ໃນງານມະຫາກຳກິລາເອຊຽນເກມຄັ້ງທີ 19, ການແຂ່ງຂັນເຕະກະຕໍ້ ໄດ້ຮັບຄວາມສົນໃຈຢ່າງກວ້າງຂວາງຈາກຜູ້ຄົນທັງຫຼາຍ ຍ້ອນມີການແຂ່ງຂັນທີ່ດຸເດືອດ ແລະ ໜ້າຊົມ. ໃນງານມະຫາກຳກິລາເອຊຽນເກມຄັ້ງທີ 19 ທີມກະຕໍ້ ຍິງຂອງປະເທດລາວຄວ້າໄດ້ຫຼຽນທອງ, ນີ້ເຮັດໃຫ້ ທ້າວ ທະນົງຄານ ຄຸນມະນີ ຮູ້້ສຶກພາກພູມໃຈຫຼາຍ.
ປັດຈຸບັນນີ້ ທ້າວ ທະນົງຄານ ຄຸນມະນີ ພວມສຶກສາຮໍ່າຮຽນຢູ່ມະຫາວິທະຍາໄລຢູນນານ, ລາວໄດ້ສ້າງຄວາມຜູກພັນກັບກະຕໍ້ຕັ້ງແຕ່ນ້ອຍ. ໃນໄລຍະງານມະຫະກຳກິລາເອຊຽນເກມຫາງໂຈ່ວ, ຍ້ອນກະຕໍ້ ທ້າວ ທະນົງຄານ ຄຸນມະນີ ໄດ້ຜູກມິດສຳພັນທີ່ລືືມຍາກຢູ່ກິ່ງແຂວງປົກຄອງຕົນເອງເຜົ່າລືເຜົ່າຈິງໂພ ເຕີຫົງ.
ວັນທີ 1 ຕຸລາຜ່ານມາ, ການແຂ່ງຂັນເຕະກະຕໍ້ມິດຕະພາບ ພາຍໃຕ້ຫົວຂໍ້ “ເຕະກະຕໍ້ນໍາກັນເທາະ” ໂດຍມີຊາວໜຸ່ມຈາກປະເທດລ້ອງແມ່ນໍ້າລ້ານຊ້າງ-ແມ່ນໍ້າຂອງເຂົ້າຮ່ວມ ຖືກຈັດຂຶ້ນຢູ່ກິ່ງແຂວງເຕີຫົງ ຊຶ່ງໄດ້ດຶງດູດຄວາມສົນໃຈຈາກຫຼາຍຝ່າຍ. ທ້າວ ທະນົງຄານຄຸນມະນີ ກັບ ຊາວໜຸ່ມຜູ້ມັກເຕະກະຕໍ້ຈາກ 6 ປະເທດ ເຊັ່ນ: ຈີນ, ລາວ, ມຽນມາ, ໄທ, ຫວຽດນາມ ເປັນຕົ້ນ ໄດ້ເຂົ້າຮ່ວມກິດຈະກໍາຕ່າງໆກ່ຽວກັບກະຕໍ້ນໍາກັນ, ເລົ່າຄວາມໄຝ່ຝັນກ່ຽວກັບກະຕໍ້ ແລະ ອຸດົມການຊາວໜຸ່ມ ລະຫວ່າງຊາວໜຸ່ມຈາກປະເທດຕ່າງໆ.
ບ້ານເກີດຂອງ ທ້າວ ທະນົງຄານ ຄຸນມະນີ ຢູ່ນະຄອນ-ຫຼວງພະບາງ, ໃນຖານະເປັນຫຼັກສູດກິລາຂອງນັກຮຽນມັດມະຍົມຕົ້ນ ກະຕໍ້ໄດ້ດຶງດູດນັກຮຽນຫຼາຍຄົນເຂົ້າຮ່ວມ. ຫຼັງຈາກທ້າວ ທະນົງຄານ ຄຸນມະນີ ມາຮອດປະເທດຈີນແລ້ວ ລາວໄດ້ພົບເຫັນວ່າໝູ່ຮຽນນຳກັນຫຼາຍຄົນກໍມັກກິລາກະຕໍ້ເຊັ່ນກັນ. ທ່າມກາງກິລາທີ່ເຕັມໄປດ້ວຍຄວາມກະຕືລືລົ້ນແບບນີ້, ທຸກຄົນໄດ້ບາກບັ່ນສູ້ຊົນ ແລະ ຮ່ວມມືກັນ ເພີ່ມຄວາມຮັກແພງຊຶ່ງກັນແລະກັນ.ທຸກປີກໍຈະມີຊາວໜຸ່ມທີ່ມາຈາກປະເທດ ແລະ ເຂດແຄວ້ນຕ່າງໆ ມາເຕົ້າໂຮມກັນໃນງານກິລາແຂ່ງຂັນເຕະກະຕໍ້ລະດັບສາກົນ, ເພື່ອແບ່ງປັນຄວາມຮັກແພງຕໍ່ກິລານີ້ ຊຶ່ງບໍ່ພຽງແຕ່ເປັນການແຂ່ງຂັນກິລາເທົ່ານັ້ນ, ແຕ່ຍັງເປັນໂອກາດການແລກປ່ຽນຊຶ່ງກັນແລະກັນ. ທ້າວ ທະນົງຄານ ຄຸນມະນີ ເຫັນວ່າ, ໂດຍຜ່ານກິດຈະກໍາເຫຼົ່ານີ້, ຊາວໜຸ່ມທັງຫຼາຍສາມາດຖອດຖອນບົດຮຽນນຳກັນ, ຮຽນຮູ້ເຕັກນິກການເຕະກະຕໍ້ລະຫວ່າງປະເທດທີ່ແຕກຕ່າງກັນ, ພ້ອມທັງຮັດແໜ້ນສາຍພົວພັນລະຫວ່າງຊາວໜຸ່ມປະເທດຕ່າງໆ. ນີ້ບໍ່ພຽງແຕ່ໄດ້ສົ່ງເສີມການພັດທະນາຂອງກິລາ, ຍັງໄດ້ເພີ່ມທະວີໄມຕິຈິດມິດຕະພາບລະຫວ່າງປະເທດຕ່າງໆອີກດ້ວຍ.
ຂ່າວໂດຍ: ຫຼີລິງ, ຟູ້ຈາງໝິງແຢ້, ຫູຫຼີຊຽນ
ຄໍາເຫັນ