 |
ທ່ານ ສົມກຽດ ພິເນດ ຫົວໜ້າຂະແໜງທ່ອງທ່ຽວ ພະແນກ ຖວທ ແຂວງຄໍາມ່ວນໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ວ່າ: ນັບແຕ່ຕົ້ນປີ 2025 ມາເຖິງປັດຈຸບັນ, ເພື່ອດຶງດູດການທ່ອງທ່ຽວພວກເຮົາໄດ້ຈັດກິດຈະກໍາການຂີ່ສະລິງ-ໄຕຂົວອູ່ຢູ່ໄດ້ 4 ແຫ່ງຄື: ພູຜາມ່ານ ເມືອງຄູນຄໍາ; ຂຸນກອງແລງ ເມືອງຫີນບູນ; ຖໍ້າຊຽງລຽບ ແລະ ນໍ້ານາງແອ່ນ ເມືອງທ່າແຂກ; ສ້າງບ່ອນປີນຜາໄດ້ 1 ແຫ່ງ, ກິດຈະກໍາຂີ່ເຮືອລອດຖໍ້າ 2 ແຫ່ງຄື: ຖໍ້າກອງລໍ-ນາຕານ ເມືອງຄູນຄໍາ ແລະ ຖໍ້ານໍ້າລອດເຊບັ້ງໄຟ ເມືອງບົວລະພາ; ຈຸດຕັ້ງແຄັມ 5 ແຫ່ງ; ໂຮມສະເຕໄດ້ 15 ຫຼັງ, ເສັ້ນທາງຍ່າງປ່າ 5 ລາຍການ, ທ່ຽວນໍ້າຕົກຕາດ 2 ແຫ່ງ ແລະ ທີ່ພົ້ນເດັ່ນແມ່ນກິດຈະກໍາຕາມວົງຈອນເດີລູບ (The Loop) ທີ່ກວມເອົາ 6 ຕົວເມືອງພາຍໃນແຂວງ ແລະ ທີ່ສໍາຄັນພວກເຮົາຍັງໄດ້ເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງຈັດກິດຈະກໍາສົ່ງເສີມການທ່ອງທ່ຽວຢູ່ພາຍໃນແຂວງຂຶ້ນຫຼາຍຄັ້ງເຊັ່ນ:ຈັດງານເທດສະການອາຫານ, ງານວາງສະແດງ ແລະ ຈໍາໜ່າຍສິນຄ້າຂອງທ້ອງຖິ່ນ; ຈັດການແຂ່ງຂັນກິລາເຕະບານມິດຕະພາບລາວ-ໄທ (ທ່າແຂກ-ນະຄອນພະນົມ), ຈັດການແຂ່ງຂັນກິລາປັ່ນລົດຖີບມິດຕະພາບລາວ-ໄທ, ງານຄອນເສີດ ແລະ ອື່ນໆ.
ຄຽງຄູ່ກັບການພັດທະນາສົ່ງເສີມການທ່ອງທ່ຽວ ທາງພະແນກ ຖວທ ຂອງແຂວງ ຍັງໄດ້ເອົາໃຈໃສ່ປະສານສົມທັບກັບເຈົ້າໜ້າທີ່ກ່ຽວຂ້ອງ ເຄື່ອນໄຫວຕິດຕາມ, ກວດກາ ຄຸ້ມຄອງ ບັນດາຫົວໜ່ວຍທຸລະກິດຜູ້ປະກອບການດ້ານການທ່ອງທ່ຽວ ຢູ່ພາຍໃນແຂວງຢ່າງໃກ້ຊິດ, ປັບປຸງເຮືອນພັກ, ໂຮງແຮມ ແລະ ຮ້ານອາຫານ ໂດຍໄດ້ຊຸກຍູ້ໃຫ້ຜູ້ປະກອບການປັບປຸງອາຄານສະຖານທີ່ຂອງຕົນໃຫ້ມີຄວາມສະອາດງາມຕາຢູ່ສະເໝີ, ຮັກສາສະພາບແວດລ້ອມທັງພາຍໃນ ແລະ ພາຍນອກສະຖານທີ່ໃຫ້ສະອາດງາມຕາ, ບໍລິການດ້ວຍຄວາມປະທັບໃຈ ແລະ ບໍ່ເອົາປ່ຽບລູກຄ້າ; ສະຖານທີ່ທ່ອງທ່ຽວແມ່ນໃຫ້ເອົາໃຈໃສ່ຮັກສາຄວາມສະຫງົບປອດໄພພາຍໃນສະຖານທີ່ຢ່າງເຂັ້ມງວດ, ປັບປຸງສິ່ງອໍານວຍຄວາມສະດວກພາຍໃນແຫຼ່ງທ່ອງທ່ຽວໃຫ້ໄດ້ມາດຕະຖານມີຄວາມພ້ອມເພື່ອຮອງຮັບແຂກນັກທ່ອງທ່ຽວ ຕະຫຼອດເວລາ; ສະຖານທີ່ບັນເທີງ-ຮ້ານກິນດື່ມ ແມ່ນໃຫ້ເອົາໃຈໃສ່ປະຕິບັດໂມງເວລາເປີດ-ປິດຕາມລະບຽບການຢ່າງເຂັ້ມງວດ, ຫ້າມນໍາໃຊ້ສະຖານທີ່ຂອງຕົນເປັນບ່ອນຄ້າຂາຍປະເວນີ, ມົ້ວສຸມສິ່ງເສບຕິດ ແລະ ທີ່ສໍາຄັນແມ່ນຫ້າມເດັກທີ່ມີອາຍຸຕໍ່າກວ່າ 18 ປີເຂົ້າໃຊ້ບໍລິການໃນສະຖານທີ່ຂອງຕົນຢ່າງເດັດຂາດ. ເພື່ອເຮັດໃຫ້ຜູ້ປະກອບການທ່ອງທ່ຽວຫັນເຂົ້າສູ່ລະບົບລະບຽບ ໄລຍະ 1 ເດືອນຜ່ານມາ ທາງພະແນກກໍໄດ້ມີການຈັດກອງປະຊຸມ ເຜີຍແຜ່ແນະນໍາ ຄໍາສັ່ງຂອງ ທ່ານເຈົ້າແຂວງ ສະບັບເລກທີ 02/ຈຂ ລົງວັນທີ 21 ພຶດສະພາ 2025 ວ່າດ້ວຍການຄຸ້ມຄອງທຸລະກິດບໍລິການສະຖານທີ່ພັກແຮມ, ຮ້ານອາຫານ, ຮ້ານກິດດື່ມ, ສະຖານທີ່ບັນເທີງ ທົ່ວແຂວງຄໍາມ່ວນ ຊຶ່ງມີພາກລັດ ແລະ ຫົວໜ່ວຍທຸລະກິດເຂົ້າຮ່ວມ 200 ກວ່າຫົວໜ່ວຍ.
ຜ່ານການຈັດຕັ້ງປະຕິບັດບັນດາມາດຕະການສົ່ງເສີມການທ່ອງທ່ຽວຕ່າງໆທີ່ກ່າວມານັ້ນ ເຫັນວ່າການທ່ອງທ່ຽວຂອງແຂວງຄໍາມ່ວນແມ່ນມີການຂະຫຍາຍຕົວດ້ວຍຈັງຫວະທີ່ດີຂຶ້ນເທື່ອລະກ້າວ ມີນັກລົງທຶນ ແລະ ນັກທ່ອງທ່ຽວເຂົ້າມາແຂວງຄໍາມ່ວນ ນັບມື້ນັບຫຼາຍຂຶ້ນ, ພຽງແຕ່ໄລຍະ 5 ເດືອນຕົ້ນປີ 2025 ມີນັກທ່ອງທ່ຽວເຂົ້າມາຢ້ຽມຢາມແຂວງຄໍາມ່ວນ ເຖິງ 774,427 ເທື່ອຄົນ ທຽບໃສ່ໄລຍະດຽວກັນຂອງປີ ຜ່ານມາເພີ່ມຂຶ້ນ 506,623 ເທື່ອຄົນ, ເທົ່າກັບ 189%. ໃນນັ້ນ, ມີນັກທ່ອງທ່ຽວພາຍໃນ 525,577 ເທື່ອຄົນ, ເພີ່ມຂຶ້ນ 425,955 ເທື່ອຄົນ, ເທົ່າກັບ 428%, ນັກທ່ອງທ່ຽວສາກົນ 248,850 ເທື່ອຄົນ, ເພີ່ມຂຶ້ນ 80,668 ເທື່ອຄົນ, ເທົ່າກັບ 48%, ລວມເງິນສະພັດ 54,153,911 ໂດລາ.
ທ່ານ ສົມກຽດ ພິເນດ ກ່າວຕື່ມວ່າ: ເພື່ອເຮັດໃຫ້ວຽກງານພັດທະນາສົ່ງເສີມການທ່ອງທ່ຽວຂອງແຂວງຄໍາມ່ວນ ມີການຂະຫຍາຍຕົວໃນຕໍ່ໜ້າທາງພະແນກ ຖວທ ແຂວງ ຈະສືບຕໍ່ເອົາໃຈໃສ່ຕິດຕາມ, ຊຸກຍູ້ພາກລັດ ແລະ ທຸລະກິດປັບປຸງຄຸນນະພາບການບໍລິການດ້ານການທ່ອງທ່ຽວໃຫ້ມີຄວາມປະທັບໃຈ, ອົບອຸ່ນຄ້າຍຄືຄອບຄົວດຽວກັນ, ມີຄວາມເປັນທຳ ແລະ ຮັບປະກັນຄວາມປອດໄພເຮັດໃຫ້ນັກທ່ອງທ່ຽວມາແລ້ວກໍຢາກກັບມາຕື່ມອີກ. ເພີ່ມທະວີການໂຄສະນາ ໂດຍນໍາໃຊ້ພາຫະນະສື່ມວນຊົນທັງພາຍໃນ ແລະ ຕ່າງປະເທດເພື່ອຊ່ວຍເປັນກະບອກສຽງໂຄສະນາຢ່າງກວ້າງຂວາງ ແລະ ທົ່ວເຖິງ. ເພື່ອໃຫ້ນັກທ່ອງທ່ຽວໄດ້ຮັບຮູ້ ເເລະ ເຂົ້າເຖິງຂໍ້ມູນຂ່າວສານສະດວກສະບາຍຂຶ້ນ ເຮັດໃຫ້ການທ່ອງທ່ຽວຂອງແຂວງຄຳມ່ວນ ບັນລຸຜົນສໍາເລັດຕາມຈຸດປະສົງ ແລະ ລະດັບຄາດ ໝາຍທີ່ວາງໄວ້. ທີ່າສໍາຄັນແມ່ນການນໍາສະເໜີອຸທິຍານແຫ່ງຊາດຫີນໜາມໜໍ່ ເມືອງບົວລະພາ ເຂົ້າເປັນມໍລະດົກໂລກ ທາງທໍາມະຊາດ ແຫ່ງທໍາອິດຂອງ ສປປ ລາວ ໃນອະນາຄົດອັນໃກ້ນີ້ ຊຶ່ງຈະເປັນອີກທ່າແຮງໜຶ່ງໃນການດຶງດູດນັກທ່ອງທ່ຽວ ເຂົ້າມາທ່ຽວແຂວງຄຳມ່ວນ ພ້ອມແລ້ວທີ່ຈະອຳນວຍຄວາມສະດວກ ແລະ ຍິນດີຕ້ອນຮັບທຸກໆທ່ານ ເຂົ້າສູ່ດິນແດນ: ພະທາດສີໂຄດຕະບອງງາມສະຫງ່າ, ລໍາຜະຫຍາມະຫາໄຊ, ກໍາແພງໃຫຍ່ພູຄັນນາ, ຜາຫີນໜາມໜໍ່, ບໍ່ໄຟຟ້ານໍ້າເທີນ 2, ກອງລໍ-ນາຕານນໍ້າລອດຖໍ້າ, ວິລະກໍາ 21 ມີນາ 1946.
ຄໍາເຫັນ