ອິນໂດເນເຊຍ-ມາເລເຊຍ-ໄທ ຂະຫຍາຍເຄືອຂ່າຍການເຮັດທຸລະກໍາດ້ວຍສະກຸນເງິນທ້ອງຖິ່ນ

ຂ່າວຕ່າງປະເທດລາຍງານວ່າ: Leaders Index ບໍລິສັດຕິດຕາມຂໍ້ມູນຂອງອົງການຈັດຕັ້ງ ເປີດເຜີຍໃນວັນທີ 5 ສິງຫາ ຜ່ານມາວ່າ: ບໍລິສັດຊັ້ນນໍາຂອງ ສ ເກົາຫຼີ ມີພະນັກງານປະຈຳ ອາຍຸ 20 ປີ ໜ້ອຍກວ່າຜູ້ທີ່ມີອາຍຸ 50 ປີຂຶ້ນໄປ ຊຶ່ງສະທ້ອນໃຫ້ເຫັນເຖິງການຫຼຸດລົງຂອງການຈ້າງງານໄວໜຸ່ມ ທ່າມກາງສະພາບເສດຖະກິດທີ່ຊ້າລົງ.

ຂ່າວຕ່າງປະເທດລາຍງານ ໃນວັນທີ 5 ສິງຫາ ຜ່ານມາວ່າ: ຄະ​ນະ​ກຳມະການທີ່​ປຶກ​ສາ​ກະ​ຊວງ​ແຮງ​ງານ ຂອງ​ຍີ່​ປຸ່ນ​ ໄດ້​ມີມະຕິ​ໃນ​ວັນ​ທີ 4 ສິງ​ຫາ ຜ່ານມາ​ ປັບ​ຂຶ້ນ​ຄ່າ​ແຮງງານ​ຂັ້ນ​ຕ່ຳ​ຕໍ່​ຊົ່ວ​ໂມງ​ໂດຍສະ​ເລ່ຍ​ທົ່ວ​ປະ​ເທດ​ 63 ເຢນ ຫຼື 6% ສູ່ລະດັບສູງສຸດແບບບໍ່ເຄີຍມີມາກ່ອນ ທີ່ 1,118 ເຢນ (7.6 ໂດ​ລາ) ສຳລັບ​ປີ​ງົບ​ປະ​ມານ 2025, ທ່າມກາງ​ຄ່າ​ຄອງ​ຊີບ​ທີ່​ເພີ່ມ​ຂຶ້ນ.

ຂ່າວສານຊີອາໄອລາຍງານ ໃນວັນທີ 5 ສິງຫາ ຜ່ານມາວ່າ: 6 ເດືອນຕົ້ນປີນີ້, ການ​ຄ້າການບໍລິການຂອງຈີນໄດ້ເຕີບໂຕຢ່າງໝັ້ນທ່ຽງ, ຍອດມູນຄ່ານໍາເຂົ້າ ແລະ ສົ່ງອອກດ້ານການບໍລິການບັນລຸ 3,887 ຕື້ 260 ລ້ານຢວນ, ເພີ່ມຂຶ້ນ 8% ເມື່ອທຽບໃສ່ໄລຍະດຽວກັນຂອງປີ 2024. ໃນນັ້ນ, ການສົ່ງອອກມີເຖິງ 1,688 ຕື້ 300 ລ້ານຢວນ, ເພີ່ມຂຶ້ນ 15%; ການນໍາເຂົ້າມີເຖິງ 2,198 ຕື້ 960 ລ້ານຢວນ, ເພີ່ມຂຶ້ນ 3.2%. ມູນຄ່າການຄ້າການບໍລິການຂາດດຸນ 510 ຕື້ 660 ລ້ານຢວນ, ຫຼຸດລົງ 152 ຕື້ 210 ລ້ານຢວນ ເມື່ອທຽບໃສ່ໄລຍະດຽວກັນຂອງປີ 2024.

ວິທະຍຸກະຈາຍສຽງຫວຽດນາມລາຍງານ ຫວ່າງມໍ່ໆມານີ້ວ່າ: ອາຊີ ສືບຕໍ່ແມ່ນຕະຫຼາດສົ່ງອອກໃຫຍ່ສຸດຂອງຫວຽດນາມ ຊຶ່ງກວມເອົາ 42.6% ຂອງມູນຄ່າທັງໝົດ.

ຂ່າວສານຊີອາໄອລາຍງານວ່າ: ເມື່ອວັນທີ 30 ກໍລະກົດ ຜ່ານມາ, ການແຂ່ງຂັນການປະດິດສ້າງ ແລະ ວິສາຫະກິດຄິດມືອາຊີບຈີນ–ອາຊຽນ ຄັ້ງທີ 3 ໄດ້ຈັດຂຶ້ນຢູ່ນະຄອນຫຼວງກົວລາລຳເປີ ປະເທດມາເລເຊຍ ໂດຍມີຫົວຂໍ້ວ່າ: “ຄວາມຮ່ວມມືດ້ານຄວາມຄິດຄົ້ນ ເພື່ອສ້າງຝັນໃຫ້ເປັນຈິງ” ຊຶ່ງໄດ້ດຶງດູດໂຄງການ ເຂົ້າຮ່ວມຈາກ 23 ປະເທດ ແລະ ພື້ນທີ່ ລວມທັງ ສປ ຈີນ (ຮວມທັງແຜ່ນດິນໃຫຍ່, ມາເກົ້າ ແລະ ໄຕ້ຫວັນ), ປະເທດອາຊຽນ 10 ປະເທດ, ສີລັງກາ, ບັງກະລາເທດ, ການາດາ, ສະຫະລັດ ອາເມຣິກາ, ອັງກິດ, ປາກິດສະຖານ, ອັຟການິສຖານ, ອຸສເບກິສຖານ, ເຟຈິ ແລະ ໂຮນລັງ ລວມທັງໝົດ 329 ໂຄງການ.

ຂ່າວສານຊີອາໄອລາຍງານ ຫວ່າງ​ມໍ່ໆ​ມາ​ນີ້ວ່າ: ທ່ານ ​ເຊີ​ເກ ບັ​ສ​ໂກ ຮອງ​ສາ​ສະ​ດາ​ຈານ​​ດ້ານເສດ​ຖະ​ສາດ​​ ມະ​ຫາ​ວິ​ທະ​ຍາ​ໄລ​ບາ​ເຊ​ໂລ​ນາ ​ປະ​ເທດ​ແອັ​ດ​ສະ​ປາຍ ​ກ່າວ​ວ່າ: ສະ​ຫະ​ພາບ​ເອີ​ຣົບ​​ຈະ​ໄດ້​ຮັບ​ຜົນ​ປະ​ໂຫຍດ​ໜ້ອຍ​ທີ່​ສຸດ​ໃນ​ສັນ​ຍາ​ການ​ຄ້າ​ສະ​ບັບ​ໃໝ່​ລະ​ຫວ່າງ​ສະ​ຫະ​ພາບ​ເອີ​ຣົບ​ ກັບ ສະຫະລັດ ​ອາ​ເມ​ຣິ​ກາ, ສ່ວນ​ເຢຍ​ລະ​ມັນ​ອາດ​ຈະ​ເປັນ​ປະ​ເທດ​ສູນ​ເສຍ​ຜົນ​ປະ​ໂຫຍດ​ຫຼາຍອັນ​ດັບ​ໜຶ່ງ​ຂອງ​ສະ​ຫະ​ພາບ​ເອີ​ຣົບ.

ຂ່າວຕ່າງປະເທດລາຍງານ ໃນວັນທີ 3 ສິງຫາ ຜ່ານມາວ່າ: ຫ້ອງການສະຖິຕິຂອງ ສ ເກົາຫຼີ ໄດ້ເປີດເຜີຍຜົນຂອງການສໍາຫຼວດລ້າສຸດ ຊຶ່ງພົບວ່າໄລຍະເວລາການນອນຫຼັບຂອງຊາວ ສ ເກົາຫຼີ ຫຼຸດລົງເປັນຄັ້ງທໍາອິດໃນປີ 2024. ໂດຍໄລຍະເວລາການນອນຫຼັບສະເລ່ຍປະຈຳວັນຂອງຜູ້ທີ່ມີອາຍຸ 10 ປີຂຶ້ນໄປ ຢູ່ທີ່ 8 ຊົ່ວໂມງ 4 ນາທີ ໃນປີຜ່ານມາ ຊຶ່ງຫຼຸດລົງຈາກ 8 ຊົ່ວໂມງ 12 ນາທີໃນປີ 2019 ແລະ ຫຼຸດລົງຄັ້ງທໍາອິດນັບຕັ້ງແຕ່ເລີ່ມເກັບກໍາຂໍ້ມູນທຸກໆ 5 ປີໃນ 1999.

ຂ່າວຕ່າງປະເທດລາຍງານ ໃນວັນທີ 3 ສິງຫາ ຜ່ານມາວ່າ: ບໍລິສັດ ໂຕໂຍຕ້າ ມໍເຕີ ໄດ້ປັບປຸງແຜນເພີ່ມກຳລັງການຜະລິດລົດທົ່ວໂລກ ສຳລັບປີ 2025 ຂຶ້ນເປັນປະມານ 10 ລ້ານຄັນ ຊຶ່ງຖືເປັນຄັ້ງທໍາອິດໃນຮອບ 2 ປີທີ່ໂຕໂຍຕ້າຜະລິດລົດລື່ນກາຍ 10 ລ້ານຄັນ.

ຂ່າວຕ່າງປະເທດລາຍງານໃນວັນທີ 4 ສິງຫາ ຜ່ານມາວ່າ: ລັດຖະບານ​ຟີ​ລິບ​ປິນ​ອາດ​ຈະ​ພິຈາລະນາ​ຢຸດຕິ​ການ​ນຳ​ເຂົ້າ​ເຂົ້າ​ເປັນ​ການ​ຊົ່ວຄາວ ​ເພື່ອ​ປົກ​ປ້ອງ​ຊາວ​ກະສິກອນ​ພາຍ​ໃນ​ປະ​ເທດ. ໂດຍກະຊວງ​ກະ​ສິກຳ​ໄດ້​ສະ​ເໜີ​ແຜນການດັ່ງກ່າວ ​ແລະ ຮຽກຮ້ອງ​ໃຫ້​ເພີ່ມ​ອັດຕາ​ພາສີ​ນຳ​ເຂົ້າ​ເຂົ້າ, ​ແຕ່​ຍັງ​ບໍ່​ທັນ​ໄດ້​ກຳນົດ​ເວລາ ແລະ ເງື່ອນ​ໄຂ.

ຂ່າວສານຊີອາໄອລາຍງານ ໃນວັນທີ 4 ສິງຫາ ຜ່ານມາວ່າ: ອີງຕາມໂຕເລກຂໍ້ມູນຫຼ້າສຸດທີ່ອົງການສ່ວຍສາອາກອນແຫ່ງຊາດຈີນເປີດເຜີຍໃຫ້ຮູ້ວ່າ: 6 ເດືອນຕົ້ນປີນີ້, ລາຍຮັບຈາກການຈໍາໜ່າຍຂອງວິສາຫະກິດໃນທົ່ວປະເທດຈີນໄດ້ຮັກສາຈັງຫວະການເຕີບໂຕຢ່າງໝັ້ນທ່ຽງ, ຂະນະທີ່ການພັດທະນາອຸດສາຫະກໍາການຜະລິດຂອງຈີນໄດ້ຮັບການຍົກລະດັບໃຫ້ມີຄຸນນະພາບສູງຂຶ້ນບົນພື້ນຖານຄວາມໝັ້ນທ່ຽງ.