ຂ່າວລະບຸວ່າ: ໃນວັນທີ 11 ມິຖຸນາ ຜ່ານມາ, ນະຄອນຫຼວງນິວເດລີ ກຳລັງປະເຊີນກັບຄື້ນຄວາມຮ້ອນຮຸ່ນແຮງ, ໂດຍອຸນຫະພູມວັດແທກໄດ້ລະຫວ່າງ 40.9 - 45 ອົງສາ ໃນຫຼາຍຂົງເຂດ. ໂດຍສະຖານີວັດແທກອຸນຫະພູມທີ່ຮ້ອນທີ່ສຸດໃນໄລຍະຕອນບ່າຍຄື: ເຂດອາຍານາການ ວັດແທກໄດ້ 45 ອົງສາ ຂະນະທີ່ດັດສະນີຄວາມຮ້ອນສູງເຖິງ 51.9 ອົງສາ ຊຶ່ງປະສົມປະສານຄວາມຮ້ອນ ແລະ ຄວາມຊຸ່ມ.
ກົມອຸຕຸນິຍົມວິທະຍາອິນເດຍ ປະກາດເຕືອນໄພລະດັບ "ສີແດງ" ຊຶ່ງເປັນລະດັບສູງສຸດ ແລະ ແນະນຳໃຫ້ປະຊາຊົນຫຼີກລ່ຽງກິດຈະກຳກາງແຈ້ງ, ດື່ມນ້ຳຫຼາຍໆ ແລະ ລະວັງສຸຂະພາບ ໃນໄລຍະຕອນບ່າຍອາກາດຮ້ອນອົບເອົ້າ. ໂດຍຄາດວ່າສະພາບອາກາດຮ້ອນແຮງນີ້ຈະແກ່ຍາວເຖິງວັນທີ 12 ມິຖຸນາ ແລະ ຈະເລີ່ມຜ່ອນຄາຍລົງຫຼັງຈາກວັນທີ 13 ມິຖຸນາ ເມື່ອຝົນຕົກ ແລະ ລົມພາຍຸເຂົ້າມາ ແລະ ຈາກນັ້ນ, ໃນວັນທີ 14-17 ມິຖຸນາ ອຸນຫະພູມຈະຫຼຸດລົງເຫຼືອປະມານ 37-42 ອົງສາ ພ້ອມມີຝົນຕົກເລັກໜ້ອຍ ແລະ ລົມພັດແຮງຊ່ວຍຫຼຸດຜ່ອນຄວາມຮ້ອນ.
ໃນຂະນະດຽວກັນ, ຄຸນນະພາບອາກາດໃນນະຄອນຫຼວງນິວເດລີ ຢູ່ໃນລະດັບ "ບໍ່ດີ" ໂດຍມີຄ່າດັດສະນີຄຸນນະພາບອາກາດ ຢູ່ທີ່ 245 ຊຶ່ງສູງເກີນມາດຕະຖານ ແລະ ສົ່ງຜົນກະທົບຕໍ່ສຸຂະພາບຂອງປະຊາຊົນ.
ຄໍາເຫັນ