 |
ທ່ານ ພົງສະຫວັດ ມະນີທອງ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໃນວັນທີ 16 ກັນຍານີ້, ໂດຍໄດ້ແບ່ງປັນເລື່ອງລາວຊີວິດ ແລະ ວິໄສທັດໃນການຊ່ວຍເຫຼືອຜູ້ຖືກເຄາະຮ້າຍຈາກລະເບີດບໍ່ທັນແຕກ (UXO) ໃນ ສປປ ລາວ ຊຶ່ງໃນປີ 2008 ເວລານັ້ນຕົນເອງມີອາຍຸພຽງ 16 ປີ, ເປັນເດັກນ້ອຍຢູ່ບ້ານໂພນທອງ ເມືອງຫີນເຫີບ ແຂວງວຽງຈັນ (ປັດຈຸບັນອາຍຸ 34 ປີ) ດ້ວຍຄວາມຮູ້ເທົ່າບໍ່ເຖິງການ ເນື່ອງຈາກຄວາມຄຶກຄະນອງຫຼິ້ນແບບເດັກນ້ອຍໄດ້ຈັບເອົາລະເບີດບໍ່ທັນແຕກທີ່ຕົກຢູ່ຕາມທາງມາຫຼິ້ນ ຈົນເກີດການແຕກຂຶ້ນຢ່າງບໍ່ທັນຕັ້ງໂຕ. ເຫດການຄັ້ງນັ້ນເຮັດໃຫ້ຕົນເອງສະລົບໄປກັບທີ່ ແລະ ຕ້ອງສູນເສຍແຂນ ແລະ ການມອງເຫັນ. ຊີວິດຫຼັງຈາກນັ້ນ ແມ່ນເຕັມໄປດ້ວຍຄວາມຫຍຸ້ງຍາກ ເພາະຄອບຄົວມີອາຊີບເຮັດນາ ແລະ ລາຍໄດ້ຈຳກັດ ບໍ່ສາມາດແບກຫາບຄ່າໃຊ້ຈ່າຍໃນໂຮງໝໍໄດ້ດົນ. ແນວໃດກໍຕາມ, ຫຼັງຈາກປິ່ນປົວຢູ່ເຮືອນໄດ້ 2-3 ເດືອນ, ຂ້າພະເຈົ້າໄດ້ຕັດສິນໃຈລຸກຂຶ້ນສູ້ຕໍ່ໂຊກຊະຕາ ໂດຍເລີ່ມຝຶກຊ່ວຍເຫຼືອຕົນເອງໃນການເຄື່ອນໄຫວຊີວິດປະຈຳວັນ ເຊັ່ນ: ການອາບນ້ຳ, ຊັກເຄື່ອງ, ອະນາໄມເຮືອນ ແລະ ການເຄື່ອນໄຫວອື່ນໆ.
ຈາກນັ້ນໄດ້ມີໂອກາດກ້າວສູ່ການເປັນກະບອກສຽງລະດັບຊາດ ແລະ ສາກົນ, ເຂົ້າມານະຄອນຫຼວງວຽງຈັນ ເພື່ອເປັນອາສາສະໝັກປຸກລະດົມຂົນຂວາຍ ຮຽກຮ້ອງໃຫ້ຢຸດນຳໃຊ້ລະເບີດ ລວມທັງເປັນກະບອກສຽງໃຫ້ກັບພາກລັດ ແລະ ອົງການຈັດຕັ້ງຕ່າງໆ ເພື່ອເຜີຍແຜ່ຄວາມຮູ້ ໂດຍການຮຽນພາສາອັງກິດ ແລະ ຝຶກອົບຮົມດ້ານອື່ນໆ ໂດຍສະເພາະ ດ້ານຈິດຕະວິທະຍາເພື່ອໃຫ້ຄຳປຶກສາ ແລະ ສ້າງແຮງບັນດານໃຈໃຫ້ຜູ້ພິການຄົນອື່ນໆ ຊຶ່ງທີ່ຜ່ານມາ, ໄດ້ໃຫ້ຄຳປຶກສາຕໍ່ຜູ້ພິການມາແລ້ວຫຼາຍກວ່າ 300 ຄົນ.
ແຜນການຊ່ວຍເຫຼືອ ແລະ ການມີສ່ວນຮ່ວມຂອງຜູ້ເຄາະຮ້າຍ, ໃນກອງປະຊຸມຄັ້ງນີ້, ສະມາຄົມ PUA ໄດ້ມີສ່ວນຮ່ວມໃນການວາງແນວທາງ ແລະ ຈັດກິດຈະກຳປິ່ນອ້ອມ ເພື່ອຊຸກຍູ້ການປະຕິບັດຕາມມາດຕາ 5 ຂອງສົນທິສັນຍາ CCM ຊຶ່ງເນັ້ນໃສ່:ການມີສ່ວນຮ່ວມໃຫ້ຜູ້ຖຶກເຄາະຮ້າຍ, ອົງການ DPO ແລະ NGO ທ້ອງຖິ່ນມີສ່ວນຮ່ວມນັບຕັ້ງແຕ່ການວາງແຜນ, ປະຕິບັດ ແລະ ຕິດຕາມປະເມີນຜົນໂຄງການ, ສ່ວນການສ້າງອາຊີບ: ເສີມສ້າງທັກສະວິຊາຊີບ ເຊັ່ນ: ການແກະສະລັກໄມ້, ການເຮັດກະສິກຳແລະ ການແປຮູບຜະລິດຕະພັນ ເພື່ອໃຫ້ຜູ້ພິການສາມາດສ້າງລາຍໄດ້ດ້ວຍຕົນເອງ, ການຮ່ວມມືສາກົນ: ເພີ່ມທະວີການຮ່ວມມືກັບພັນທະມິດສາກົນ ທາງດ້ານງົບປະມານ ແລະ ເຕັກນິກ.
ທ່ານ ພົງສະຫວັດ ມະນີທອງ ໄດ້ຝາກຂໍ້ຄວາມສົ່ງຕໍ່ແຮງບັນດານໃຈ, ເຖິງຜູ້ຖຶກເຄາະຮ້າຍ ແລະ ຜູ້ພິການທຸກຄົນວ່າ:ຂໍເປັນກຳລັງໃຈໃຫ້ຜູ້ເຄາະຮ້າຍ ແລະ ຜູ້ພິການທຸກຄົນ ຢ່າຟ້າວຍອມແພ້ ຕາບໃດທີ່ເຮົາຍັງມີລົມຫາຍໃຈ ແລະ ມີແສງສະຫວ່າງຢູ່ປາຍອຸໂມງ ຂໍໃຫ້ສູ້ຕໍ່ໄປການບໍ່ຍອມແພ້ໃນມື້ນີ້ ອາດນຳເຮົາໄປສູ່ຄວາມສຳເລັດໃນມື້ໜ້າ.
ຄໍາເຫັນ