ໂຄງການດັ່ງກ່າວໄດ້ຖືກປະກາດໂດຍ ທ່ານ Ashwini Vaishnava ລັດຖະມົນຕີກະຊວງເອເລັກໂຕຣນິກ ແລະ ເຕັກໂນໂລຊີຂໍ້ມູນຂ່າວສານ ໃນວັນທີ 6 ມັງກອນ ຜ່ານມາ, ກ່ອນທີ່ນະຄອນຫຼວງນິວເດລີ ຈະເປັນເຈົ້າພາບຈັດກອງປະຊຸມສຸດຍອດ AI Impact ລະດັບໂລກໃນກາງເດືອນກຸມພາຈະມາເຖິງນີ້ ຊຶ່ງຜ່ານມາໄດ້ຈັດຂຶ້ນໃນບັນດາປະເທດເຊັ່ນ: ອັງກິດ, ສ ເກົາຫຼີ ແລະ ຝຣັ່ງ.
ທ່ານ Vaishnava ກ່າວວ່າ: ເປົ້າໝາຍຂອງໂຄງການແມ່ນເພື່ອຍົກລະດັບທັກສະ AI ໃຫ້ແກ່ໄວໜຸ່ມ ເພື່ອໃຫ້ເຂົາເຈົ້າສາມາດນຳໃຊ້ເຕັກໂນໂລຊີນີ້ເຂົ້າໃນຊີວິດປະຈຳວັນ ແລະ ການເຮັດວຽກ, ໂດຍສະເພາະໃນທຸລະກິດຂະໜາດນ້ອຍທີ່ສາມາດເພີ່ມຜົນຜະລິດຜ່ານການນຳໃຊ້ AI.
ນອກຈາກນັ້ນ, ທ່ານຍັງໄດ້ຊີ້ໃຫ້ເຫັນວ່າ: ທ່ານ ນາເຣນດາ ໂມດີ ນາຍົກລັດຖະມົນຕີອິນເດຍ ໄດ້ຊຸກຍູ້ໃຫ້ອິນເດຍກາຍເປັນສູນກາງເຕັກໂນໂລຊີລະດັບໂລກ, ໂດຍປັດຈຸບັນມີການລົງທຶນໃນສູນຂໍ້ມູນ AI ພາຍໃນປະເທດລວມທັງໝົດປະມານ 70 ຕື້ໂດລາ.
ກ່ອນໜ້ານີ້, ໃນວັນທີ 19 ທັນວາ 2025 ທ່ານ Vaishnava ໄດ້ແຈ້ງໃຫ້ລັດຖະສະພາຊາບວ່າ: ຍຸດທະສາດ ດ້ານ AI ຂອງອິນເດຍແມ່ນອີງໃສ່ວິໄສທັດຂອງທ່ານ ໂມດີ ໃນການເຮັດໃຫ້ເຕັກໂນໂລຊີສາມາດເຂົ້າເຖິງໄດ້ຢ່າງທົ່ວເຖິງ, ໂດຍສຸມໃສ່ການແກ້ໄຂບັນຫາທີ່ກ່ຽວຂ້ອງກັບສະພາບການຂອງຊາດ ພ້ອມທັງສ້າງໂອກາດ ແລະ ວຽກເຮັດງານທຳໃໝ່ໃນຂະແໜງ AI.
ທັງນີ້, ທ່ານໄດ້ອ້າງເຖິງບົດລາຍງານດັດຊະນີ AI ຂອງ Stanford ປີ 2025 ທີ່ລະບຸວ່າ: ອິນເດຍ ເປັນຜູ້ນຳໜ້າໂລກໃນການດຶງດູດບຸກຄະລາກອນ AI ດ້ວຍອັດຕາການສ້າງວຽກເຮັດງານທຳໃໝ່ປະມານ 33% ຕໍ່ປີ.
ໃນຂະນະດຽວກັນ, ທ່ານ S. Krishnan ເລຂາທິການ ກະຊວງເອເລັກໂຕຣນິກ ແລະ ເຕັກໂນໂລຊີຂໍ້ມູນຂ່າວສານຂອງອິນເດຍ ກ່າວວ່າ: ບັນດາປະເທດກໍາລັງພັດທະນາໃນພາກໃຕ້ຂອງໂລກ ຊຶ່ງມີອັດຕາສ່ວນຂອງຕໍາ ແໜ່ງວຽກໃນຫ້ອງການຕ່ຳກວ່າປະເທດທີ່ພັດທະນາແລ້ວ ແລະ ມີຄວາມສ່ຽງໜ້ອຍກວ່າທີ່ AI ຈະມີຜົນກະທົບຮ້າຍແຮງຕໍ່ການຈ້າງງານ.
ຄໍາເຫັນ