ມີຄວາມດຸໝັ່ນຂະຫຍັນ ແລະ ອົດທົນເພື່ອສ້າງເສດຖະກິດຄອບຄົວໃຫ້ດີຂຶ້ນ. ສະນັ້ນ, ໃນປີ 2011 ຈຶ່ງໄດ້ປຶກສາຫາລືກັບຄອບຄົວ ເພື່ອຊອກຫາທາງອອກ ແລະ ຫັນມາປະກອບອາຊີບປູກຝັງ ແລະ ລ້ຽງສັດແບບປະສົມປະສານ ໃນໄລເບື້ອງຕົ້ນໄດ້ລິເລີ່ມ ປູກໝໍແຍ້ຈໍານວນ 2.000 ຕົ້ນ, ປູກໄມ້ເກດສະໜາ ແລະ ລ້ຽງຄວາຍມີ 15 ໂຕ, ງົວ 28 ໂຕ. ມາຮອດປີ 2016 ຈຶ່ງໄດ້ຂາຍແກ່ນແຍ້ ແລະ ຍອດແຍ້, ຂາຍງົວ ສາມາດສ້າງລາຍຮັບໃຫ້ຄອບຄົວໄດ້ 100 ລ້ານກີບຕໍ່ປີ, ເຮັດໃຫ້ຄອບຄົວມີລາຍຮັບເພີ່ມຂຶ້ນ, ຊີວິດການເປັນຢູ່ດີຂຶ້ນ, ມີວຽກເຮັດງານທໍາ, ມີລາຍຮັບໝັ້ນຄົງ, ຍືນຍົງ. ເມື່ອເຫັນໄດ້ແນວນັ້ນຕົນເອງຍິ່ງມີກຳລັງໃຈ ແລະ ເຊື່ອໝັ້ນວ່າອາຊີບກະສິກຳປູກຝັງ ແລະ ລ້ຽງສັດຈະເຮັດໃຫ້ຄອບຄົວມີຊີວີດການເປັນຢູ່ທີ່ດີຂຶ້ນໄດ້ແນ່ນອນ, ຂ້າພະເຈົ້າຈຶ່ງຢາກລົງທຶນພັດທະນາຂະຫຍາຍກິດຈະກໍາເພີ່ມແຕ່ເງິນທີ່ຂາຍໄດ້ໃນແຕ່ລະປີເຫັນວ່າບໍ່ພຽງພໍໃນການລົງທຶນຈຶ່ງໄດ້ຕັດສິນໃຈໃນການກູ້ຢືມເງິນຈາກທະນາຄານນະໂຍບາຍຈໍານວນ 70 ລ້ານກີບ ເພື່ອມາຊື້ຄວາຍ ແລະ ບຸກເບີກພື້ນທີ່ເພີ່ມຈໍານວນໜຶ່ງ, ໃນປີຕໍ່ມາເຫັນວ່າຄວາຍມີຈຳນວນເພີ່ມຂຶ້ນ ແລະ ຂາຍຄວາຍຈຳນວນໜຶ່ງເຮັດໃຫ້ມີລາຍຮັບຈາກການຂາຍສັດ ແລະ ມູນສັດ (ຝຸ່ນຂີ້ສັດ) ດັ່ງກ່າວຍັງໄດ້ນໍາໄປໃຊ້ເຂົ້າໃນການປູກພືດຜັກເພື່ອບໍລິໂພກ ແລະ ຂາຍອອກສູ່ຕະຫຼາດໃນແຕ່ລະປີ.
ມາຮອດປັດຈຸບັນການປູກພືດເປັນສິນຄ້າໝູນວຽນຕາມລະດູການເຊັ່ນ: ປູກກະລໍາປີ, ຜັກກາດຂາວ, ໝາກຖົ່ວຍາວ, ປູກສາລີຫວານຈໍານວນ 25,000 ຂຸມ ເນື້ອທີ່ 4.4 ເຮັກຕ່າ, ປູກຕົ້ນໄມ້ໃຫ້ ໝາກ ເຊັ່ນ: ໝາກມ່ວງ, ໝາກເງາະ, ລີ້ນຈີ່, ລໍາໄຍ, ລໍາມຸດ, ໝາກກ້ຽງລວມທັງໝົດ 1,700 ຕົ້ນ ແລະ ລ້ຽງສັດປະເພດຄວາຍ 36 ໂຕ, ລ້ຽງງົວ 57 ໂຕ, ໄກ່ລາດພໍ່ແມ່-ພັນ 30ໂຕ, ເປັດພໍ່ແມ່-ພັນ 30 ໂຕ ສາມາດສ້າງລາຍຮັບໃນແຕ່ລະປີຄື: ລາຍຮັບຈາກການຂາຍງົວ, ຄວາຍ 90 ລ້ານກີບຕໍ່ປີ, ລາຍຮັບຈາກການຂາຍໝາກໄມ້ 85 ລ້ານກີບຕໍ່ປີ, ລາຍຮັບຈາການຂາຍໄກ່ ແລະ ເປັດ 9 ລ້ານກີບຕໍ່ປີ, ລາຍຮັບຈາກການຂາຍເຂົ້າ 30 ລ້ານກີບຕໍ່ປີ, ລາຍຮັບຈາກການຂາຍມັນຕົ້ນ 30 ລ້ານກີບຕໍ່ປີ, ລາຍຮັບຈາກການຂາຍພືດຜັກຕາມລະດູການ ແລະ ອື່ນໆ 70 ລ້ານກີບຕໍ່ປີ ແລະ ຍັງໄດ້ສ້າງເຮືອນຮົ່ມປູກຜັກ 2 ຫຼັງໂດຍໄດ້ຮັບທຶນສະໜັບສະໜູນລັດຖະບານ ສ.ເກົາຫຼີ ຜ່ານອົງການກ່ອຍກາ.
ການປູກພືດແບບປະສົມປະສານ ແລະ ການລ້ຽງສັດສາມາດສ້າງລາຍຮັບໃຫ້ແກ່ຄອບຄົວ314 ລ້ານກີບຕໍ່ປີ, ມີແຮງງານຫຼັກໃນຄອບຄົວ 4 ແຮງງານ, ຖ້າສະເລ່ຍໃສ່ຫົວຄົນພາຍໃນຄອບຄົວ78 ລ້ານ 5 ແສນກີບ, ເຮັດໃຫ້ຄອບຄົວມີເສດຖະກິດທີ່ດີຂຶ້ນ, ມີພື້ນຖານທີແໜ້ນໜາ ມີລາຍຮັບທີ່ໝັ້ນຄົງ, ສາມາດປຸກເຮືອນ ແລະ ພາຫະນະຮັບໄຊ້ (ລົດ ແລະ ເຄື່ອງມືກະສີກໍາ) ສາມາດສົ່ງລູກທຸກຄົນເຂົ້າໂຮງຮຽນ ແລະ ມີເງິນແຮໄວ້ໃຊ້ຈ່າຍໃນຍາມຈໍາເປັນ, ເສຍພັນທະຕ່າງໆ ແລະ ປະກອບສ່ວນຊ່ວຍເຫຼືອສັງຄົມ.
ຂ້າພະເຈົ້າຊື່ອິນຕາ ໂຮມຄະສິດ, ອາຍຸ 57 ປີ, ປະຈຸບັນຢູ່ບ້ານປຸ່ງປ່າຕາວ ເມືອງຄໍາເກີດ ແຂວງບໍລິຄໍາໄຊ.
ຈາກຜົນສຳເລັດດັ່ງກ່າວ ຂ້າພະເຈົ້າຂໍຂອບໃຈ ແລະ ຮູ້ບຸນຄຸນອັນລົ້ນເຫຼືອມາຍັງການນໍາພັກ-ລັດຂັ້ນເທີງ ໂດຍສະເພາະການນໍາເມືອງຄໍາເກີດ, ຂະແໜງການກ່ຽວຂ້ອງ ທີ່ມີນະໂຍບາຍອັນຖືກຕ້ອງໃນການສົ່ງເສີມການຜະລິດເປັນສິນຄ້າ, ເປີດກວ້າງໃຫ້ທຸກຄົນມີໂອກາດທໍາການຜະລິດ, ມີໂອກາດຊື້-ຂາຍ ຕາມລະບຽບກົດໝາຍ ຂ້າພະເຈົ້າບໍ່ມີສິ່ງໃດຈະຕອບບຸນແທນຄຸນພັກ-ລັດ ທີ່ເປັນຫ່ວງເປັນໄຍ ແລະ ຊຸກຍູ້ສົ່ງເສີມຄອບຄົວຂອງຂ້າພະເຈົ້າໄດ້ມີຖານະເສດຖະກິດດີຂຶ້ນຄືແນວນີ້. ໃນຕໍ່ໜ້າຂ້າພະເຈົ້າ ຈະສືບຕໍ່ພັດທະນາການຜະລິດກະສິກໍາ ແລະ ລ້ຽງສັດ ເປັນສິນຄ້າໃຫ້ມີຄວາມຍືນຍົງ ສາມາດສ້າງລາຍຮັບໃຫ້ກັບຄອບຄົວຫຼາຍຂຶ້ນ;ຈະຮັກສາໄວ້ມູນເຊື້ອດຸໝັ່ນຂະຫຍັນພຽນ ສົມກັບເປັນຕົວແບບໃນການຜະລິດກະສິກຳປະສົມປະສານຂອງເມືອງຄຳເກີດ.
ຄໍາເຫັນ