 |
ພິທີມອບ-ຮັບມີຂຶ້ນໃນວັນທີ 27 ສິງຫາຜ່ານມາ, ທີ່ ໂຮງໝໍເມືອງໂຂງ ກ່າວມອບໂດຍ ທ່ານ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ, ຕາງໜ້າໃຫ້ໂຮງໝໍເມືອງໂຂງ ກ່າວຮັບໂດຍ ທ່ານ ບຸນເນື່ອງ ສີລາຄົມ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງໂຂງ, ໂດຍມີທ່ານ ຈັນທະນົງສິນ ຈັນທະພິມ ປະທານຄະນະກຳມະການປົກຄອງເມືອງ, ມີຫົວໜ້າພະແນກສາທາລະນະສຸກແຂວງ, ມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ການມອບ-ຮັບ ເຄື່ອງຊ່ວຍເຫຼືອໃນຄັ້ງນີ້ ຖືເປັນກຳລັງແຮງ ແລະ ເປັນການກະຕຸກຊຸກຍູ້ຢ່າງແຂງແຮງ ໃນການສ້າງຄວາມເຂັ້ມແຂງ ໃຫ້ແກ່ວຽກງານກັ່ນກອງ, ບົ່ງມະຕິພະຍາດທາງລະບົບຫາຍໃຈ ກໍຄືພະຍາດວັນນະໂລກ ໃຫ້ມີຄວາມຊັດເຈນ, ວ່ອງໄວ ແລະ ທັນທ່ວງທີ; ທັງເປັນການຍົກລະດັບ ຂີດຄວາມສາມາດ ຂອງໂຮງໝໍຂັ້ນທ້ອງຖິ່ນ ໃຫ້ມີຄວາມພ້ອມໃນການບໍລິການປິນປົວ ແລະ ເບິ່ງແຍງສຸຂະພາບຂອງປະຊາຊົນ ຢູ່ເຂດເມືອງໂຂງໃຫ້ດີຂຶ້ນເປັນກ້າວໆ.
 |
ຫ້ອງການສາທາລະນະສຸກເມືອງໄດ້ລາຍງານໃຫ້ຮູ້ວ່າ: ຜ່ານມາການກວດພະຍາດວັນນະໂລກ ມີເປົ້າໝາຍທັງໝົດ 1,048 ຄົນ, ໃນນີ້ ປະຕິບັດໄດ້ 540 ຄົນ (ສ່ວນທີ່ຕ້ອງສືບຕໍ່ປະຕິບັດມີ 500 ກວ່າຄົນ), ຂຶ້ນທະບຽນປິ່ນປົວມີທັງໝົດ 159 ຄົນ (ໃນນີ້ ມີການຍົກຍ້າຍເຂົ້າຕື່ມ 3 ຄົນ), ກວດພົບເຊື້ອມີ 63 ຄົນ, ຜູ້ເຂົ້າຮັບການກິນຢາປ້ອງກັນ (TPT) ມີ 25 ຄົນ, ຜົນການລົງກວດຄົ້ນຫາຜູ້ຕິດເຊື້ອແບບແຂງແຮງ (ACF) ມີຜູ້ເຂົ້າຮ່ວມຮັບການກວດທັງໝົດ 126 ຄົນ (ຍິງ 67 ຄົນ), ໄດ້ຮັບການກວດກະເທິມີ 27 ຄົນ, ພົບເຊື້ອ 7 ຄົນ, ເຂົ້າຮັບການປິ່ນປົວ 23 ຄົນ. ວຽກງານການລົງຕິດຕາມຄົນເຈັບ ກິນຢາປິ່ນປົວວັນນະໂລກຕາມບ້ານໃນ 2 ສຸກສາລາມີ: ເຊໂຮງ (2 ບ້ານ) 8 ຄົນ; ໂພນສະອາດ (2 ບ້ານ) 2 ຄົນ ລວມທັງໝົດ 10 ຄົນ ທີ່ໄດ້ຮັບການຕິດຕາມຢ່າງໃກ້ຊິດ ເພື່ອຊຸກຍູ້ ຄົນເຈັບທີ່ຂາດຢາ ຫຼື ບໍ່ມາກິນຢາ ໃຫ້ໄດ້ສືບຕໍ່ ກິນຢາປິ່ນປົວ ຢ່າງຕໍ່ເນື່ອງ ແລະ ປົກກະຕິ.
ການໄດ້ຮັບເຄື່ອງເອັກສະເລຊຸດໃໝ່ນີ້ ຈະກາຍເປັນເຄື່ອງມືທີ່ສຳຄັນ ທີ່ຈະມາຊ່ວຍໃຫ້ທີມງານແພດ-ໝໍ ໂຮງໝໍເມືອງໂຂງ ສາມາດເລັ່ງກວດຄົ້ນຫາຜູ້ຕິດເຊື້ອວັນນະໂລກ ໄດ້ຢ່າງມີປະສິດທິພາບ ເພື່ອບັນລຸຕາມເປົ້າໝາຍ ທີ່ວາງໄວ້ໃນການລົບລ້າງພະຍາດວັນນະໂລກ ໃຫ້ໝົດໄປຈາກທ້ອງຖິ່ນ.
ຂ່າວ-ພາບ: ເມືອງໂຂງ
ຄໍາເຫັນ