 |
ທ່ານ ສະເຫຼີມສັກ ໄຊຍະມຸງຄຸນ ຫົວໜ້າຫ້ອງການກະຊວງ ຍທຂ ໄດ້ສັງລວມລາຍງານພາບລວມ ແລະ ຄວາມຄືບໜ້າການຮ່ວມມື ໂດຍອີງຕາມບົດບັນທຶກການຮ່ວມມື MOU ວ່າດ້ວຍການຮ່ວມມືວຽກງານທີ່ຕິດພັນກັບຂະແໜງ ຍທຂ ລະຫວ່າງ ກະຊວງ ຍທຂ ແລະ ອົງການປົກຄອງ ນວ ໃນວັນທີ 23 ສິງຫາ 2025 ສໍາລັບ ຂອບເຂດຂອງການຮ່ວມມືມີ 7 ຂົງເຂດ ແລະ ກວມເອົາ 5 ຂົງເຂດວິຊາສະເພາະ ຄື: 1. ວຽກຂົວທາງ: ກໍ່ສ້າງ ບູລະນະຮັກສາ ແລະ ສ້ອມແປງທາງພາຍໃນ ນວ; 2. ວຽກເຄຫາ ແລະ ຜັງເມືອງ: ການປັບປຸງ ແລະ ພັດທະນາແຜນຜັງລວມ ແຜນຜັງລະອຽດໃນແຕ່ລະໄລຍະ ຕາມເງື່ອນໄຂການຂະຫຍາຍຕົວທາງດ້ານເສດຖະກິດ-ສັງຄົມຂອງນວ; ວຽກຄຸ້ມຄອງ ແລະ ຈັດການສິ່ງເສດເຫຼືອ (ຂີ້ເຫຍື້ອ) ຄົ້ນຄວ້າປັບປຸງລະບົບລະບາຍນໍ້າພາຍໃນຕົວເມືອງ ນວ ທັງສະເພາະໜ້າ ແລະ ຍາວນານ (Master Plan on Drainage) ວຽກປັບປຸງສິ່ງແວດລ້ອມຕົວເມືອງ; 3. ວຽກຂົນສົ່ງ: ລະບົບການຂົນສົ່ງໂດຍສານໃນຕົວເມືອງ ແລະ ການຂົນສົ່ງສາທາລະນະ ລວມທັງການແກ້ໄຂບັນຫາລະບົບໄຟອໍານາດ ພາຍໃນຕົວເມືອງ ນວ ; ວຽກງານໂລຈິສຕິກ ການຂົນສົ່ງສິນຄ້າ, ວຽກຄຸ້ມຄອງພາຫະນະ ແລະ ການຂັບຂີ່; 4. ວຽກນໍ້າປະປາ ແລະ ບໍາບັດນໍ້າເປື້ອນ: ຄົ້ນຄວ້າສ້າງແຜນແມ່ບົດຮ່ວມກັນໃນການພັດທະນາ ແລະ ສະໜອງນໍ້າປະປາຢູ່ ນວ ໃຫ້ພຽງພໍກັບການຊົມໃຊ້ຂອງປະຊາຊົນ ກໍານົດເປັນທິດທາງໃນການແກ້ໄຂທັງສະເພາະໜ້າ ແລະ ຍາວນານ. ຮ່ວມກັນຄົ້ນຄວ້າຮັກສາແຫຼ່ງນໍ້າດິບທີ່ມີເພື່ອໃຫ້ຍືນຍົງ ແລະ ສະຫງວນຕອນດິນໄວ້ ເພື່ອຂະຫຍາຍລະບົບໂຮງງານນໍ້າປະປາໃນອະນາຄົດ ຄົ້ນຄວ້າສ້າງລະບົບຄຸ້ມຄອງນໍ້າເປື້ອນໃນຕົວເມືອງ ໄປຄຽງຄູ່ກັບການສ້າງລະບົບລະບາຍນໍ້າໃນຕົວເມືອງ ແລະ 5. ວຽກທາງນໍ້າ: ການປ້ອງກັນຕາຝັ່ງເຈື່ອນລຽບຕາມແມ່ນໍ້າຂອງ ແມ່ນໍ້າສາຂາ ແລະ ດອນ ລວມທັງການປ້ອງກັນນໍ້າຖ້ວມ ການແກ້ໄຂບັນຫາການຂຸດຄົ້ນຫີນແຮ່ຊາຍ ແລະ ບັນຫາທີ່ຕິດພັນກັບການຂຸດຄົ້ນແຮ່ຄໍາຕົກຂ້ອນ, ການແບ່ງຂັ້ນຄຸ້ມຄອງໃນການອອກອະນຸຍາດການດຳເນີນທຸລະກິດ ໃນຂະແໜງ ຍທຂ, ວຽກງານສ້າງຂີດຄວາມສາມາດດ້ານບຸກຄະລະກອນໃຫ້ຂະແໜງ ຍທຂ ຢູ່ ນວ.
 |
ຜ່ານການຈັດຕັ້ງປະຕິບັດເຫັນວ່າ: ບັນດາກົມກ່ຽວຂ້ອງຂອງກະຊວງ ຍທຂ ກໍໄດ້ລົງເລິກເຮັດວຽກກັບພະແນກ ຍທຂ ນວ ຊຶ່ງສາມາດສະຫຼຸບໄດ້ຄວາມຄືບໜ້າ ສະເພາະວຽກທີ່ຕິດພັນກັບຫ້ອງການກະຊວງນັ້ນ ແມ່ນການແບ່ງຂັ້ນຄຸ້ມຄອງການອອກໃບອະນຸຍາດດຳເນີນທຸລະກິດຂອງຂະແໜງ ຍທຂ. ປັດຈຸບັນ, ກະຊວງ ຍທຂ ໄດ້ສໍາເລັດການປັບປຸງຂໍ້ຕົກລົງ ວ່າດ້ວຍການອະນຸຍາດດໍາເນີນທຸລະກິດຂອງຂະແໜງການ ຍທຂ ສະບັບເລກທີ 17555/ຍທຂ, ລົງວັນທີ 27 ກໍລະກົດ 2026. ໃນນັ້ນໄດ້ມອບໃຫ້ບັນດາກົມກ່ຽວຂ້ອງເປັນຜູ້ອະນຸມັດໂດຍຜ່ານຈຸດບໍລິການປະຕູດຽວຂອງກະຊວງ. ພ້ອມນັ້ນ, ໄດ້ສໍາເລັດການປັບປຸງຄະນະຮັບຜິດຊອບລົງທຶນປະຕູດຽວຂອງຂະແໜງ ຍທຂ ແລະ ໄດ້ສ້າງກົນໄກປະສານງານລະຫວ່າງກະຊວງ ແລະ ບັນດາພະແນກ ຍທຂ ນວ/ບັນດາແຂວງໃນຂອບເຂດທົ່ວປະເທດ. ຂ່າວ: ກະຊວງ ຍທຂ
ຄໍາເຫັນ