 |
ພິທີປາຖະກະຖາດັ່ງກ່າວຈັດຂຶ້ນໃນວັນທີ 22 ກໍລະກົດນີ້ ທີ່ ເມືອງແກ່ນທ້າວໂດຍການເປັນກຽດເຂົ້າຮ່ວມຂອງທ່ານຄໍາປຸ່ນນວນສະບັບກຳມະການພັກແຂວງເລຂາຄະນະບໍລິຫານງານພັກເມືອງ, ມີຄະນະປະຈຳພັກເມືອງ, ກຳມະການພັກເມືອງແລະພາກສ່ວນກ່ຽວຂ້ອງເຂົ້າຮ່ວມ.
ທ່ານຄໍາປຸ່ນນວນສະບັບໄດ້ໃຫ້ກຽດປາຖະກະຖາ ໄດ້ຍົກໃຫ້ເຫັນເຖິງຊີວິດ ແລະ ພາລະກິດປະຕິວັດຂອງ ປະທານ ສຸພານຸວົງ ເຊິ່ງເພິ່ນແມ່ນໜຶ່ງໃນຜູ້ນຳທີ່ມີບົດບາດພົ້ນເດັ່ນ ເປັນແກ່ນສານ ແລະ ເປັນໃຈກາງໃນການເຕົ້າໂຮມຄວາມສາມັກຄີປອງດອງຂອງປະຊາຊົນບັນດາເຜົ່າ, ທຸກຊັ້ນຄົນ, ສາສະໜາ ແລະ ເພດໄວ ເພື່ອເຂົ້າຮ່ວມໃນພາລະກິດປົດປ່ອຍຊາດ ກໍຄືການສ້າງສາ ແລະ ພັດທະນາປະເທດຊາດ.
ປະທານ ສຸພານຸວົງ ແມ່ນຜູ້ນຳທີ່ມີຄວາມຕື່ນຕົວ, ເສຍສະຫຼະຜົນປະໂຫຍດສ່ວນຕົວເພື່ອຜົນປະໂຫຍດລວມຂອງຊາດ, ອຸທິດສະຕິປັນຍາ ແລະ ຫົວຄິດປະດິດສ້າງເຂົ້າໃນການກໍ່ສ້າງແນວທາງຍຸດທະສາດຂອງພັກປະຊາຊົນ ປະຕິວັດລາວ. ເພິ່ນໄດ້ຄົ້ນຄວ້າຈິດຕະສາດຂອງປະຊາຊົນບັນດາເຜົ່າ ແລ້ວສະຫຼຸບເປັນທິດສະດີ ເພື່ອນຳເຂົ້າສູ່ແນວທາງນະໂຍບາຍຂອງພັກ, ໂດຍສະເພາະແມ່ນການສ້າງຕັ້ງ, ປັບປຸງ ແລະ ເສີມຂະຫຍາຍອົງການຈັດຕັ້ງແນວໂຮມແຫ່ງຊາດ (ຫຼື ແນວລາວອິດສະຫຼະໃນເມື່ອກ່ອນ) ເຊິ່ງເປັນການຈັດຕັ້ງທຳອິດທີ່ສ້າງເງື່ອນໄຂໃຫ້ຄວາມສາມັກຄີລະຫວ່າງເຜົ່າ ແລະ ຊັ້ນຄົນຕ່າງໆ ນັບມື້ນັບເຕີບໃຫຍ່ຂະຫຍາຍຕົວ.
 |
ພ້ອມດຽວກັນນີ້, ທ່ານເລຂາຄະນະບໍລິຫານງານພັກເມືອງ ຍັງໄດ້ຍົກໃຫ້ເຫັນຄວາມໝາຍຄວາມສຳຄັນຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃນໄລຍະຕໍ່ສູ້ກູ້ຊາດກໍຄືໄລຍະປົກປັກຮັກສາ ແລະ ສ້າງສາປະເທດຊາດ, ປະຫວັດການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ, ມູນເຊື້ອອັນດີງາມຂອງແມ່ຍິງລາວ ພ້ອມທັງປະຫວັດຄວາມເປັນມາຂອງກິລາ-ກາຍຍະກຳລາວ, ວັນໂອແລມປິກລາວ ແລະ ວັນໂອແລມປິກສາກົນ ຕື່ມອີກ.
ໃນພິທີ, ຍັງໄດ້ປະກາດພະນັກງານ-ລັດຖະກອນ ພັກການຮັບອຸດໜູນບໍານານ, ມອບໃບຍ້ອງຍໍ ແລະ ໃບສົມມະນາຄຸນໃຫ້ບຸກຄົນທີ່ມີຜົນງານດີເດັ່ນປະກອບສ່ວນຊື້ອຸປະກອນຮັບໃຊ້ຫ້ອງການ.
ຂ່າວ: ແກ່ນທ້າວ
ຄໍາເຫັນ