ຖາມ: ຂໍໃຫ້ທ່ານມີຄຳເຫັນ ກ່ຽວກັບຈຸດປະສົງຂອງການນຳຄະນະຜູ້ແທນສາກົນ ໄປຢ້ຽມຢາມພາກສະໜາມ ເເລະ ການກະກຽມສຳລັບການຢ້ຽມຢາມຄັ້ງນີ້ ໄດ້ດຳເນີນໄປແນວໃດ ຢູ່ແຂວງຫຼວງພະບາງ ໃນວາລະກອງປະຊຸມ 3RC-CCM ຄັ້ງນີ້?
ຕອບ: ການນຳພາຄະນະຜູ້ແທນສາກົນ ໄປຢ້ຽມຢາມພາກສະໜາມ ເປັນສ່ວນໜຶ່ງທີ່ມີຄວາມສຳຄັນຂອງກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 (3RC-CCM) ເພື່ອໃຫ້ຄະນະຜູ້ແທນທີ່ມາຈາກທົ່ວໂລກ ໄດ້ມີໂອກາດເຫັນສະພາບຄວາມເປັນຈິງຂອງຜົນກະທົບວຽກງານກວດກູ້ ແລະ ການທຳລາຍລະເບີດ ຢູ່ພາກສະໜາມດ້ວຍຕົນເອງ. ໃນຄັ້ງນີ້, ລັດຖະບານ ໄດ້ເລືອກເອົາແຂວງຫຼວງພະບາງ ເປັນສະຖານທີ່ເພື່ອເຄື່ອນໄຫວຢ້ຽມຢາມພາກສະໜາມ ຍ້ອນເປັນແຂວງທີ່ມີການສືບຕໍ່ຈັດຕັ້ງປະຕິບັດວຽກງານດັ່ງກ່າວຢ່າງມີຜົນສໍາເລັດເປັນຮູບປະທຳ ພ້ອມທັງເປັນເມືອງທ່ອງທ່ຽວມໍລະດົກໂລກ ທີ່ມີມູນເຊື້ອທາງດ້ານວັດທະນະທຳ ແລະ ປະຫວັດສາດຂອງຊາດ.
ການຢ້ຽມຢາມພາກສະໜາມ ໄດ້ກຳນົດໄວ້ໃນວັນທີ 13 ກັນຍາ 2026, 1 ວັນກ່ອນພິທີເປີດກອງປະຊຸມຢ່າງເປັນທາງການ. ຖືຕາມການລົງທະບຽນເບື້ອງຕົ້ນ ຄາດວ່າຈະມີຄະນະຜູ້ແທນເຂົ້າຮ່ວມປະມານ 250 ກວ່າທ່ານ, ໂດຍຈະໄດ້ເດີນທາງໄປ-ກັບ ລະຫວ່າງນະຄອນຫຼວງວຽງຈັນ ແລະ ແຂວງຫຼວງພະບາງ ດ້ວຍລົດໄຟຄວາມໄວສູງລາວ-ຈີນ ຊຶ່ງເປັນວິທີການເດີນທາງທີ່ສະດວກ, ວ່ອງໄວ ແລະ ປອດໄພ ພ້ອມທັງເປັນໂອກາດອັນດີ ໃຫ້ຄະນະຜູ້ແທນສາກົນ ໄດ້ສຳຜັດກັບຄວາມກ້າວໜ້າດ້ານການພັດທະນາພື້ນຖານໂຄງລ່າງຂອງ ສປປ ລາວ ໄປພ້ອມກັນ. ຄະນະຜູ້ແທນ ຍັງຈະໄປຢ້ຽມຊົມບ່ອນວາງສະແດງ ລບຕ (UXO Visitor Center) ເພື່ອສ້າງຄວາມເຂົ້າໃຈກ່ອນຈະຮ່ວມຂະບວນໄປຢ້ຽມຢາມສະໜາມ. ພ້ອມນີ້, ພວກເຮົາຍັງໄດ້ກະກຽມແຜນສຳຮອງໄວ້ ໃນກໍລະນີສະພາບອາກາດບໍ່ເອື້ອອຳນວຍ ໂດຍຈະໄດ້ຈັດໃຫ້ຄະນະຜູ້ແທນ ໄດ້ຢ້ຽມຢາມກິດຈະກຳ ແລະ ສະຖານທີ່ອື່ນທີ່ຕິດພັນກັບວຽກງານ ລບຕ ແທນ ເພື່ອຮັບປະກັນວ່າ ຄະນະຜູ້ແທນທຸກທ່ານ ຈະໄດ້ຮັບປະສົບການອັນມີຄຸນຄ່າ ບໍ່ວ່າສະພາບອາກາດຈະເອື້ອອໍານວຍ ຫຼື ບໍ່ກໍຕາມ.
ກະຊວງການຕ່າງປະເທດ ໄດ້ຮັບການຮ່ວມມືຢ່າງໃກ້ຊິດກັບທຸກຂະແໜງການທີ່ກ່ຽວຂ້ອງ ທັງໃນຂັ້ນສູນກາງ ແລະ ທ້ອງຖິ່ນ ເພື່ອຮັບປະກັນວ່າ ການເດີນທາງ, ການຕ້ອນຮັບ ແລະ ການອຳນວຍຄວາມສະດວກ ໃຫ້ຄະນະຜູ້ແທນອີງຕາມແຜນການທີ່ວາງໄວ້ຢ່າງລະອຽດ ເພື່ອຮັບປະກັນຄວາມລະບຽບຮຽບຮ້ອຍ ແລະ ຄວາມປອດໄພ ຕະຫຼອດການເດີນທາງ.
ຖາມ: ໃນທັດສະນະຂອງທ່ານ, ການຢ້ຽມຢາມພາກສະໜາມຄັ້ງນີ້ ຈະມີຄວາມໝາຍສຳຄັນແນວໃດ ຕໍ່ຄະນະຜູ້ແທນສາກົນ ເເລະ ຂໍໃຫ້ມີຄຳເຊື້ອເຊີນຕໍ່ຄະນະຜູ້ເເທນ ກ່ອນການເດີນທາງມາຮ່ວມກອງປະຊຸມ?
ຕອບ: ຂ້າພະເຈົ້າເຊື່ອໝັ້ນວ່າ ການໄດ້ເຫັນສະພາບຄວາມເປັນຈິງ ຢູ່ພາກສະໜາມດ້ວຍຕົນເອງ ຈະສ້າງຄວາມເຂົ້າໃຈອັນເລິກເຊິ່ງ ໃຫ້ແກ່ຄະນະຜູ້ແທນ ກ່ຽວກັບຜົນກະທົບອັນແທ້ຈິງຂອງລະເບີດບໍ່ທັນແຕກ ຕໍ່ຊີວິດການເປັນຢູ່ຂອງປະຊາຊົນລາວ ພ້ອມທັງຄວາມພະຍາຍາມ ແລະ ຄວາມເສຍສະຫຼະຂອງພະນັກງານພາກສະໜາມ ໃນການແກ້ໄຂບັນຫາດັ່ງກ່າວ. ສິ່ງນີ້ຈະຊ່ວຍເສີມສ້າງຄວາມເຂົ້າໃຈ ແລະ ເພີ່ມທະວີຄວາມໝາຍໝັ້ນຮ່ວມກັນຂອງປະຊາຄົມໂລກ ຕໍ່ວຽກງານດ້ານມະນຸດສະທຳນີ້ ໃຫ້ແໜ້ນແຟ້ນຍິ່ງຂຶ້ນ.
ໃນນາມ ສປປ ລາວ, ຂ້າພະເຈົ້າຂໍເຊື້ອເຊີນຄະນະຜູ້ແທນທຸກທ່ານ ເພື່ອມາຮ່ວມກັນເປັນສັກຂີພິຍານ ໃນເສັ້ນທາງແຫ່ງຄວາມສຳເລັດ ຂອງວຽກງານແກ້ໄຂບັນຫາລະເບີດບໍ່ທັນແຕກ ຂອງ ສປປ ລາວ, ພ້ອມທັງຮ່ວມກັນສືບຕໍ່ຊຸກຍູ້ຄວາມຄືບໜ້າ ໃນການຈັດຕັ້ງປະຕິບັດສົນທິສັນຍາ CCM ເພື່ອພ້ອມກັນບັນລຸເປົ້າໝາຍໂລກທີ່ປອດໄພຈາກໄພຂົ່ມຂູ່ຂອງລະເບີດລູກຫວ່ານຢ່າງແທ້ຈິງ.
ຂ່າວ: ກຕທ
ຄໍາເຫັນ