ ບໍລິເວນອ້ອມຂ້າງ, ອຸນຫະພູມຍັງຄົງສູງກວ່າ 40 ອົງສາຕະຫຼອດອາທິດ ຊຶ່ງສົ່ງຜົນໃຫ້ມີການໃຊ້ໄຟຟ້າສູງແບບບໍ່ເຄີຍມີມາກ່ອນ. ເນື່ອງຈາກປະຊາຊົນຕ້ອງເປີດເຄື່ອງປັບອາກາດ ແລະ ພັດລົມຢ່າງກວ້າງຂວາງເພື່ອຮັບມືກັບຄວາມຮ້ອນ.
ນອກເໜືອໄປຈາກອຸນຫະພູມໃນຕອນກາງເວັນທີ່ຮ້ອນຫຼາຍແລ້ວ, ອຸນຫະພູມໃນຕອນກາງຄືນຍັງຄົງຢູ່ໃນລະດັບສູງ, ເຮັດໃຫ້ປະຊາຊົນເກືອບບໍ່ມີເວລາພັກຜ່ອນຈາກຄວາມຮ້ອນ.
ອິນເດຍ, ເປັນປະເທດທີ່ມີປະຊາກອນຫຼາຍທີ່ສຸດໃນໂລກ ແລະ ຍັງເປັນປະເທດທີ່ປ່ອຍອາຍພິດເຮືອນແກ້ວຫຼາຍເປັນອັນດັບ 3 ຂອງໂລກ ແລະ ຍັງອາໄສຖ່ານຫີນໃນການຜະລິດພະລັງງານ, ເຖິງແມ່ນວ່າລັດຖະບານໄດ້ປະກາດເປົ້າໝາຍທີ່ຈະບັນລຸການປ່ອຍອາຍພິດເຮືອນແກ້ວສຸດທິເປັນສູນພາຍໃນປີ 2070.
ທັງນີ້, ອຸນຫະພູມສູງສຸດຢ່າງເປັນທາງການທີ່ບັນທຶກໄວ້ໃນປະເທດອິນເດຍແມ່ນ 51 ອົງສາ, ວັດແທກໄດ້ທີ່ເມືອງພາໂລດີ ລັດຣາຊສະຖານ ໃນປີ 2016.
ຄໍາເຫັນ