ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ແມັດ ດູຊີ ລັດຖະມົນຕີກະຊວງການທ່ອງທ່ຽວ ແລະ ການບໍລິການຂອງນູແວນເຊລັງໄດ້ເປີດເຜີຍບົດລາຍງານໂດຍລະບຸວ່າ: ການທ່ອງທ່ຽວສາກົນຂອງປະເທດນູແວນເຊລັງຟື້ນຕົວຢ່າງຕໍ່ເນື່ອງ ແລະ ກຳລັງຫວນກັບຄືນສູ່ລະດັບກ່ອນເກີດການແຜ່ລະບາດຂອງພະຍາດໂຄວິດ-19.
ໂດຍອີງຕາມຜົນການສຳຫຼວດຜູ້ມາຢ້ຽມຢາມຊາວຕ່າງປະເທດ (IVS) ລະບຸວ່າ: ນັກເດີນທາງຕ່າງຕ່າງປະເທດໃຊ້ຈ່າຍເງິນໃນນູແວນເຊລັງ 9,9 ພັນລ້ານໂດລານິວຊີແລນ (ສະກຸນເງິນນູແວນເຊລັງ) ໃນປີ 2023 ຜ່ານມາ ຊຶ່ງສະແດງໃຫ້ເຫັນວ່າ ອຸດສາຫະກຳການທ່ອງທ່ຽວກຳລັງຟື້ນຕົວຢ່າງຕໍ່ເນື່ອງ ສົ່ງຜົນໃຫ້ການທ່ອງທ່ຽວສາກົນສ້າງລາຍໄດ້ທີ່ສຳຄັນອັນດັບສອງຂອງນູແວນເຊລັງຮອງຈາກການສົ່ງອອກນົມຜົງ, ເນີຍ ແລະ ຊີສ. ທ່ານ ດູຊີ ກ່າວວ່າ: ການທ່ອງທ່ຽວຈະມີບົດບາດສຳຄັນໃນການຟື້ນຟູຂອງພວກເຮົາ ຂະນະທີ່ເສດຖະກິດປະເຊີນໜ້າກັບຄວາມທ້າທາຍທີ່ສຳຄັນ, ໂດຍການຟື້ນຕົວຂອງການທ່ອງທ່ຽວລະຫວ່າງປະເທດເປັນຂ່າວດີສຳລັບຊຸມຊົນ ແລະ ທຸລະກິດຕ່າງໆທີ່ໄດ້ຮັບຜົນປະໂຫຍດໂດຍກົງຈາກການໃຊ້ຈ່າຍຂອງນັກທ່ອງທ່ຽວ. ອີກຢ່າງໜຶ່ງ, ໃນປີ 2023 ນູແວນເຊລັງຮອງຮັບຊາວຕ່າງປະເທດ ທີ່ມາຢ້ຽມຢາມ ຈຳນວນ 2,96 ລ້ານຄົນ ຄິດເປັນປະມານ 76% ຂອງລະດັບກ່ອນເກີດພະຍາດໂຄວິດ-19.
ກະຊວງທຸລະກິດ, ນະວັດຕະກຳ ແລະ ການຈ້າງງານຂອງນູແວນເຊລັງລະບຸວ່າ: ການໃຊ້ຈ່າຍຂອງນັກທ່ອງທ່ຽວຍັງຄົງຢູ່ໃນລະດັບ 71% ຂອງລະດັບກ່ອນເກີດການແຜ່ລະບາດຂອງພະຍາດໂຄວິດ-19 ເມື່ອປັບຕາມອັດຕາເງິນເຟີ້ເນື່ອງຈາກປັດໄຈຕ່າງໆລວມເຖິງຈຳນວນຜູ້ມາຢ້ຽມຢາມທີ່ອາໄສຢູ່ກັບໝູ່ເພື່ອນ ແລະ ຄອບຄົວສູງຂຶ້ນ. ທັງນີ້, ທ່ານ ດູຊີ ກ່າວວ່າ:ຜູ້ມາຢ້ຽມຢາມຊາວອົສຕຣາລີມີທ່າອ່ຽງໃຊ້ຈ່າຍໜ້ອຍ ແລະ ຜູ້ມາຢ້ຽມຢາມຊາວເຢຍລະມັນໃຊ້ຈ່າຍຫຼາຍທີ່ສຸດໃນລະຫວ່າງເດີນທາງມານູແວນເຊລັງໃນປີ 2023.
ຄໍາເຫັນ