ການເລີ່ມຕົ້ນທີ່ດີສຳລັບເສດຖະກິດ ອາເມຣິກາ ໃນປີ 2024

ຂ່າວສານຫວຽດນາມລາຍງານວ່າ: ເມື່ອບໍ່ດົນຜ່ານມານີ້, ທ່ານ ຈາເຣດ ເບີນສໄຕ ປະທານສະພາທີ່ປຶກສາດ້ານເສດຖະກິດຂອງທຳນຽບຂາວ ຂອງ ສະຫະລັດ ອາເມຣິກາ ໃຫ້ຮູ້ວ່າ: ການໃຊ້ຈ່າຍຂອງຜູ້ບໍລິໂພກສູງຂຶ້ນໃນໄລຍະວັນພັກ, ຄ່າແຮງງານເພີ່ມຂຶ້ນໃນຮອບ 9 ເດືອນທີ່ຜ່ານມາ ແລະ ຄວາມເຊື່ອໝັ້ນຂອງຜູ້ບໍລິໂພກທີ່ເພີ່ມສູງຂຶ້ນ ເປັນສັນຍານທີ່ດີຂອງການເລີ່ມຕົ້ນສໍາລັບພື້ນຖານເສດຖະກິດອາເມຣິກາໃນປີ 2024.
ຂ່າວລະບຸວ່າ: ໃນການໃຫ້ສໍາພາດກັບ "Fox News Sunday," ທ່ານຈາເຣດ ເບີນສໄຕ ຢືນຢັນວ່າ: "ຖ້າເບິ່ງທ່າອ່ຽງຂອງເສດຖະກິດ ທ່ານຈະເຫັນຕົວຂັບເຄື່ອນທີ່ແທ້ຈິງບາງຢ່າງທີ່ຈະຊ່ວຍໃຫ້ພວກເຮົາມີການເລີ່ມຕົ້ນທີ່ດີໃນປີໃໝ່."
ອີງຕາມບົດລາຍງານຂອງສະພາທີ່ປຶກສາດ້ານເສດຖະກິດໃນວັນທີ 20 ທັນວາ 2023, ຄວາມເຊື່ອໝັ້ນຂອງຜູ້ບໍລິໂພກໃນ ອາເມຣິກາ ໃນເດືອນທັນວາ 2023 ເພີ່ມຂຶ້ນໃນລະດັບສູງສຸດໃນຮອບ 5 ເດືອນ, ຊຶ່ງສະທ້ອນໃຫ້ເຫັນເຖິງການເພີ່ມຂຶ້ນເກືອບ 14% ດັດຊະນີຄວາມເຊື່ອໝັ້ນຂອງຜູ້ບໍລິໂພກ ເພີ່ມຂື້ນຫຼາຍທີ່ສຸດໃນຮອບກວ່າ 3 ທົດສະວັດ.
ຕາມຂໍ້ມູນຈາກ ທ່ານ ຈາເຣດ ເບີນສໄຕໃຫ້ຮູ້ວ່າ: ການໃຊ້ຈ່າຍຢູ່ຮ້ານອາຫານໃນ ອາເມຣິກາ ໃນໄລຍະຄຣິສມາສປີນີ້ເພີ່ມຂຶ້ນ 8% ນັບແຕ່ວັນທີ 1 ພະຈິກ ຫາວັນທີ 24 ທັນວາ 2023, ໃນນັ້ນການໃຊ້ຈ່າຍໃນການຂາຍອອນລາຍເພີ່ມຂຶ້ນ 6% ແລະ ການໃຊ້ຈ່າຍໃນຮ້ານຂາຍຍ່ອຍເພີ່ມຂຶ້ນ 3%.
ອັດຕາເງິນເຟີ້ໃນ ອາເມຣິກາ ໄດ້ຫຼຸດລົງເປັນຈຳນວນຫຼາຍໃນປີ 2023. ມາຮອດເດືອນພະຈິກ 2023, ອັດຕາເງິນເຟີ້ໄດ້ຫຼຸດລົງເຫຼືອ 3,1%, ຈາກລະດັບສູງສຸດຂອງ 9,1% ໃນເດືອນມິຖຸນາ 2022.