 |
ຄະນະກໍາມະການປົກຄອງເມືອງກະລຶມ ແຂວງເຊກອງ ຈັດກອງປະຊຸມສະຫຼຸບວຽກງານ ປະຈຳເດືອນ 8 ແລະ ວາງແຜນປະຈຳເດືອນ 9 ປີ 2026 ໃນວັນທີ 10 ກັນຍາຜ່ານມາ, ໂດຍການເປັນປະທານຂອງທ່ານ ສີເວີນ ສິງຫາລາດ ປະທານຄະນະກຳມະການປົກຄອງເມືອງ, ມີຮອງປະທານຄະນະກຳມະການປົກຄອງເມືອງ, ຫົວໜ້າຫ້ອງການ, ຄະນະກຳມະການປົກຄອງຕາແສງ ແລະ ຂະແໜງການກ່ຽວຂ້ອງ ເຂົ້າຮ່ວມ.
ທ່ານ ສຸດສັກສິດ ຍິດແສນຫວັງ ຮອງປະທານຄະນະກຳມະການປົກຄອງເມືອງ, ຜູ້ຊີ້ນຳວຽກງານເສດຖະກິດ ລາຍງານໃຫ້ຮູ້ວ່າ: ໃນໄລຍະໜຶ່ງເດືອນຜ່ານມາ, ຄະນະກຳມະການປົກຄອງເມືອງ ໄດ້ເອົາໃຈໃສ່ປະຕິບັດແຜນພັດທະນາເສດຖະກິດ-ສັງຄົມ, ແກ້ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ ເຮັດໃຫ້ເມືອງສືບຕໍ່ມີສະຖຽນລະພາບທາງການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽງຮ້ອຍໂດຍພື້ນຖານ, ເສດຖະກິດນັບມື້ຂະຫຍາຍຕົວ, ການເກັບລາຍຮັບເຂົ້າງົບປະມານ ແລະ ການຜະລິດກະສິກໍາ (ປູກຝັງ-ລ້ຽງສັດ) ນັບມື້ມີທ່າອ່ຽງດີຂຶ້ນ, ທົ່ວເມືອງມີເນື້ອທີ່ປູກກາເຟ 58 ເຮັກຕາ, ມັນຕົ້ນ 650 ກວ່າເຮັກຕາ, ໂສມ 19 ເຮັກຕາ, ລ້ຽງແບ້ 10 ກຸ່ມ, ໝູ 9 ກຸ່ມ ແລະ ລ້ຽງໄກ່ 5 ກຸ່ມ.
 |
ພ້ອມນີ້, ກໍໄດ້ເອົາໃຈໃສ່ຕິດຕາມ, ຊຸກຍູ້ ແລະ ນໍາພາປະຕິບັດບັນດາໂຄງການລົງທຶນຂອງລັດ, ປັບປຸງ, ຟື້ນຟູ ແລະ ກໍ່ສ້າງບັນດາພື້ນຖານໂຄງລ່າງ, ເສັ້ນທາງຄົມມະນາຄົມ, ໂຮງຮຽນ, ລະບົບໄຟຟ້າ, ນໍ້າປະປາຊຸມຊົນ, ສາຍສັນຍານໂທລະສັບ/ອິນເຕີເນັດ ແລະ ອື່ນໆ ເພື່ອອໍານວຍຄວາມສະດວກການໄປ-ມາຫາສູ່, ການຕິດຕໍ່ສື່ສານ ແລະ ການແລກປ່ຽນຊື້-ຂາຍສິນຄ້າ ໃຫ້ສະດວກສະບາຍຂຶ້ນກວ່າເກົ່າ.
ທ່ານ ສຸດສັກສິດ ຍິດແສນຫວັງ ໃຫ້ຮູ້ຕື່ມວ່າ: ສໍາລັບວຽກຈຸດສຸມໃນເດືອນກັນຍາ ແມ່ນສືບຕໍ່ຕິດຕາມ, ຊຸກຍູ້ ແລະ ເຂັ້ມງວດກວດກາການຂຸດຄົ້ນຊັບພະຍາກອນທຳມະຊາດແບບຜິດກົດໝາຍ, ການກໍ່ສ້າງຊົນລະປະທານ, ປະເມີນຄອບຄົວພົ້ນທຸກຕາມດຳລັດ 348/ລບ, ຟື້ນຟູພື້ນຖານໂຄງລ່າງ ທີ່ຖືກທຳລາຍຈາກໄພພິບັດທາງທໍາມະຊາດ, ຊຸກຍູ້ການບໍລິຫານລັດດ້ວຍລະບົບເອເລັກໂຕຣນິກ, ສົ່ງເສີມການສຶກສາ-ກິລາ, ປັບປຸງການບໍລິການສາທາລະນະສຸກ, ພັດທະນາ, ຝຶກສີມືແຮງງານ, ຄຸ້ມຄອງ ແລະ ຈັດຫາງານໃຫ້ແຮງງານ ຕາມຂະແໜງການຕ່າງໆ ທີ່ຕ້ອງການແຮງງານ.
ຂ່າວ: ສັນຍາ
ຄໍາເຫັນ