ການທ່ອງທ່ຽວທົ່ວໂລກຈະສູງກວ່າລະດັບກ່ອນເກີດການແຜ່ລະບາດຂອງພະຍາດໂຄວິດ-19

    ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ອົງການໆທ່ອງທ່ຽວໂລກ (UNWTO) ຊຶ່ງເປັນອົງການຊຳນານງານພິເສດດ້ານການທ່ອງທ່ຽວຂອງອົງການສະຫະປະຊາຊາດ (UN) ແລະ ມີສຳນັກງານໃຫຍ່ຢູ່ນະຄອນຫຼວງມາດຣິດ ປະເທດແອັດສະປາຍ ລະບຸວ່າ: ລະດັບການທ່ອງທ່ຽວສາກົນໃນປີນີ້ ຈະສູງກວ່າລະດັບກ່ອນການແຜ່ລະບາດຂອງພະຍາດໂຄວິດ-19 ໂດຍໄດ້ຮັບແຮງໜູນມາຈາກການຟື້ນຕົວໃນທະວີບອາຊີ.
    UNWTO ລະບຸວ່າ: ການທ່ອງທ່ຽວສາກົນຄາດວ່າຈະກັບມາສູ່ລະດັບກ່ອນເກີດການແຜ່ລະບາດຂອງພະຍາດໂຄວິດ-19 ໃນປີ 2024 ຊຶ່ງການຄາດຄະເນໃນເບື້ອງຕົ້ນຊີ້ໃຫ້ເຫັນວ່າພາກສ່ວນດັ່ງກ່າວຈະຂະຫຍາຍຕົວ 2% ສູງກວ່າລະດັບໃນປີ 2019. ໂຕເລກໃນປີຜ່ານມາສະແດງໃຫ້ເຫັນວ່າ ມີນັກທ່ອງທ່ຽວເດີນທາງໄປຕ່າງປະເທດ 1.300 ລ້ານຄົນ ຊຶ່ງສູງກວ່າປີ 2022 ແລະ ປີ 2019 ເຖິງ 44% ແລະ 88% ຕາມລຳດັບ. ເຖິງແມ່ນວ່າ UNWTO ຊີ້ໃຫ້ເຫັນເຖິງການຟື້ນຕົວຢ່າງແຂງແຮງໃນຕະຫຼາດອາຊີ ແຕ່ລະບຸຕື່ມວ່າ: ການເພີ່ມຂຶ້ນຫຼາຍທີ່ສຸດແມ່ນຢູ່ຕາເວັນອອກກາງ ຊຶ່ງເປັນພາກພື້ນດຽວທີ່ມີໂຕເລກສູງກວ່າລະດັບກ່ອນເກີດການແຜ່ລະບາດຂອງພະຍາດໂຄວິດ-19 ໃນປີ 2019 ທີ່ 22%. ອີກດ້ານໜຶ່ງ, ອາຊີ-ປາຊີຟິກ ເປັນພາກພື້ນທີ່ມີການຟື້ນຕົວຢູ່ໃນລະດັບຕ່ຳສຸດຂອງໂລກ ໂດຍຢູ່ທີ່ 65% ຂອງລະດັບກ່ອນເກີດການແຜ່ລະບາດຂອງພະຍາດໂຄວິດ-19. ທ່ານ ຊູຣັບ ໂປໂລລິຄາສວິລີ ກ່າວໃນຖະແຫຼງການລະບຸວ່າ: ຂໍ້ມູນຫຼ້າສຸດຂອງ UNWTO ເນັ້ນຢໍ້າເຖິງຄວາມຍືນຍົງ ແລະ ການຟື້ນຕົວຢ່າງວ່ອງໄວຂອງການທ່ອງທ່ຽວ ຊຶ່ງຄາດວ່າຈະມີໂຕເລກໃນລະດັບກ່ອນເກີດການແຜ່ລະບາດຂອງພະຍາດໂຄວິດ-19 ພາຍໃນທ້າຍປີ 2024. ທັງນີ້, ການທ່ອງທ່ຽວຈີນຄາດວ່າຈະຂະຫຍາຍຕົວຢ່າງວ່ອງໄວໃນປີນີ້ ເນື່ອງຈາກອຳນາດການປົກຄອງປັກກິ່ງອອກນະໂຍບາຍຟຣີວີຊາສຳລັບນັກເດີນທາງຈາກ 6 ປະເທດໄດ້ແກ່ ຝຣັ່ງ, ເຢຍລະມັນ, ອີຕາລີ, ໂຮນລັງ, ແອັສປາຍ ແລະ ມາເລເຊຍ ຈົນເຖິງທ້າຍເດືອນພະຈິກນີ້.
    ເຖິງຢ່າງໃດກໍຕາມ, UNWTO ລະບຸວ່າ: ການຄາດຄະເນໃນປີ 2024 ຍັງຄົງຂຶ້ນຢູ່ກັບອັດຕາການຟື້ນຕົວໃນອາຊີ ແລະ ຄວາມສ່ຽງດ້ານລົບທາງເສດຖະກິດ ແລະ ທາງພູມສາດການເມືອງທີ່ມີຢູ່ ໂດຍສະເພາະຢ່າງຍິ່ງສະຖານະການໂລກໃນປັດຈຸບັນ ແລະ ເສດຖະກິດໂລກທີ່ບໍ່ໝັ້ນຄົງ.