ທ່ານ ນາເຣນດຣາ ໂມດີ ນາຍົກລັດຖະມົນຕີອິນເດຍ ໄດ້ເຂົ້າຮ່ວມເປີດກອງປະຊຸມສຸດ AI ຫຼື “AI Impact Summit” ທີ່ຈັດຂຶ້ນເປັນເວລາ 5 ວັນ ເລີ່ມແຕ່ວັນທີ 16 ກຸມພານີ້, ເພື່ອປະກາດແຜນງານຮ່ວມກັນສຳລັບການຄຸ້ມຄອງ ແລະ ການຮ່ວມມືດ້ານ AI ທົ່ວໂລກ.
ທັງນີ້, ກອງປະຊຸມສຸດຍອດ AI ໃນປະເທດອິນເດຍ ຖືເປັນກອງປະຊຸມປະຈຳປີຄັ້ງທີ 4 ທີ່ກ່າວເຖິງສິ່ງທ້າທາຍ ແລະ ໂອກາດຕ່າງໆທີ່ເກີດຂຶ້ນຈາກ AI. ສ່ວນກອງປະຊຸມສາມຄັ້ງກ່ອນໜ້ານີ້ໄດ້ຈັດຂຶ້ນທີ່ປາຣີ ປະເທດຝຣັ່ງ; ເຊອູນ ສ ເກົາຫຼີ ແລະ ສວນສາທາລະນະ Bletchley ສະຫະລາຊະອານາຈັກ.
ລັດຖະບານອິນເດຍຄາດວ່າ: ກອງປະຊຸມສຸດຍອດ AI ນີ້ຈະເປັນກອງປະຊຸມທີ່ໃຫຍ່ທີ່ສຸດເທົ່າທີ່ເຄີຍມີມາ, ໂດຍມີຜູ້ເຂົ້າຮ່ວມສູງເຖິງ 250,000 ຄົນຈາກທຸກຂະແໜງການ, ລວມທັງຜູ້ນຳລະດັບຊາດ 20 ທ່ານ ແລະ ຄະນະຜູ້ແທນລະດັບລັດຖະມົນຕີ 45 ທ່ານ.
ນອກຈາກນັ້ນ, ຍັງມີ CEO ຈາກຫຼາຍບໍລິສັດເຕັກໂນໂລຊີເຂົ້າຮ່ວມເຊັ່ນ: ທ່ານ ແຊມ ອັລແມນ ຈາກ OpenAI ແລະ ທ່ານ ສູນທອນ ພິໄຊ ຈາກ Alphabet Inc. ຢ່າງໃດກໍຕາມ, ມີລາຍງານວ່າທ່ານ ເຈນເຊນ ຮວາງCEO ຂອງ Nvidia ໄດ້ຍົກເລີກການເຂົ້າຮ່ວມຄັ້ງນີ້ຢ່າງກະທັນຫັນ.
ຜູ້ຈັດງານກ່າວວ່າ: ທ່ານ ໂມດີ ຈະພະຍາຍາມເສີມສ້າງການຮ່ວມມືທົ່ວໂລກ ແລະ ກຳນົດບົດບາດຄວາມເປັນຜູ້ນຳຂອງອິນເດຍໃນທົດສະວັດແຫ່ງປັນຍາປະດິດຜ່ານການສົນທະນາກັບບຸກຄົນສຳຄັນເຊັ່ນ: ທ່ານ ແອມມານູຍແອນ ມາຄຣົງ ປະທານາທິບໍດີຝຣັ່ງ ແລະ ທ່ານ ລູອິຊ ອິນາຊິໂອ ລູລາ ດາ ຊິລວາ ປະທານາທິບໍດີບຣາຊິນ.
ຄໍາເຫັນ