ການດໍາເນີນຄະດີຕໍ່ກັບການກະທໍາຜິດກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມ

 ເພື່ອເປັນການຈັດຕັ້ງປະຕິບັດແນວທາງນະໂຍບາຍຂອງພັກ ໃນການຫັນການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍ ພ້ອມທັງເປັນການປະຕິບັດພັນທະສາກົນ ກ່ຽວກັບບັນຫາດັ່ງກ່າວ ແລະ ເພື່ອໃຫ້ມີຄວາມເປັນເອກະພາບກັນ ໃນການຈັດຕັ້ງປະຕິບັດໃນຂອບເຂດທົ່ວປະເທດ. ຫຼາຍພາກສ່ວນຈຶ່ງມີຄວາມພະຍາຍາມໃນການຊຸກຍູ້ວຽກງານການຕິດຕາມກວດກາ ການດໍາເນີນຄະດີຕໍ່ກັບການກະທໍາຜິດກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມໃຫ້ກ້າວເຂົ້າສູ່ຂະບວນການຍຸຕິທໍາ ຂອງອົງການໄອຍະການປະຊາຊົນ.

ໃນໄລະຍະທີ່ຜ່ານມາ ການຮ່ວມມືລະຫວ່າງ ອົງການອົງການໄອຍະການປະຊາຊົນສູງສຸດ ແລະ ອົງການອະນຸລັກສັດປ່າ (WCS) ພາຍໃຕ້ ໂຄງການສະໜັບສະໜູນ ສະກັດກັ້ນການຄ້າຂາຍສັດປ່າທີ່ຜິດກົດໝາຍ ຢູ່ ສປປ ລາວ ໄດ້ບັນລຸໝາກຜົນແຫ່ງຄວາມສໍາເລັດຢ່າງເພິ່ງພໍໃຈ; ຍ້ອນອົງການໄອຍະການປະຊາຊົນສູງສຸດ ແລະ ອົງການໄອຍະການປະຊາຊົນຂັ້ນທ້ອງຖິ່ນ ໃນຂອບເຂດທົ່ວປະເທດໄດ້ຮັບຮູ້ ແລະ ເຂົ້າໃຈເປັນເອກະພາບກັນວ່າ: “ອາຊະຍາກຳສັດປ່າ ເປັນອາຊະຍາກໍາໜຶ່ງທີ່ຮ້າຍແຮງ ຊຶ່ງຕິດພັນກັບເຄືອຂ່າຍອາຊະຍາກໍາຂ້າມຊາດ, ເປັນທຸລະກິດຂະໜາດໃຫຍ່ ແລະ ຍັງຕິດພັນກັບອາຊະຍາກຳອື່ນທີ່ຮ້າຍແຮງ ເຊັ່ນ: ອາຊະຍາກຳດ້ານອາວຸດ, ຢາເສບຕິດ, ການຄ້າມະນຸດ, ການຟອກເງິນ ແລະ ການກໍ່ການຮ້າຍ ເປັນຕົ້ນ”. ຍ້ອນເຫດຜົນດັ່ງກ່າວນີ້, ໃນປັດຈຸບັນ, ການດໍາເນີນຄະດີຕໍ່ກັບການກະທໍາຜິດກ່ຽວກັບຊັບພະ ຍາກອນທໍາມະຊາດ ແລະ ສິ່ງແວດລ້ອມໃຫ້ກ້າວເຂົ້າສູ່ຂະບວນການຍຸຕິທໍາໄດ້ຖືກຍົກສູງໃຫ້ເປັນອີກໜຶ່ງບຸລິມະສິດທີ່ມີຄວາມສໍາຄັນເປັນຢ່າງຍິ່ງຂອງອົງການໄອຍະການປະຊາຊົນໃນຂອບເຂດທົ່ວປະເທດ ໃນການເພີ່ມທະວີການຕິດຕາມກວດກາ ການດໍາເນີນຄະດີອາຍາທີ່ຕິດພັນກັບຊັບພະຍາກອນທໍາມະຊາດ ແລະ ສິ່ງແວດລ້ອມເວົ້າລວມ, ເວົ້າສະເພາະແມ່ນຄະດີທີ່ກ່ຽວຂ້ອງກັບສັດນໍ້າ, ສັດປ່າ ແລະ ປ່າໄມ້ ແມ່ນຫ້າມນໍາໄປແກ້ໄຂທາງດ້ານບໍລິຫານ ແລະ ຕ້ອງນໍາເຂົ້າສູ່ການດໍາເນີນຄະດີຕາມຂະບວນການຍຸຕິທໍາຢ່າງເຂັ້ມງວດ ໄປຄຽງຄູ່ກັບການກະທໍາຜິດອື່ນກໍຄືການຟອກເງິນ. ທັງນີ້ ກໍເພື່ອຮັບປະກັນການຈັດຕັ້ງປະຕິບັດແນວທາງນະໂຍບາຍຂອງພັກ, ການຫັນການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍ ພ້ອມທັງເປັນການປະຕິບັດສົນທິສົນຍາ ແລະ ສັນຍາສາກົນທີ່ກ່ຽວຂ້ອງ ກໍຄື ສົນທິສັນຍາສາກົນວ່າດ້ວຍ ການຄ້າຂາຍສັດນໍ້າ, ສັດປ່າ ແລະ ພືດປ່າ ທີ່ໃກ້ຈະສູນພັນລະຫວ່າງຊາດ (ໄຊເຕັດ - CITES).

ເພື່ອຮັບປະກັນໃຫ້ຜູ້ກະທໍາຜິດໄດ້ຮັບການລົງໂທດ. ຫົວໜ້າອົງການໄອຍະການປະຊາຊົນສູງສຸດ ຈຶ່ງໄດ້ອອກຄໍາສັ່ງ ເລກທີ 05/ອອປສ ນະຄອນຫຼວງວຽງຈັນ ລົງວັນທີ 7 ກໍລະກົດ 2025 ວ່າດ້ວຍການດໍາເນີນຄະດີຕໍ່ກັບການກະທໍາຜິດກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມ, ເຖິງບັນດາອົງການໄອຍະການປະຊາຊົນທ້ອງຖິ່ນ ແລະ ອົງການໄອຍະການທະຫານ ໃນຂອບເຂດທົ່ວປະເທດ ດັ່ງນີ້:

1). ຕໍ່ກັບຜູ້ກະທໍາຜິດກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມ ຊຶ່ງເປັນການກະທໍາຜິດທີ່ໄດ້ກໍານົດໄວ້ໃນປະມວນກົດໝາຍອາຍາ ສະບັບປີ 2017 ນັບແຕ່ ມາດຕາ 326 - 353 ແລະ ກົດໝາຍອື່ນແມ່ນຫ້າມບໍ່ໃຫ້ພະນັກງານໄອຍະການສົມທົບກັບເຈົ້າໜ້າທີ່ອົງການສືບສວນ-ສອບສວນ ທຸກພາກສ່ວນແກ້ໄຂຄະດີດ້ວຍຮູບການປັບໃໝທາງບໍລິຫານແລ້ວທໍາການຊັດມ້ຽນຄະດີ ແລະ ປ່ອຍຕົວຜູ້ກະທໍາຜິດຢ່າງເດັດຂາດ;

2). ຕໍ່ກັບການກະທໍາຜິດກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມ ຊຶ່ງເປັນການກະທໍາຜິດຕາມທີ່ກໍານົດໄວ້ໃນປະມວນກົດໝາຍອາຍາ ແລະ ກົດໝາຍອື່ນແມ່ນໃຫ້ພະນັກງານໄອຍະການ ຕິດຕາມກວດກາ ແລະ ສົມທົບກັບເຈົ້າໜ້າທີ່ກ່ຽວຂ້ອງດໍາເນີນການສືບສວນ-ສອບສວນປະກອບຫຼັກຖານໃນຄະດີຟອກເງິນໄປພ້ອມກັນຕາມກົດໝາຍ;

3). ໃນກໍລະນີມີການລະເມີດແມ່ນຈະໄດ້ຮັບຜິດຊອບຕໍ່ໜ້າກົດໝາຍຢ່າງເຂັ້ມງວດ.

ຄໍາສັ່ງດັ່ງກ່າວນີ້ສະແດງໃຫ້ເຫັນວ່າທຸກບາດກ້າວແຫ່ງການຮ່ວມມື ພາຍໃຕ້ໂຄງການສະໜັບສະໜູນສະ ກັດກັ້ນການຄ້າຂາຍສັດປ່າທີ່ຜິດກົດໝາຍ ຢູ່ ສປປ ລາວ ໃນໄລຍະທີ່ຜ່ານມາ, ຍາມໃດອົງການໄອຍະການປະຊາຊົນສູງສຸດ ກໍໄດ້ເອົາໃຈໃສ່ ແລະ ມີຄວາມພະຍາຍາມໃນການຊຸກຍູ້ວຽກງານການຕິດຕາມກວດກາ ການດໍາເນີນຄະດີີຕໍ່ກັບການກະທໍາຜິດກ່ຽວກັບຊັບພະຍາກອນທໍາມະຊາດ ແລະ ສິ່ງແວດລ້ອມ ໃນຂອບເຂດທົ່ວປະເທດໃຫ້ຖືກຕ້ອງຕາມກົດໝາຍ ແລະ ລະບຽບການທີ່ກ່ຽວຂ້ອງ ເພື່ອເປັນການຮັບປະກັນການດໍາເນີນຄະດີອາຍາໃຫ້ມີຄວາມຍຸຕິທໍາ, ຄົບຖ້ວນ, ຮອບດ້ານ, ພາວະວິໄສ ແລະ ຜູ້ກະທໍາຜິດຕ້ອງໄດ້ຮັບການລົງໂທດຕາມກົດໝາຍ.