ທ່ານ ສີຈິ້ນຜິງ ປະທານປະເທດຈີນໄດ້ເດີນທາງໄປຢ້ຽມຢາມຮົງກາຣີທາງລັດຖະກິດ ແຕ່ວັນທີ 8 ຫາ 10 ພຶດສະພາ ຜ່ານມາ. ໃນໄລຍະການຢ້ຽມຢາມ, ຜູ້ນຳທັງສອງປະເທດໄດ້ອອກຖະແຫຼງການຮ່ວມ ໂດຍໄດ້ປະກາດຍົກການພົວພັນຈີນ-ຮົງກາຣີ ຈາກການພົວພັນຄູ່ຮ່ວມຍຸດທະສາດຮອບດ້ານຂຶ້ນເປັນການພົວພັນຄູ່ຮ່ວມຍຸດທະສາດຮອບດ້ານທຸກສະພາບການໃນຍຸກໃໝ່. ນັກວິເຄາະເຫັນວ່າ: ການຍົກລະດັບການພົວພັນລະຫ່ວາງສອງປະເທດໃນຄັ້ງນີ້ໝາຍຄວາມວ່າ: ຄວາມໄວ້ເນື້ອເຊື່ອໃຈກັນທາງການເມືອງ, ຄວາມເຫັນທີ່ເປັນເອກະພາບດ້ານຍຸດທະສາດ, ການຮ່ວມມື ແລະ ການປະສານງານລະຫວ່າງສອງປະເທດດັ່ງກ່າວລ້ວນແຕ່ຈະກ້າວຂຶ້ນສູ່ລະດັບໃໝ່.
ທ່ານ ສີຈິ້ນຜິງ ຊີ້ອອກວ່າ: ສອງຝ່າຍຄວນສືບຕໍ່ຢຶດໝັ້ນສະໜັບສະໜູນຜົນປະໂຫຍດແກນກາງ ແລະ ສິ່ງທີ່ເອົາໃຈໃສ່ເປັນຢ່າງຍິ່ງຂອງກັນ ແລະ ກັນ; ເພີ່ມທະວີການເຊື່ອມຕໍ່ດ້ານຍຸດທະສາດການພັດທະນາຂອງສອງປະເທດ, ຕັ້ງໜ້າເປີດກວ້າງການຮ່ວມມືໃນຂົງເຂດຈະເລີນໃໝ່ຕ່າງໆ ເຊັ່ນ: ພະລັງງານທີ່ສະອາດ, ປັນຍາປະດິດ ແລະ ອື່ນໆ; ສືບຕໍ່ສະໜັບສະໜູນການສິດສອນດ້ານພາສາຂອງສອງປະເທດ ແລະ ເພີ່ມທະວີການແລກປ່ຽນດ້ານວັດທະນະທຳ; ເພີ່ມທະວີການແລກປ່ຽນ ແລະ ປະສານງານຫຼາຍຝ່າຍ, ປົກປັກຮັກສາຄວາມຍຸຕິທຳ ແລະ ຄວາມເປັນທຳໃນສາກົນ ແລະ ອື່ນໆ ຊຶ່ງໄດ້ຊີ້ທິດເຍືອງທາງໃຫ້ແກ່ການຂະຫຍາຍການພົວພັນຈີນ-ຮົງກາຣີໃນອະນາຄົດ.
ທ່ານ ວິກເຕີ ໂອບັນ ນາຍົກລັດຖະມົນຕີຮົງກາຣີ ເຄີຍກ່າວວ່າ: 10 ກວ່າປີກ່ອນ, ຕົນກໍຮູ້ສຶກວ່າ: ການພັດທະນາຂອງຮົງກາຣີໃນອະນາຄົດຈະຕັດສິນຢູ່ນຳການພົວພັນກັບຈີນໃນລະດັບສູງສົມຄວນ. ປັດຈຸບັນ, ການພົວພັນຈີນ-ຮົງກາຣີໄດ້ກ້າວຂຶ້ນສູ່ລະດັບໃໝ່ອີກ, ສອງຝ່າຍຈະຕັ້ງໜ້າຮ່ວມມືກັນຢ່າງແໜ້ນແຟ້ນກວ່າເກົ່າ ໃນຂະບວນການບັນລຸຄວາມທັນສະໄໝຂອງກັນ ແລະ ກັນ ເພື່ອບັນລຸການພັດທະນາຮ່ວມກັນ ແລະ ຈະເລີນຮຸ່ງເຮືອງຮ່ວມກັນ ພ້ອມທັງນຳພາການຮ່ວມມືລະຫວ່າງຈີນກັບບັນດາປະເທດໃນພາກພື້ນເອີຣົບກາງ ແລະ ເອີຣົບຕາເວັນອອກຂະຫຍາຍຕົວເຂົ້າສູ່ລວງເລິກຢ່າງໜັກແໜ້ນ. ການພົວພັນຈີນ-ຮົງກາຣີທີ່ໄດ້ເດີນເຂົ້າ “ຊ່ອງທາງຄຳເດີນເຮືອ” ໄດ້ພົບໂອກາດໃໝ່.
ໂດຍ: ຊີອາໄອ
ຜູ້ຊ່ຽວຊານເຕືອນ ອາຫານປຸງແຕ່ງສູງ ສາມາດກິນໄດ້ໃນລະດັບປານກາງ
ຂ່າວຕ່າງປະເທດລາຍງານ ເມື່ອບໍ່ດົນມານີ້; ໜັງສືພິມ Washington Post ລາຍງານວ່າ: ເຖິງແມ່ນວ່າການຄົ້ນຄວ້າຫຼາຍໆຄັ້ງຈະພົບວ່າ ການບໍລິໂພກອາຫານທີ່ປຸງແຕ່ງສູງ (ultra-processed food) ຫຼື ອາຫານທີ່ຜ່ານການປຸງແຕ່ງຫຼາຍເປັນພິເສດເຊັ່ນ: ພິດຊາແຊ່ແຂງ ໃນປະລິມານຫຼາຍ ກ່ຽວຂ້ອງກັບຄວາມສ່ຽງທີ່ເພີ່ມຂຶ້ນຂອງພະຍາດຊໍາເຮື້ອ. ແຕ່ຜູ້ຊ່ຽວຊານດ້ານສຸຂະພາບແນະນໍາວ່າບໍ່ຄວນຫຼີກລ່ຽງອາຫານເຫຼົ່ານີ້ທັງໝົດ, ແຕ່ຄວນຈໍາກັດປະລິມານການບໍລິໂພກ.
ຄໍາເຫັນ