ຫ້ອງການ-ການເງິນເມືອງຄົງເຊໂດນ ແຂວງສາລະວັນ ໄດ້ຈັດພິທີເປີດຂະບວນການເສຍຄ່າທຳນຽມທາງ ຂຶ້ນເມື່ອບໍ່ດົນມານີ້ ທີ່ສະໂມສອນເມືອງດັ່ງກ່າວ ຊຶ່ງມີທ່ານ ສົມຈັນ ຈັນທະພູທອນ ຮອງເຈົ້າເມືອງ ຜູ້ຊີ້ນຳຂົງເຂດວຽກງານເສດຖະກິດ, ມີກໍາມະການພັກເມືອງ, ພະແນກການກ່ຽວຂ້ອງຂັ້ນແຂວງ ແລະ ເມືອງເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນ ເພື່ອຮັບຟັງການຜ່ານຄຳແນະນຳ ວ່າດ້ວຍການເສຍຄ່າທຳນຽມທາງປະຈຳປີ 2023, ອີງຕາມລັດຖະບັນຍັດວ່າດ້ວຍຄ່າທຳນຽມທາງ ສະບັບເລກທີ 001/ປປທ, ລົງວັນທີ 20 ກັນຍາ 2017 ວ່າດ້ວຍຄ່າທຳນຽມທາງ ພ້ອມທັງຜັນຂະຫຍາຍບັນດາຫຼັກການ, ລະບຽບການ, ມາດຕະການ ແລະ ກຳນົດກົນໄກ, ວິທີການໃນການຄຸ້ມຄອງຕິດຕາມກວດກາ ການເກັບຄ່າທຳນຽມທາງເພື່ອໃຫ້ຖືກຕ້ອງຄົບຖ້ວນ ຮັບປະກັນ ໃນການເກັບລາຍຮັບເຂົ້າງົບປະມານແຫ່ງລັດໃຫ້ນັບມື້ເພີ່ມຂຶ້ນ ແນໃສ່ສ້າງຄວາມເຂັ້ມແຂງທາງດ້ານງົບປະມານການເງິນໃຫ້ຂັ້ນທ້ອງຖິ່ນ ແລະ ຄວາມເປັນເອກະພາບໃນການຈັດຕັ້ງປະຕິບັດໃນຂອບເຂດທົ່ວປະເທດ ໂດຍສະເພາະແມ່ນເມືອງຄົງເຊໂດນໃຫ້ທັນກຳນົດເວລາ ແລະ ຮັບປະກັນບໍ່ໃຫ້ມີການຮົ່ວໄຫຼດ້ານງົບປະມານ ສ້າງສິ່ງອຳນວຍຄວາມສະດວກໃຫ້ແກ່ການເສຍຄ່າທຳນຽມທາງ ໃຫ້ມີຫຼາກຫຼາຍຊ່ອງທາງສະດວກວ່ອງໄວ ແລະ ທັນການ ແນໃສ່ເຮັດໃຫ້ຍານພາຫານະທີ່ນໍາໃຊ້ຢູ່ໃນເມືອງຄົງເຊໂດນ ໄດ້ເສຍຄ່າທຳນຽມທາງໃນແຕ່ລະປີໃຫ້ຄົບຖ້ວນຕາມລະບຽບການ ການຄຸ້ມຄອງເກັບຄ່າທຳນຽມທາງປະຈຳປີ 2023 ແມ່ນເກັບຜ່ານລະບົບຄ່າທຳນຽມທາງແບບເອເລັກໂທນິກ RTMS ຂອງກະຊວງການເງິນ ຊຶ່ງສາມາດສຳລະໂດຍຫຼາຍຊ່ອງທາງເປັນຕົ້ນ: ຊຳລະຜ່ານລະບົບທະນະຄານ ໂດຍນຳໃຊ້ແອັບພີເຄຊັ້ນຂອງບັນດາທະນະຄານທີ່ເຂົ້າຮ່ວມໃນໂຄງການ ແລະ ຊຳລະດ້ວຍເງິນສົດຜ່ານເຄົາເຕີ້ຂອງສ່ວຍສາອາກອນປະຈຳເມືອງ. ດັ່ງນັ້ນ, ຈຶ່ງຂໍໃຫ້ຜູ້ນຳໃຊ້ຍານພະຫະນະທຸກປະເພດຈົ່ງໄດ້ພ້ອມກັນເສຍຄ່າທຳນຽມທາງປະຈຳປີໃຫ້ຄົບຖ້ວນ ແລະ ຖືກຕ້ອງຕາມລະບຽບການ. ຈາກນັ້ນກໍໄດ້ມີການຜ່ານເອກະສານກ່ຽວກັບພາສີທີ່ດິນຈຳນວນ 2 ສະບັບຄື: ແຈ້ງການຫ້ອງການກະຊວງການເງິນ ວ່າດ້ວຍການເສຍພາສີທີ່ດິນປະຈຳປີ 2023 ແລະ ເອກະສານຄຳສັ່ງແນະນຳຂອງກົມສ່ວຍສາອາກອນ ວ່າດ້ວຍການເສຍພາສີທີ່ດິນປະຈຳປີ 2023. ຈາກນັ້ນ, ບັນດາທ່ານທີ່ເຂົ້າຮ່ວມໄດ້ມີການປະກອບຄຳຄິດຄຳເຫັນຕໍ່ກັບການຈັດຕັ້ງປະຕິບັດ ການເສຍຄ່າທຳນຽມທາງປະຈຳປີ 2023 ໃຫ້ສຳເລັດຕາມແຜນການ.
ຂ່າວ-ພາບ: ນັກຂ່າວ ຖວທ ເມືອງ
ຄໍາເຫັນ