ກະຊວງການຕ່າງປະເທດ ປາຖະກະຖາວັນສໍາຄັນ ຂອງ ສປປ ລາວ

ໃນພິທີດັ່ງກ່າວ, ສະຫາຍ ໄມທອງ ທຳມະວົງສາ ໄດ້ຍົກໃຫ້ເຫັນເຖິງຜົນງານ, ຄຸນງາມຄວາມດີ ຂອງປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງຊາດລາວ ໃນພາລະກິດຕໍ່ສູ້ປົດປ່ອຍປະເທດຊາດ, ກໍຄືການປະຕິບັດ 2 ໜ້າທີ່ຍຸດທະສາດການປົກປັກຮັກສາ ແລະ ສ້າງສາພັດທະນາປະເທດຊາດ; ທ່ານປະທານໄດ້ສືບຕໍ່ເຜີຍແຜ່ເອກະສານ ການຮ່ວມມືສອງຊາດ ເພື່ອຮ່ວມກັນເສີມຂະຫຍາຍ ວັນເຊັນສົນທິ ສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 49 ປີ ແລະ ການສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 64 ປີ ໃຫ້ນັບມື້ນັບເລີກເຊິ່ງຍິ່ງຂຶ້ນ, ພ້ອມທັງໂຄສະນາ ຄໍາຂວັນປຸກລະດົມ ຄື: ຊົມເຊີຍວັນສ້າງຕັ້ງແນວລາວສ້າງຊາດ ຄົບຮອບ 76 ປີ ຢ່າງສຸດໃຈ, ຊົມເຊີຍວັນປະກາດໃຊ້ລັດຖະທາມະນູນແຫ່ງ ສປປ ລາວ ຄົບຮອບ 35 ປີຢ່າງສຸດໃຈ ແລະ ຊົມເຊີຍວັນການທູດລາວຄົບຮອບ 81 ປີ. ສະນັ້ນ, ເພື່ອເປັນການໂຄສະນາສຶກສາອົບຮົມ ໃຫ້ບັນດາພະນັກງານ-ລັດຖະກອນໃຫ້ເຂົ້າໃຈຢ່າງເລິກເຊິ່ງຕໍ່ກັບມູນເຊື້ອອັນດີງາມຂອງ ປະທານ ສຸພານຸວົງ ແລະ ຍົກສູງສະຕິ, ເສີມຂະຫຍາຍມູນເຊື້ອຮັກຊາດ, ຮັກລະບອບປະຊາທິປະໄຕປະຊາຊົນ, ສ້າງຄວາມສາມັກຄີປອງດອງ, ມີສະຕິລະວັງຕົວຕໍ່ກົນອຸບາຍທໍາລາຍມ້າງເພຂອງອິດທິກຳລັງປໍລະປັກ ແລະ ເປັນການສະແດງຄວາມກະຕັນຍູຮູ້ບຸນຄຸນຕໍ່ຜູ້ ນຳພັກ ແລະ ລັດຖະບານຮຸ່ນກໍ່ຕັ້ງຍ້ອນມີເພິ່ນໃນມື້ນັ້ນຈຶ່ງມີພວກເຮົາໃນມື້ນີ້. ຖືເອົາໂອກາດນີ້ ໂຄສະນາປຸກລະດົມໃຫ້ພະນັກງານ, ສະມາຊິກພັກ, ພ້ອມກັນຮໍ່າຮຽນເອົາຄຸນສົມບັດ, ສິນທໍາປະຕິບັດອັນສູງສົ່ງ ໂດຍສະເພາະແມ່ນຈິດໃຈຮັກຊາດອັນສູງສົ່ງ, ຍອມເສຍສະຫຼະທຸກສິ່ງທຸກຢ່າງເພື່ອປະເທດຊາດ ແລະ ປະ ຊາຊົນຂອງປະທານ ສຸພານຸວົງ, ພ້ອມທັງສ້າງຄວາມເຂົ້າໃຈ ແລະ ຮັບຮູ້ເຖິງ ແນວທາງນະໂຍບາຍການຕ່າງປະເທດຂອງປະເທດເຮົາໃນແຕ່ລະໄລຍະ, ຮ່ວມກັນເປັນເຈົ້າການເຂົ້າຮ່ວມໃນການເສີມຂະຫຍາຍສາຍພົວພັນພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແລະ ຊົມເຊີຍວັນສ້າງຕັ້ງແນວລາວສ້າງຊາດຢ່າງສຸດໃຈ, ຊົມເຊີຍວັນປະກາດໃຊ້ລັດຖະທາມະນູນແຫ່ງ ສປປ ລາວ ຢ່າງສຸດໃຈ.

ໃນໂອກາດນີ້, ສະຫາຍໄດ້ຮຽກຮ້ອງມາຍັງຄະນະພັກ-ຄະນະນຳ, ຄະນະກົມ, ສະມາຊິກພັກ, ພະນັກງານ-ລັດຖະກອນທັງໝົດຂອງກະຊວງການຕ່າງປະເທດ ຈົ່ງພ້ອມກັນເສີມຂະຫຍາຍມູນເຊື້ອອັນດີ ງາມຂອງພັກ ເປັນຕົ້ນແມ່ນບົດຮຽນການນໍາພາຂອງພັກ, ພ້ອມນັ້ນ ກໍພ້ອມກັນຖອດຖອນບົດຮຽນ ຈາກບັນດາຂໍ້ຂາດຕົກບົກພ່ອງໃນໄລຍະຜ່ານມາ ເພື່ອປັບປຸງປ່ຽນແປງການນໍາພາຂອງພັກໃນໄລຍະໃໝ່ໃຫ້ສອດຄ່ອງ, ພ້ອມກັນສ້າງພັກໃຫ້ປອດໃສ, ເຂັ້ມແຂງ ແລະ ໜັ້ກແໜ້ນ ເພື່ອຮັກສາບົດບາດກໍາອໍານາດຂອງພັກ ແລະ ນໍາພາວຽກງານການຕ່າງປະເທດ ໄປສູ່ຈຸດໝາຍ.

(ຂ່າວ: ກຕທ)